Responsive Ad Slot

Zawlbûk FC leh țhangruol ha'n Home 4 (Pali) hai kanin Krismas thilpek an inhlan

Sunday, December 17, 2017

/ Published by VIRTHLI
CCPUR: Dec. 17, 2017 Pathienni zantieng khan Churachandpur khawpui sunga um Home 4 (Pali) hieng- The Salvation Army, Motherless Babies Home, Muolvaiphei; Sangga Muon Inn, Bijang; Only Grace, ZMA Road, Vengnuam, New Lamka le Happiness Home, Pangjol hai chu Krismas thilpek (Christmas Gift) inhlanna Zawlbûk Football Club leh hieng ang thil a inhnikna nei țhangruol ha'n an nei. Hieng an thilpek inhlan hai lai hin taksa inthuomna thuomhnaw chi tum tum, Bufai le Fakthei chi tum tum hai a țhang. Hi leh inzawm hin tulai hnai, Dec. 4-8 & 13, 2017 khan Zawlbûk FC chun (5-a-side soccer) Futsal Fest 2017 "In Aid of Orphans" ti chu HSA Campus, Rengkai, CCPur ah an huoihawt a, team/club 43 lai zet an suok a, hi event sponsortu, hi huna mani talent hlasak le lam mawi tak tak suklangtu, a hmun a entu mipui le inhnikna nei, mi țhahnemngai hai thawlawm le thawkhawm sumfai le thuomhnaw haia inthawk hieng home 4 hai kanna ding hi buotsaia hung um thei, kan le Krismas thilpek hai inhlan thei a hung um a nih. Hi lei hin Zawlbûk FC khawmin an lawmthu hrilna huna chun anni khat chau i thaw a ninaw a, ei renga ei țhangtlangna lei a nih tiin an hril a nih. Hi Krismas thilpek an inhlan hun haia hin hun hmang peiin, Khawvel ah nu le pa nei talo angin inngai naw unla, keini in nu le pa kan um a nih, tiin an thei ang angin an hnem pei bakah Football pet el chau chu an thiltum ngawr ngawr a ninaw thu hai hrilin Home hai tadinga țawngțai pekna an nei pei a nih. Home hai khawmin hun hmang vein hieng ang thilpek an dawngna thu ah lawmthu an hril tawl. Hieng home hai hi Sawrkar amani NGO besan neilo, mi țhahnemngai haiin Pathien ringsan le rawngbawlnaa ngaia an indin le enkawl dam an nih tawl a, fahra (Orphan) le Aids natna invawi le naupanghai (People living with Aids) hai enkawlna dam an nih.


Zawlbûk FC hi 2016 a kha indin (Established) niin Orphan Home le Old Age Home hai kanin 2016 khawm khan Christmas thilpek an lo inhlan tah hlak a nih. Tukum 2017 khawm hin an thupui 'Jehova Jire, Lalpa'n ngaituong a tih' ti țhangsanin hiengang a inhnikna nei hai leh țhangruolin an thaw zawm nawk a nih. Tuhin Zawlbûk FC hi CDSA hnuoiah 2nd Division a khel lai le NYK Affiliated Club niin Rengkai khuo besan club pakhat an nih. Anni hin Environment humhalin, sawrkar ni pawimaw inserin Van Mahotsav (Thingphun hnatlang), Cleanliness Day (Gandhi Jayanti), Quami Ekta Week (National Integretion Week) hai inserin, Legal Services hai leh țhangruolin Legal Awareness dam huoihawtin le SSC Exam pe nuom hai ta ding khawma Coaching Class hai dam an buotsai ta hlak bakah Blood Donation hai dam khawm an lo thaw/huoihawt ta hlak a nih. Football inkhel chau niloin ram le hnam, khawtlang le mipui ta dinga sin țha thaw chu an thiltum tak a nih. Tukum le tulai hnai el khawm khan International Human Rights Day an inser a nih. Hieng hai lo khawm activities neu neu an nei bawk.

Don't Miss
© all rights reserved
made with by Simon L Infimate