Responsive Ad Slot

Asia Cup-a India Champion puitu Nk Lalremsiami chawimawina inhlan

Friday, November 10, 2017

/ Published by VIRTHLI
Aizawl,  10 Nov, 2017, Virthli (ONP): Hmar Students' Association, Joint Headquarters, Aizawl chun Ningani zan (9 Nov) khan November ni 5, 2017 (Pathienni) a Kakamigahara, Japan rama Asia Women's Hockey Championship, 2017 inkhel zao taka India champion puitu Nk Lalremsiami, tuta Kolasib College venga khawsa mek chu lawmpuina neiin chawimawina thilpek an hlan. Hi huna hin Nk Lalremsiami hi India ram bakah Zohnathlak abik takin Hmar nauhai a suk hmingthatna leiin lawmpuina le chawimawina inetirna'n Hmar Thangsuopuon insil tir a nih.

Kum 17 mi Nk Lalremsiami hi Pu Lalthansang Zote le Pi Lalzarmawi hai nau 8 laia a naupang tieng anthawka a palina (4) niin, tuhin Kolasib College vengah sungkuoin an khawsa meka. Anni hi Cachar, Assam a Diglangmuk khuo suok an nih.


Nk Lalremsiami hi tuta Asia Women's Hockey Championship a khan India squad (player -18) lai, first eleven ah thangphak ngat niin striker thatak a nia, championship inkhel sung khan India ta dingin goal-2 (group stage le semi-final ah goal 1 ve ve) a thun nghe nghe a nih.

Ama hi tukum September thla khan Bangalore ah India women hockey team (junior) ah trial a nei mek laiin, senior player dingin thlang a nia, nikum December a  Under-18 Asia Women's Hockey Championship, Bangkok, Thailand-a nei tum khan India team hai 3rd position a lo ni pui ta bawk a nih.

Ningani khan Mizoram sawrkar chun chawimawina Aizawl-ah neiin hi huna hin Mizoram Sports Minister Pu Zodintluanga in tangka sumfai singli (40,000) an hlan a, hi baka hin India sawrkar khawmin cheng nuoikhat pek dingin a lo puong ta bawk a nih.

Nk Lalremsiami hi vawisun (November 10) hin Kolasib khawtlang/ khawpui huopin ropui taka lo hmuok tum a nia, hi huna hin chawimawina ropuitaka nei tum a nih.

Aizawl-a Nk Lalremsiami chawimawina inkhawm hi HSA, Jt. Hqrs, Aizawl a Finance Secretary Tv Jerry H Pulamte in a keihruoia, Vice President Tv Henry L Khojol in lawmpuina le infuina thucha hrilin, General Secretary Pu PK Gangte in tawngtai pekna a nei bawk. Nk Lalremsiami hi a coach Pi Lalrampari Hmar, Mizoram Women Hokey team coach hmasatak ni bawkin a tawiawm a nih.

Ei hriet tah angin liemtah Pathienni khan India chun Asia Women's Hockey Championship, final match-ah a khingpui China chu penalty shoot out ah 5-4 a hne banin Championship nopui a lo dawm tah a. India in hratna a chang lei hin kum nawk (2018) a London a nei ding Women Hockey World Cup a dingin a qualify nghal a nih.



Don't Miss
© all rights reserved
made with by Simon L Infimate