Responsive Ad Slot

Hmarkhawlien khawsunga inthatna dit naw suk langna'n mipui sangtelin lam an hraw

Wednesday, January 31, 2018

/ Published by Simon L Infimate
Hmarkhawlien, Jan 31, 2018: January 27 zana Hmarkhawlien khawsunga silai hmanga inthatna tlung dit naw zie suklangnain mipui 5000 vel pungkhawmin Hmarkhawlien anthawk Lakhipur chen, lamhrawna (public procession) an nei.

Pu Norbar Sanate chu a inlengna Tuikhur Venga HPC(D)-P haiin kar liem ta inrinni zan khan an kaphlum a. Hmarkhawlien khawsunga silai chelekna leia thina a tlungna thuah khawsunga organisation hran hrana inthawk thuoitu le Hmarkhawlien khawsunga roreltuhai chun January 30 khan NEICORD office-ah emergency meeting an nei a. Mipui lamhrawna (public procession) nei ding hin an lo relthluk tah a nih.

Lakhipur Sub-Divisional Officer (Civil) phalna hnuoia vawisun mipui a sangtelin lamhrawna an nei a. Mipui pungkhawm hai hi By-pass Junction ah an innghak bum a. Lakhipur Thana anthawk venghimna sin thaw dingin police tam tak an hung tlankai bawk a. Anni bak a hin mipui lamhraw haiin buoina an tuok ding inlauin Central Reserve Police Force le Assam Rifles haiin mipui vilna sin hi an hung thaw a nih.

Zing dar 10:00 am anthawk lamhrawna hi nei tan a ni a. By-pass road hrawsukin Diger tiengah hang inkuol tan phawt a ni a. Fulertal-ah lutin Lakhipur ah zun kuol a nih.

National Holiday a ni leiin Lakhipur SDO Office hi an khar a. Amiruokchu Sub-Divisional Magistrate Pi Lalsim chu thuoitu le roreltuhaiin a chengna bungalow-ah an van hmupui thei a. Hmarkhawlien khawsunga silai chelekna leia nu le nau thlabara an um thu a ziekin an van tlun a. Hun dang thang danga hieng ang inthatna hi a tlung nawk ta nawna dingin venghimtu pawl huntawk (adequate security) khawsungah hung sie dingin an ngen bawk a. Venghimtu pawl inkulna nghet (permanent security base) Hmarkhawlien laillina laiah hung inthut dingin sorkar thuneituhai kuomah ngenna an siem bawk a. Hieng hai baka helpawlhai chetna khawsunga a tlung chu an dem thu le an thlawp naw zie an hril a. Hmatiengah hieng ang thil um nawk ta ngai lo dingin ngenna an siem bawk a nih.


Mipui lamhrawna nei a ni sungin buoina dang a suok hriet a ni naw a. Police haiin hma an thuoi a. Lamhraw tan a ni ding hin Upa R. Hnethanga, President, Hmarkhawien Village Council in Pathien kuoma tawngtaina hun a hmang a. Asapalli English School, Union High School, PMS School, Edith Douglas English High School le school danga inthawk school naupanghai khawma hung zawm veiin Hmarkhawlien le a sevel khaw dang danga inthawka hung thang khawm an um bawk. Publice Procession-ah thang mipui hi thlur hnia inthein lam kher khan an hluo a. Lakhipur anthawka an hung kir tieng hin Diger hung hraw ta lovin Mukam an hung hraw ta lem a. Mipui intanna hmun By-pass Junction-ah bawk pungkhawmin tawngtaina leh hun suk tawp a nih. (Input: THT)

Don't Miss
© all rights reserved
made with by Simon L Infimate