Senvon, Oct. 5, 2017, Virthli (ONP): Tulai hin hriselna leh inzawmin CCPur town anthawka 260 KM vela hla a um, Senvon khawsung nu-le-pa, mipuiin an inpak, an uongpui le mipui suk tlamuongtu a hril chu um chila hospital siemtu New Life Trust (NGO) an nih. Dr. Boi le a thawk chanpui Nurse hai, Lalpienglom Pulamte, Kholi le Laldinpui Joute hai chu Senvon mipui chun an inpakin, an chung ah an lawm tak zet a. Doctor le Nurse hai hi appointment tak tak ni naw hai sienkhawm Senvon mipui hai chun a mi suk thlamuogtu an nih tiin umpui zing hai sien an nuom hle thu an hril. Chun, Doctor le Nurse hai khawma Senvon mipui hai chung ah an lawm tak zet thu an hril ve. Asanchu, fak le dawn chi dang dang le an thei ang anga an thangpui ve hlak lei a nih. Doctor le Nurse hai hi Senvon khawsung chau niloin an khaw sevel hai khawma an thangkai pui tak zet a, Doctor le Nurse hai hi an fel em em a, an sin reng nisienkhawm ka sawl, ka kham tiloin nitin mi 30-150 inkar damnaw (patient) an en hlak a nih. Pathienni (Sunday) ti lo chu an chawl naw a, damnaw admit khawm a'n khat tawkin an um zing hlak a nih. Sûn le zân in a tul ang anga an thawk leiin mipui chun an chunga hin an lawm em em a. Doctor le Nurse hai hin instrument kim tak nei naw hai sienkhawm an nei sun sun hai hmangin damnaw hai chu an enkawl hlak a nih.


Post a Comment

Powered by Blogger.