Hmarkhawlien, December 06, 2017, Virthli (ONP): Jehovah Jire hmalaknain Sikpui Ruoi 2017 chu Hmarkhawlien Community Hall ah zani (Dec.05, 2017) zantieng dar 5: 30 khan dangdai taka hmang a nih. Hmarkhawlien khawsunga Sikpui Ruoi hmang dinga inbuotsaina hi chawp le chila programme induong ni sien khawm programme hi a hlawtling thawkhata ngai a ni a. Zan dar 11:30 chen Sikpui Ruoi programme hi phusui taka hmang a nih.

Pu Lalthavel Changsan le Nk. Nancy Ngamsangmawi haiin programme hnesaw takin an keihruoi a. Hun hawngnain “Aw Lalpa I malsawmna Hlu” ti le “A mi thuoipei malsawmna hlu’n” ti hlahai hmanga mipui hla- sakna nei a ni a. Pastor Zahninglo in Invocation hun hmangin VC Hmarkhawlien anthawk Welcome Address ngaithlak a ni a. Pu Gideon Lalthomlien in Bible Quiz huoihawtin Pastor Lalzarlien in lawmman a huoi rawntak a. A rawngbawlan AGEI Kohran ta dingin sumfai cheng sangkhat a hawn pha a. Mimal nuom ta phawt ta dinga Testimony hrilna hun hawng a ni a. Mi 3 laiin an testimony an hril a nih.


Kum danga Sikpui Ruoi hmang a lo ni dan ang naw takin tukuma Sikpui Ruoi hi Pathien thu hrilnahai ngaithlak a ni a. Hmarkhawlien khawsunga kohran 16 anthawk rawngbawltuhaiin Gospel Short Speech an pek a. Tuolsung hlasakthiem mi 14 lai chanvo pek ni hai sien khawm mi 10 velin an chanvo an thlak thei a. Hlasakthiem inlar thar Nk. Justin Ngursailovi, Tv Laldawnglien, Nk. Lily Lalparmawi le Tv Joseph Laldawmlien hai performance chun mipui a suklawm hle. RPC Choir hai khawmin hlapawl an rem ve a. Band kumhlun Ebenezar Vocal Band hai khawmin Pathien hla sakin mipui an in awi ve.

Ruoi hi zan dar 9 anthawk kil tan a ni a. Hme ding sa buotsai a ni laiin a fakpui ding bu siem sa a ni naw a. Organiser aiawa tawng Pu Gideon Lalthomlien in bu siem sa a ni nawna san a hrilna chun Sikpui Ruoi-a sa hi Krista le ngei fa inla ti nuomna lei a nih tiin a hril.

Sikpui Ruoi programme hmang a ni zing lai hin Sa emhmin sa (Barbecue) hi mipui pungkhawm hai lai Ushers ruota um haiin an sem a. Arsa, Ngasa le Vawksa emhmin sa hmanga ruoi hi the a ni a. A buka faktlangna um lovin mani remchang ang peia sa hi fak el a nih.

Sa emhmintu dinga tucha ruota um hai hi an inpekzo hle a. Mi a za tel fak ding meiai hmangin an emhmin vawng a nih. Sa emhmin sa fa leia phing infuk naw le a thawhla ni awma inlang hmu le hriet a ni naw a. Hmarkhawlien khawsunga programme hmang ta po ding chu venghimtu (security) um lova programme hi induong a ni a. Pu Gideon Lalthomlien in mipuihai kuoma security ruot a ninaw thu hrilin anni aiah Isu Krista chu venghimtu dinga a nih a tih.



Post a Comment

Powered by Blogger.