Senvon, Oct. 1, 2017 (Virthli ONP): Pherzawl District sunga um le 1910 a inthawka Manipur Sim-Thlanga Chanchintha mansapui in bangna tia hrietlar Senvon khuo a um, Senvon Govt. H/S a Proxy Teacher hai chun Resignation an pêk leiin vawisun school enkaitu SMDC le Village Authority haiin Proxy teacher hai an ko a. Meeting nei puiin khawtlang thuoitu ha'n la thawk zawm dingin Proxy teacher hai an ngen a. Khawtlang thuoituhai inzana le student hai hmakhuo ngaina leiin an resignation lakir a la thawk zawm dingin thu an sukthluk a. VA le SMDC haiin "Teacher post keini'n ZEO kuomah lo ngen kan tih" tiin proxy teacher hai an hnêm bawk niin chanchin ei dawng.


Proxy teacher hai hin May-Aug. 2017 thla hlaw khawm mumal takin an lak naw nia hril a nih. Headmaster khawm a kai ngai naw a, chun hi school a staff indik tak 12 laia mani aia mi tirlo a kai le regular taka kai umsun nia hril chu Grade-IV (Chowkidar) chau nia hril a nih. Hieng a ni lei hin Pherzawl Dist. sunga Students' Association um hai, Sawrkar le thuneitu ha'n an rang thei angin ngaivenin hma la hai sienla tha hleng a tih. Pherzawl District hi kawng iengkim ah baksam la hau em em el a ni leiin ZEO le DC hlak kawk an bo hle a, bieltu MLA le bieltu MDC in hma hung la vat thei hai sien thil tha ni dingin an lang. A ni dan tak a chun Proxy teacher hi sawrkar in a khap le remti lo a nia, sienkhawm a san le harsatna (factor) um leia proxy teacher hi Manipur tlangram a chun sawrkar school tam tak haiah hung um el tah nia hril a ni bawk. Chu umzie tak nia inlang chu kum tam liemtah a'nthawk thil indiklo a um lei ni ngei a nih.

Post a Comment

Powered by Blogger.