CCPUR: Nk. Rose-el Rothangmawi D/o Lalkhawmawi Khawzawl, Sielmat, CCPur chun Indian School of Mines, Dhanbad-a inchuk dinga Entrance Exam (M Tech GeoTechnology) ah hlawtlingna changin All India Ranking 49-nain a ṭhang a, ST Rank 2 a nih. Rose-el hin Indian Institute of Technology (IIT) JAM (Joint Admission Test) a khawm a tling a, tuhin calling letter a nghak mek. Ama hi Hansraj College, Delhi University a B.Sc. Geology final year exam pe lai mek a nih. Hiengang entrance testa hmar nunghak hlawtling hmasatak la niin ei hriet.“Vai han eini tribal hai reserved category hnuoia tling mei mei tia hmusit taka an mi biek hlak leiin All India rank 49-a ka ṭhang phak hi ka lawm hle, tuhin chu hmusit takin an mi biek thei ta bik naw ding a nih” tiin telephone hmanga ei chanchinbu in a biekpawna huna Rose-el hin a hril. IIT a mi calling letter ka nghak mek a, a ieng lem am ka lak ding ka la hriet chieng thei nawh tiin a hril bawk.
A hlawtlingna hi ei chanchinbu chun a lawmpui hle a, hmatieng peia khawm hlawtlingna ṭhalem la hung chang pei dingin ditsakna ei inhlan.
~HT
