Muolhoi, January 31, 2018, Virthli (ONP): Hun lo taka ei lo the tah Tv. Lalsantluong (Aryan Ngurte) chu vawisun khan NCHAC EM Pu Omendu Hojai, ei EM pa Pu Ngamrothang Hmar le MLA thenkhat hai chu security guard tha tawk tak leh Aryan Ngurte hai khuo Boromuolkawi ah fein ralna hun an hmang. A thlan a hai fein Thangsuopon pa 3 lai inkhum ani a, tuolsung nu le pa hai ralna thlaithleng an awt pui bawk.
Chun Pu Omendu Hojai, EM chun Aryan Ngurte lungmawi dawna dingin cheng Rs. 30,000 pek an tiem el khel a, Aryan Ngurte hrietzingna ni fawmin thlanmuola chawlbuk tha tawk tak cheng nuoi khat (Rs. 1 lakh) man in bawl an tiem bawk baka Aryan Ngurte a unau hai laia pakhat tak sawrkar sin pek an tiem bawk a nih.
Tv. Lalsantluong (Aryan Ngurte) hi January 23 zana Aizawl hotel inlar Top Chef building anthawk vangduoithlak taka tla a, muol mi lo liem san tah kha a nih. Tv. Lalsantluong hi Pu Ngurlallawm, Boromuolkawi, NC Hills hai nau 12 laia a naupangtak a ni a, Chennai a sinthaw a um hlak a nih. Thuziek thiemtak le hlaphuok thiem tak el a ni a, Mizo group ṭhenkhata hai mi inlar hai chanchin ziekin mi tam lem chun Aryan Ngurte tiin an hrietlar lem a nih. Mizo hlasakthiem hai chanchin ziekna group inlar em em Mizo Zaithiam News siemtu niin Mizo hlasakthiem hai le khawm inhmelhrie hle in inlaichinna ṭhatak nei a nih.
