Muolhoi, December 05, 2017, Virthli (ONP): Muolhoi Val-Upa huoihawtna hnuoia vawisun December ni 5 sun le zan in Muolhoi ah Sikpui hmang a nih.
Hi huna hin Sikpui Pa in Upa L Chawngtho Hmar, Chief Guest in Pu Eldad L Faihriem, ACS, Guests of Honour in Pu Manthang Parate, BDO le Tv. David Keivom, President NCHISF, Functional President in Pu Lalthlirlien Darngawn, AFS hai hmang an nih.
Thupui in "Tlawmngaina le Inpumkhatna" ti hmang a ni a, dawr le sumdawngna hmun hai, school le office hai popo khawm khar vawng a nih.
Sun huna hin Chief Guest Pu Eldad Faihriem, ACS in Sikpui Puonzar keipharna a nei a, thucha tawi a hril thenkhat hai chu;
1. Ei lim darthlalanga an lang dan: Muolkhawpui a hin mi ei tam tak vei leh mipui ei tlawm. Baksam tamtak ei nei zie vawisun hin mipui a hin hmuthei a nih. Sun programme hi uksak loin, zan programme chau ei uksak khawm hi ei inthang ruol naw zie suklangtu a nih.
2. Thanglak nasa a tul: Sawrkar sin hmutu nekin a pension ei tam lem tah. Ei fakzawngna kawng sengah hma ei lak nasa a ngai an tah.
3. Politics: Mi laia um ei ni leiin inthuruola thang lak a ngai.
4. Hnam dang laia diplomacy: Hnam dang hai le inpawl a tul. An naw chun mi chanchin ei hriet ngai nawh. Hi hin ei hnam sungril le bedroom a chen thuoilut ding tina chu ani nawh.
5. Pathien hi iengkim thaw thei a nih: Mi ei lo tluknaw khawma ei tluk theina chu Pathien hi a nih. Pathien ti dekin thang la thar ei tiu. Sikpui Ruoi damzing raw seh !!!!
Guest of Honour Pu Manthang Thuhriltawi
1. Tlawmngaina : Tlawmngaina ti thumal tak hi tawng dang a hin hriet ding a um nawh. Tlawmngaina hi Pathien thilpek, ei hnam ro dinga a mi pek a nih.
Tlawmngaina nei ding chun inngaitlawmna nei phawt a ngai. Thuhnuoirawlna le inngaitlawmna ei nei naw chun insung, khuosung, Kohran le hnam ah tlawmngaina a um thei nawh.
Ei khuosung a khawm hin Pawl ei tam. Hi intanna chu inngaitlawmna ei nei naw lei a nih. A tlawmbik um inla chu hi zat zat denomination um dingin ring a um nawh. Hi hin inthena le inthuruolnawna a rasuok a nih.
2. Hnam inpumkhatna Tuisuorieta tui inpumkhat anga ei hnam ei inpumkhat na ding chun thuawitak le inngaitlawm taka thutha hrila um hi a taka ei zawm a ngai a nih.
Tlawmngaina le Inpumkhatna hi saptawng takin, Need of the Hour ( tuta darkara ei mamaw) a nih. Hmar hnam dam zing raw seh
Thuhril tawi Sikpui Pa:
SIKPUI THUCHA
Sikpui thiltum: tak chu ei reng a inthuruol taka thilthaw tlang.
Sikpui chanchin thenkhat:
Sikpui hla a inthawka ei sut chun Sikpui hi ei pi le puhan Shan a an um laia intan ni dingin ring a um.
Sikpui hi a tlawm taka ni 7-15 an lam hlak.
Khuosungah mithi le uiretna suol khuosungah a lo um chun Sikpui lam hi an tawp san el hlak.
Sikpui lam hi chi 8 a um.
Sikpui Ruoi an hmang lai hin Zu an in buong hlak a nih. Pi le Pu hai chun an tu le te hai ta dingin zu an lo siem hlak.
Hi ni hin khuosung a pachawng le hausa haiin, an rel puon hai kei suokin mi harsa le rethei hai an inthuom hlak. Hi hin tlawmngaina le inpumkhatna an entir a nih.
Ei hnam a inpumkhatna ei neina chu ei hnam organisation hai hi a nih.
Sikpui hla a, "....sunah sumin zanah meiin..." ti hi an lo ziek suol a nih !! (An dik tak chu tiin a sak suok)
Manipura Sikpui ei lam nuhnungnatak chu, Leisen khuo, 1900 a nih.
Tuolpui khuo -1954.
Dawiheng khuo 1950.
Hmar khuoa Sikpui Lam ei thaw tawpna tak chu Khawhmunlien khuo 1958 a nih.
Sikpui Ruoi dam zing raw seh !
Thuhril tawi Tv David Keivom:
I kut le ke khuop ani si nawh, Invet thi'n I thi ding maw??
1. Thangthar hai hi ei kut le ke khuop ani naw leiin thang la thar ei tiu. Mi thaw ang ei thaw thei tho a nih. Sawrkar sin tieng khawm nisien, thang lang ei tiu. Council chau ani nawh, sin dang zawngna ding a tam.
2. Hmar hnam hi hma ei sawn hle. MSDP le a dang danga khawm en ro. Khuotin deuthaw ahin sin ei thaw ding a nih.
3. Sin ei thaw hma hin (a taka hmu ding um lo) ei lo hril rak rak hlak hi ei thaw suol rawp hlak a nih.
4. Mi phak a inhrietnaw ani chun, insukhrat rawh. I thil thaw thei kha mi dangin an thaw ve thei naw ani ti hre ro. I thilthiem a khan hma la la, mi hnung hnawt bik nawng ei tih.
5. Competitiveness neiin Competitive Exam hai hi bei tan dingin Free Coaching khawm thalai hai peng ei tiu.
Hmar hnam dam zing raw se
Thuhril tawi Functional President:
Sikpui Ruoi hi hlutsakin, ngai pawimawng ei tiu.
Sikpui Ruoi hi State Level a khawm Holiday ani theina dingin inthuruol ei tiu. Sum le puon a lo ngai ani chun inthuruolin ei ngaituo el ding a nih.
Sikpui Ruoi dam zing raw seh
Thuhril tawi Upa(Dr) V.L.Tluonga Bapui:
Tlawmngaina :
Mani inpek tawpna, hmasiel naw na,etc. Seltaka thaw hram hram, Mani inhnawl a mi ta dinga thaw. Tlawm lema um nuom lo, mi I hnea um lo. Midang suk lawm tum leia thil thaw.
Hmangna le hmangna hmun:
Hnampui hin an tawngin tlawmngaina ti hi an nei nawh. Ei thlatu hai hi mani a ro inrel hlak anih. Thina, sawmdawlna, thu thakna kawngah hmang ani hlaka. Nk le tlangval haiin mani inpe tawpin mi harsatna hmunah hma an lak hlak. Mani inhnawl a mi va thang pui hi tlawmngaina anih. In phalam, insiehnuoi, etc. hai hi tlawmngaina a ni phak nawh. Sahuoi/ sahrang beina kawngah an in thlatlam ngai nawh. Mani ruol, chi le kuonghai an tlansan ngai nawh. Lo hma an neina kawngah. A hmasa taka sin thaw a, fakna kawnga a tawptak inchu hi tlawmngaina an lo hmanghlak a nih.
Sikpui Ruoi le Tlawmngaina hi an mat tlat a nih. Tulai chu, mani tanghma ngaipawimawna hi a lien ta khawp el. Hi hi tlawmngaina dodaltu anih. Ei hnam zie tlawmngaina hi hnamdang hai thaw dingin beisei nawng ei tiu.
Inpumkhatna : Inthuruolna, inhmangaina, thu inhmuna, etc. Mi ngaidan zawm le ngaithiem chin nei hi inpumkhatna sirbi pakhat anih. Mani ngaidan ei chel tlut chun insung, khuosung, kohran le hnam ah inthena antlun hlak. Chuleiin, inpumkhatna daltu mani thuditna hi pei ei tiu. Hnam ei ni na anga hma ei fepei ding chun Tlawmngaina le Inpumkhatna hi an kawptlat a ngai anih. Hmar hnam dam zing raw se
Vengbuk tin Sikpui lam inruolsiekna nei a ni baka malzai inruolsiekna nei a ni a, pasal hai TAK AN LAKNA GYM member haiin an taksa thatzie hai mipui an inentir.
Zan hun hi praise and worship hun a hmang a ni a, Val-Upa lo fam tah hai po po inzana Memento inhlan an nih. Pathienthu hril tawi Pro. Pastor James Lalremthang Tuolor in a nei a, thu le hla a inpawltlangna hun nei a nih. RPC Choir, HSA Choir, PYF Choir, EFCI Presbytery Choir, ICI Presbytery Choir le Alabaster Band haiin Pathien an inpak el khela Mimal hlasak thiem tak tak haiin Pathien chawimawina hla le hnam hla haiin mipui an inawi. Muolhoi Sikpui MR & MISS Val-Upa haiin thlangna an neina a chun Tv. Lawra le Nk. Lalrawngbawl hai chu MR & MISS SIKPUI dingin an thlangsuok. Anni hi Tlangval le Nunghak tlawmngai bik an nih.
