~ Jami Darngawn

✍ Thuvarhai 14:
1. Nuhmei var chun a in chu a bawl a,
Nuhmei invêt ruok chun a kuthaiin a țhiek hlak.

Awleh, Nuhmei var le invêt kar hi a hla em em a ei Bible-in nuhmei var a ti tak hi kei ka ngaidan mâwlte taka ka lo ngai/hmu ve dan chu hieng hi a nih.

Hi 'IN' ei chengna hi a tlangpuiin pasal ha'n an bawl tlangpui a nih (Nuhmei khawm in bawltu ei um thei ve tho) Mihai in ah ei fe pha in țha le țhanaw chu an hawidan/hadam dan chu inthlau tak ani hlak, in țha le ropui chu in neituhai khawm ei ngaisangin inza an um hlak nikha.

Ei Bible-in "lnbawl" a ti tak chu hi ei chengna in ni lem lovin mit a hmu theilo lungril/thlarau chengna in lem a nih tiin hang la phawt ei tih.

Korea rama chun nupui pakhat Biekin sung ah ni 10 bungheia a țawngțai lai chun mi pakhat chun "iem ata bungheiin i țawngțai a ?" tiin an dawna, chu nu chun "ka pasal hi Pastor ana chu a hring naw leiin Pastor hringlo chu ka ditnaw leiin  Pathien kuomah ka pasal chu Pastor hring tak le thlaraua sip/hrat a ni theina dingin bungheiin ka hni a nih" tiin a dawn an ti chuh !

Chu Korea nu chanchin/thilthaw chun thu a hril nasa khawp el a kei daikilkara um nu khawm hin ka lo hriet/sawr phak ve a nih.

Ani ngei kei khawm tuta ka/kan chengna in hi chu ka bawl ve nawa, pawisa khawm ka seng bawk nawh, ka pasalin iengkim a ngaituoa pawisa khawm seng ding po po a senga in bawlthiem hai an bawl tir a nih. Amiruokchu hi kan chengna in hi ni lem lovin thlarau rama IN ruokchu keiin ka bawl a ngai a nih.

In țha ei dit chun a hmangruo khawm a țha hmang a ngaia a man khawm a to reng a nih, hmangruo țha hmang ding chun pawisa nei met a ngai bawk, pawisa ei nei tam naw chun in țha nei/bawl hi thil harsa a ni ang bawkin, thlarau rama in bawl ding khawm hin hmangruo țha a ngai bawk a nih.

Thlaraua 'IN' bawlna ding a hin hmangruo țha ei lak/nei a ngaia chu hmangruo hai chu khawvel pawisaa inchawk thei ani nawh, lungril le titak zeta țawngțaina tinrenga hnia Lalpa kuoma intuklut zing a ngai a nih, a țul chun bungheia țawngțai/hni khawm alo țul hlak a nih.

Sâm ziektu chun ; "LALPAN in a bawl naw chun, A bawltuhai chu an inrim thlawn el a nih"  alo ti angin, Lalpa țhang lova in ei bawl ani chun ei bawl thlawn el ding ani leiin, iengtik lai khawm Lalpa le inzawm tlat a țul a nih.

Nunghak pakhat hi fel deu a um a, tlangval pakhat fel deu a um bawk, chuong hai chu ka sang hai anga ka en ve ve an ni leiin innei hai sien ti chu ka nuompui leiin, chu nunghaknu kuomah chun "tlangval fel deu le Pathien ți mi a um a chupa chu i pasal dingin ka ditsak che a innei ro aw ?"  Ka ti a.
Chu nunghaknu mi dawnna chu ropui ka ti hle.
"U Jam!  I mi ditsaka ka lawm hle laizingin, kei chu Pathien kuoma ka lo țawngțaina chu pasal dingin ieng anga fel lo le ruithei ching mi khawm lo nisien Lalpa'n ka ta dinga a mi ruot pek ani chun kan innei pha siemțhat chu ka mawphurna niin ka ngai" a ti chuh !
Hiengang hin nuhmei/nunghak ha'n ti thei seng inla pasal dukdaklo ei lo nei ani khawma Lalpa hratna ringsanin siemțhat tum seng inla nuom ava um ngei de !

Kei khawm kum 20 vel chu pasal neiin ka um ve tah a, ka phulovin Lalpa'n pasal țhatak le feltak le nau rila ra malsawmna nau pasal 2 a mi pek hi ka lawm hle. Amiruokchu (ka pasal le ka nau hai 2 hi)  ka in bawl ding le ka bawl mek hai hi ka khat chun ka hnenaw hle a, chuleichun nitin mi bawlpuitu dingin Lalpa hnuoi le van Siemtu chu ka ko zing a nih. Achang chun Korea nu angin bungeiin Lalpa ka ko/hni hlaka, chu zara chun ka in bawl mek hi mihai thlarau chawl hadam theina a ni ngei ka beisei a nih.

Lalpa ngaia nuhmei invêt eini nawna ding le, Lalpa le ei mihriem chanpui hai ngaia nuhmei var eini theina dingin, abikin ka nuhmei chanpui hai ta dingin hi thuziek theitawp insuoa ka hung buoipui hi tiemtuhai lungrilah LALPAN a thar takin mal mi sawm pek raw seh.

Post a Comment

Powered by Blogger.