~ Jami Darngawn
Columnist, Virthli (ONP)
✍ Kum 7 vel liem ta a khan zingkar ka tho ding tawn hin kan zalna pindan sung a chun banga VAR ka hmu a, var naran nisa'n a hung el var ka sawna, ieng bek beka ka ngai naw a nih. Amiruokchu ka lungril a himaw deu zinga, asan chu nisa'n a hung el var dan ding kha a um thei naw lei a nih.
Vawikhat chu zana ka pasal fena nei ala hung inlawi nawa ka nau hai leh khuma kan uma, ka nau hai pahni chu an in taha kan current chu a hung thi ringawt a, kan zalna pindan chu an thim vawnga candle sit ding ka zawng tum lai tak chun kan bang lai chun var a hung um tah a, ka lungril chun 'chu var chu iem mani maw eh' ka ti a, ka en zinga a hung var deu deua ka lungril bawk chun ka țawngțai taa, chutaka chun ka lungrila chieng takin "ka umpui zing che" tiin mi bietu a um a, chu var chu mak tak el ana, var dang hai le an ang naw hle a nih. Kei khawm suk danglamin ka uma Lalpa Thlarau chun a mi umpui ti chu ka hriet thei bawk, "Lalpa ka ngai che mi maksan naw rawh aw? " ti zing pum chun ka en zinga amiruokchu damte te'n an tawl peia kan zalna pindan chu a suok san taha, chu var mawi tak el chun a mi maksan tah a nih. Ka khuo a sawt taluoa ka mittui dam a hung suok hiel a nih.
Sawtnawte hnung chun ka pasal fena nei chu a hung inlawi tah a, thil umzie ka hrila ka pasal chun "kei khawmin var chu ka hmu nuom ve de, i hmu nawk pha mi hril ve rawh aw ? " a ti a, amiruokchu tuchen hin chuongang var chu ka hmu nawk ta naw a nih.
Tienlai ti inla, ka naupang lai chun ka pa hi fienriel țawngțai dingin zana rama a fe hlak a, vawikhat chu ka pa fienriel țawngțaia fe tum chu ka ngai taluoa, a fe ka phal nawa ka țap pek tah a, ka nu le pa chun ka hriselnaw lei chun an mi duot deu ti ka hriet lei chun kan sek pek hlak a nih, chuongchun a mi puok khaia in angin ka um peka a mi'n zal tir charin ka har pek nawk hlak, a tawp tawp a chun ka pa chu a fe ka phal hram tah a nih.
Chu zan chun ka pa chu a hung intak deu lei chun ka nu chu a beidawng deua țawngțaina a nei tah a, ka nu a țawngțai zo chun kan insunga var a hmu tah a, kei hlak chun ka hmu thei nawh, ka nu ruok chun a hmu thei a nih. Chuongchun ka pa chu a hung inlawi tah a, ka pa'n hieng hin a hril " Zelin ka uma Lalpa'n thil tamtak a mi'n hmu tir a" a ti a, ka nu chun ka pa kuomah "i hung intak deu leiin ka țawngțaia ka țawngțai zo chun var ka hmua ka thla a muong tah a" a tia.
Chu hun lai chun ka pa kha Lalpa'n nasa takin a hmang ve a nih, mi invet ti inla min an dawi invet hai dam kha an sung ha'n an hung țhuoi/panpui hlaka Lalpa'n ka pa fethleng chun a suk dam hlak a, chun natna khir tak tak hai khawma damna an chang hlak a nih. Kha hun lai khan ka la naupang leiin ka pa um dan Lalpa Thlarauvin a hmang dan hai kha ka lo hriet famkim naw deu a nih.
Awleh, tiemtu ditum tak nangkhawm Lalpa Thlarau Thienghlim chun iengtiklai khawm a umpui zing che a nih.
(Emmanuel ei kuomah Pathien a um)
Matthai 1:
23 “Ngai ta, nunghâk thienghlim chun nau vawn a ta, Naupasal nei a ta, a hmingah Immanuel sak an tih,” Immanuel chu “Ei kuomah Pathien a um,” tina a nih.
