Responsive Ad Slot

Vice President, EFCI in 1.50 Crore a bawl, Rengkai khuo a EFCI Biekin pathumna ding a hawng

Saturday, November 18, 2017

/ Published by VIRTHLI
CCPUR, November 18, 2017, Virthli (ONP): Nov. 18, 2017 chawhma dar 11:00 AM khan Rev. Lalbiektluong, Vice President, Evangelical Free Church of India (EFCI), General Headquarters, Shillong chun Sept. 29, 2014 a bawl tan a lo um tah, Rengkai khuo a EFCI Biekin, Muolhlum veng a mi chu Pathien ropuina dingin hawngna le inhlanna a nei. Hi huna hin Kohran thuoitu le member hai fekhawmin hun hmang a nih.


EFCI Rengkai hi EFCI kohran umna khuo hai laia chun kohran member tam pawl tak niin tuta hawng thar a um biekin hi Rengkai khuo a ding chun EFCI kohran in Biekin pathum an neina ding a ni tah bawk. Biekin hi a size chu a dung 112' x a khang 62' (feet) a lien le tuchen ah EFCI kohran sunga biekin la lien pawl tak nia hril a nih. Hi biekin hawng thar a um hi Rengkai Playground, Muolhlum sir el a um a nih a, a dang hai chu Rengkai khuo a Thailane veng le Shan veng a um an nih tawl. Pathien malsawmna an dawnga member an pung pei leia biekin thar hi bawl a um a nih.

Hi biekin thar hawng a um hi a design khawm a mawi hle a, inkhawmna a hmang ni sienkhawm zofel vawng a la ni naw a, a hmatiem a la siem sunzawm pei ni dingin thu ei dawng. Zofel vawng hnunga sengso dinga riruong chu Indian Rupees 1 Crore.50 Lakhs vel a nih a. Tuchen a hin INR 120,25,000.00 (Lakh Za le Sawmhni Singhni Sangnga) vel seng ni tah a hril a nih. June 3, 1972 a kha (L) Dr. Rochunga Pudaite in EFCI kohran hi a lo indin (Established) tan tah a nih.
Don't Miss
© all rights reserved
made with by Simon L Infimate