Rengkai, November 15, 2017, Virthli (ONP): HSA Rayburn College chun November 14, 2017 dar 11:30 AM khan Freshers’ Meet VTI Auditorium, Rengkai, Muolhlum ah puithu takin an hmang. Hun hmasa tieng mipui in ‘Hmatieng pan zai rel rawh’ ti hla sakna an nei . Hun hmangna hi Moses Khawbung le Nk. Hannah F. Tusing han an keihruoia, hun hawng tawngtaina Rev. Lungawiruol in a nei a, lawmlutna thucha George Lalzarlien, President, HSA Rayburn College Unit in hrilna hun a hmang.
Hi huna hin Chief guest in Pu Laldawnlien Varte, Gen. President, HYA GHQ a thang a, Guest of Honour in Pu Robul Pudaite, AGS, HSA GHQ a thang a, Functional President in Pu Gospel Hrangchal, President, HSA CCpur JHQ a thang.
Chief Guest in thu a hrilna a chun ei hnam sungah organisation hrang hrang um sien khawm, a hun le hmun izirin, a tul ang peiin a mi keihruoitu organisation ah va um hlak ei tiu a , lungril khawlbing le inlakhranna hai pei hmangin hma tieng pan zai rel ei tiu tiin a hril a. Student hai chu certificate holder chau ni tum lo a educated ni tum seng dingin an fui a, pass ding chaua inchuk loin, hrietna le varna inchuk dawk tum seng dingin an fui a. Lekha thiem ni ding chun mani subject va hriet rawn el bakah an lekha inchuk a inthawk thil dang ngaituosuok theina le, a tha le thanaw thlir hran thei mi ni tum seng ei tiu tiin a hril a. A hril peina a chun hlawtlingna chu zan khat, nikhat a chang el thei an naw thu, nitina an sin thaw tlawm te te hai intlingkhawm hin hlawtlingna an changtir lem ding thu hai a hril. Guest of Honour in thuhrilna a nei huna chun student hai chu thuoitu hmasa hai inza thiem dingin an fui a, student an ni sung foundation tha tak el rem tum seng dingin an fui a, an lekha inchukna a hai a bul an tan tha a ni chun hma tienga an khawsak na ding peia hai kawl a la eng ding thu a hril a. Student hai chu social thilah a hun tawka inhmang hlak dingin an fui a, social thila eiin hmang hin sense of responsibility, organisation skill , team spirit le hun hmang thiem dan hai ami pek thu a hril a. Inchuklai hai chu taksa, thlarau le hrietna kawngah intuoithar hlak dingin an fui tawl. Functional President in thu a hril huna chun chawl lova hma tieng pan zai rel dingin le inchuklai hai chu an thil thawna a hai thaw dal lo a, thaw mei mei lo a, mi hai kep thei ding le hma thuoitu ni tum seng dingin a hril.
Freshers’ Meet hmang huna hin hmelthar mi 25 han inhmelhrietna le self introduction an nei a. Mr& Miss Freshers thlangna nei a ni a, Miss Freshers’ in Nk. Christina Lalrinpui thlang le Mr. Freshers’ in Tv. Joseph Lalmawizuol thlang a ni a. Best Costume in Nk. Zairemmawi thlang a ni bawk. Tukum Rayburn College a hin Freshers mi 50 lai an um a ,Freshers meet ni hin mi 25 an thang thei a nih. Freshers’ mi 25 hai tawngtaina pekna Upa Laldawnlien Varte, Gen. President, HYA GHQ in a nei a. Hi huna hin khuollien hai chawimawina thilpek HSA Rayburn . SSPP Rayburn Unit, Don Bosco HSA Unit, HSA CCpur Govt. College, HSA CCpur JHQ hai khawma thuhrilna hun hmang ve in thilpek inhlanna an nei tawl. Vote of Thanks Tv. Lalremsang Infimate, Secy., HSA Rayburn Unit hrilna hun a hmang bawk.
Hi huna hin Nk. Christina Shakum (HSA Paltinum Star , Manipur Idol 1st Runner-up) Tv. Elvis Rochuoilo (Rimawi 2017 ) , Grace Lalramchuani Thiek (Project Vocal, 1st Runner-up) le Tv. Immanuel Lalhrietzing han hla mawi tak tak sakin mipui fekhawm hai an inawi a. Program hmang zo hin Ruoi inhnik takel kiltlang a nih.
