~ Jami Darngawn
Columnist, Virthli (ONP)

✍ Awleh, Lalpa mi țhuoina zarin kum 2017 chu ei lo hmang zo nawk der ta ding an tah a, kum 2017 hi ka ta ding chun kum inchik tlak a ni nghe nghe. Taksa le thlarau ah malsawmna tam tak ka dawng lai zingin ka pasal a'n siengna kan Nu dittakin chatuon ram a mi'n lawisan kum a ni leiin kan ta ding chun kum inchik tlak a ni tak zet a nih.

2017 hi kum 40 ka tling kum a ni bawk, Bible in dam kum dinga a mi hril pek ang ka dam ding khawm lo nisien ka hun chenna/tamlem chu ka hmang zo ta bawk a nih. Chun, Lalpa'n ka thei ang anga a mi hmang vena chu kum 10 a tlingna a lo ni ta bawk. Kum 2017 hi ka ta ding chun ngainat um le inchik tlak a nih.


Awleh, Kum thar ditum tak ei hma hung pieng ding hi iengti'n am ei lo tûng aw? Mani senga ei um dan ding le ei khawsak dan ding chu ei lo buoipui/relfel tawl tah ka ring. Kohran tin khawma kum thupui ei nei seng ta bawk. Kei ve bawk khawm kum thupui ding Lalpa'n a mi pek ve chu "Lampui dang/Lampui thar" ti a nih.

Christmas lai khan thu thar tam tak ei dawng tawl ka ring a, Lal lsu hung pieng champha ei lawm/hmang lai khan Berampu hai le khawsak Mivar hai chanchin ei ngaithlak/tiem nasa tawl hle bawk ei tih. Chu taka chun kei khawm khawsak Mivar hai a'nthawk khan Lalpa'n kum thar thupui ding a mi pek ve a nih.

Kum thar thupui i lo nei tasa khawm nisien Lalpa'n a mi pek ve hi Ama ropuina dingin hung suklang ei tih.

Khawsak Mivar hai khan Naute pieng en dinga an hung khan an thaw țhat laizingin lampuia khan an lut nawna ding ah an lut a an rawn naw ding tak Herod an rawn leiin naupang kum 2 hnuoitieng ha'n an hringna an chan pha/an thi pha tawl ang khan, kei khawm 2017 sung a ka um dan popo rawn lo ding le lut lona ding ah ka lo lut/rawn leia ei Pa Vana mi lungril ka lo suk natna popo Lalpa'n mi ngaidam mawl sien ti chu ka țawngțaina a nih. Chun, tiemtu ditum tak nang khawm i thlarau ka lo suk chau/suk natna a um chun lunginsiet takin mi ngaidam dingin ka ngen nghal che.

Khawsak Mivar ha'n Naute enna dingin an thil hlu tak tak hai an pek zo chun Pathien chu an mang ah hung inlarin an fena pangngai a kir nawk ta lo dingin a hril leiin anni khawm chun Pathien thu ang takin an um a nih.
Matthai 2:
12. Chun Herod kuoma kîr nawk lo dingin an mangah Pathien hrila an um leiin, lampui dangah an khuo tieng an kîr ta a.

Khawsak Mivar hai anga ei khawpui tak tak Van Jerusalem thar ei tlung hma khat chu Emmanuel ei kuoma Pathien um zing le intlawn peiin ei damlai nihai hi khal/hmang thiem ei tiu, ti chu ei hriet tasa khawm nisien Lalpa ropuina dingin ei hung in fiel thar a nih. Pathien Thlarauvin iengtik lai khawm a mi umpui zing leiin ei vangnei bek bek a nih.

Kum thar ditum tak ei lo tûng mek hi Lalpa Thlarau Thienghlim leh hmang thei seng dingin ka ditsakna insang tak ka'n hlan che/cheu.

Post a Comment

Powered by Blogger.