Shillong, November 12, 2017, Virthli (ONP): Meghalaya a Hmarnau chenghai chun zani (11th November, 2017) khan HSA Joint Headquarters, Shillong kum 60 (Diamond Jubilee) lawmna chu U SoSo Tham Auditorium (State Central Library) ah ropui taka hmang a nih. Hi huna hin Rev. Dr. J. Huoplien Neitham, Moderator, EFCI le Adviser HSA Shillong & HSA GHQ chu Jubilee Pa a hmang a ni a, Chief Guest in Pu L. Rothanglien Khawbung, President HSA GHQ hmang a nih. Guests of Honour in Prof. Vanlalnghak, Pu Thanghlun Hmar, IRS, Pu Darzakhum Songate, IRS le Dr. Jemino Mawthoh, MLA, Nongthymai Constituency hai hmang an ni a, Special Guests in Pu Lalhrillien, EM, ADCC le Pu Latiplang Kharkongor, EM, KHADC. Anni hai bak a hin HSA General Headquarters thuoitu le HSA Guwahati thuoitu iemanizat in an hung uop bawk a nih.


Hun hmasa tieng mipui hlasakna hai nei ani a, HSA Diamond Jubilee Choir le EFCI Central Choir haia inthawkin hla mawi tak tak el ngaithlak a nih. Mipui pungkhawm hai lawmlutna hun, Meritorious Awards le thuoitu hlui hai chawimawina hun Tv. Ezra Darngawn, Gen. Secy,. HSA Shillong in a hmanga. Rev. Fimliensang keihruoina in thuoitu fam lo chang tah hai sunna hun hmang a nih.

Jubilee Pa in HSA Flag keipharna a nei zovin Shillong HSA, Hmar Inpui Meghalaya Region, HYA, Val-Upa le HSA GHQ thuoitu han Jubilee Dar vuokna an nei zo in Rev. Lalbiektluong, Vice President, EFCI in Jubilee lawmthu hrilna Pathien kuoma tawngtaina a nei.

Jubilee Pa le Chief haiin HSA Shillong chanchin tawi, an lo thuoidan le inhmang ve dan hai an hrila. Shillong khawpui hi abiktakin Hmar hai ta ding chun inchukna hmunpui pakhat a ni a, HSA Shillong khawm hrattaka a fe pei a paimaw thu hai an hril. HSA le hnam suk hmasawntu ni dingin inchuklai hai thang lak nasak a tulzie hai an hril.

Prof. Vanlalnghak, Guest of Honour in hlawtlingna thuruk pathum-  Pathien nghatsan lo ding, Goal feltak nei le hun hmang thiem ti hai thupui hmangin a hrila, Pu Thanghlun Hmar, IRS, Guest of Honour in hun thethawp thiem, a hun taka Social, Kohran le lekha tiem/inchukna-ah hun hmang thiem a pawimawzie hai a hril.

Pu Lalhrillien, Special Guest in thuhrilna neiin, Shillong hmuna social event a hai Kohran thuoitu han an uop hlak chu inpakum a ti thu le sunzawm pei dingin a nuom thu a hril a, Diamond Jubilee chen tlung thei dinga Pathien in Shillong HSA a thuoi chu lawmum a ti thu le thuoitu hai popo inzana a pek thu a hril. Kum 60 chen tlung thei ta chun mengte upa mei mei ang ni pal inlau a um thu a hril bakah hmun dang danga Hmar hai ei ngirhum hai hrilin ei hmabak hai chu inchuklai han an phursuok theina dingin thang nasataka lak a tul thu a hrilsa bawk.

Chief Guest in inthuruolna thar, inunauna thar le tha thona thar intluntu ni ngei dingin Jubilee Lung hawngna a neia, Diamond Jubilee Souvenir Magazine chu Pu Rohminglien, IFS, Adviser, HSA Shillong & HSA GHQ le Consultant, Diamond Jubilee Organising Committee in tlangzarna a nei zoin mipui lai zawr a nih.

Hi huna hin Meghalaya sunga HSA le hnam ta dinga mi tangkai chawimawithlak mi pahni- Rev. Dr. J. Huoplien Neitham le Pu Tana Darngawn hai kuoma Lifetime Achievement Award inhlan a ni bawk a nih. Hun karlaka hai HSA Cultural Troupe hai anthawk hnam lam mawi tak tak el en ani bakah artiste hai anthawk hla ngaithlak a nih.

Hi huna hin HSA Shillong Diamond Jubilee Lucky Draw Results pawtna nei a ni a, hieng Serial Nos. hai hi a mantu an nih:
1st Prize: 1362, 2nd Prize: 1721, 3rd Prize: 4005, Consolation: 4130,783 3, 4610, 1651, 5047.

Hunkhatna zo ani hnungin Jubilee Musical Session tan ani a, zan dar 9 chen nei niin, hi huna hin Nk. Lorinda Varte, Tv. Vincent Hekte Hmar, Sinlung Express, Kanghling Father, Nk. Deborah Lalnunthieng le local artiste iemanizat hai in mipui an inawia an lam dup dup.

Tuihnai tak el Jubilee Ruoi the a nih. Mipui pungkhawm hi an thahnem hlea, iengkhawm buoina um lova hun hmang zo a nih.




Thlalak dang hai a link a hin en thei a nih: https://www.facebook.com/media/set/?set=a.10155718495827332.1073741912.512217331&type=3

Post a Comment

Powered by Blogger.