New Delhi, November 12, 2017, Virthli (ONP): Zani (November 11, 2017) chawhnung khan Delhi Hmar Welfare Association huoihawtna hnuoiah Delhi khawpui le sevela Hmar tawng hmanghaiin Dr. S.R. Auditorium, Delhi Cantt.-ah Favâng Kût an hmang. Hi Favâng Kût a hin Kût Pa in Pu Lalthlamuong Keivom  a thang a. Kût hawngna a nei zovin Zohnatlak haiin kût an lo hmang hlak dan hai a hril. Hi huna hin Pu Vanlallien Pulamte chuh special guest a thangin, Pathienin hnam rawng bawl dinga a ko dan hai le hnam tadinga a hmalakna chi hrang hrang hai a hril bawk. Hi huna thuhriltu dang Pu Zarzolien Keivom in Hmar hnam mamaw ni a hriet hai a hril bawk.

Favâng Kût hmang zo ta a hin kum 2017 – 2019 sunga Delhi Hmar Welfare Association thuoitu dinghai thlangna nei a nih. Chairman dingin Pu Darsuothang, Secretary dingin Pu Lalhmingthang Songate, Committee Member dingin Pu Lalthuoisuok Pudaite, Pu Romeo Hmar, Pu James Pusing, Tv. Robert Zarzolien hai thlang an ni a. Vul-upa dingin Pu Robert Penatu, Tv. Gordon Amo le Pu Lalkhawnvar hai le Nghak-upa dingin Nk. Chingbawi Buhril, Nk. Dardingpui Infimate le Nk. Elish Vanrammawi hai thlang an nih.


Hi huna hin kum 2017 sunga Delhi khawpuia damnawna leia thisen mamaw hai kuoma petu mi 58 hai chawimawina hun hmang a ni a. Chawimawina thilpek inhlan seng an bawk.

Favâng Kût a hin ruoi inhnik tak el fe khawmhaiin an kil tlang a. Hlasakthiem haiin Hmar hla mawi tak tak hai sakin fekhawmhai an in-awi bawk. Hi baka hin, Hmar nunghak le tlangval haiin Hmar hnam thuom suklangna (fashion show) hmu nuom um tak el an nei a. Mipui lawm a hlaw hle. Hmar Students Association Delhi Cultural Troupe haiin fahrel tawk lam inentirna an nei bawk a nih. Zan dar 9 chen hmang a ni’n Pastor Lalsiesang Zote in hung khar tawngtaina neiin Favâng Kût hi suktawp a nih.

Post a Comment

Powered by Blogger.