~Jami Darngawn

Entawn tlak Krista sipai țha Tirko Paula chun hienghin a lo inzawt a.

2Korinth 4:
16.Chuleichun kan bei a dawng naw a, kan puotieng mihriem hi awngrawp tieltiel sien khawm, kan sûng tieng mihriem chu ni tin siem tharin a um lem a nih.
 17. Kan rinumna nêptak, mitkhapkâr chova um ding hin, ropuina nasatak, kumkhuoa ding a mi siem pêk nasa deudeu a nih.

Tirko Paula țawngbau hai hin a mi va suk thlamuong/sukhrat thei ngei de aw!

Kei ve bawk khawm hin hang ti ve bawk ka tih ie.
Taksa awngrawp na ka nei laia pakhat chu Asthma natna hi a nih, thil dang chu Lalpa zarin insawisel na ding bek bek ka nei nawh ti thei a nih.

Awle, kum 5/6 vel liemtah a khan a min an hril Asthma hrivawi chu pitar/putar hai natna/chan ding deu anga  ka lo ngai hlak kha ka chunga khawm a hung tlung el chu ka va dit naw ngei de!! Khawvel doctor chu ka va pan ta ngeia doctor chun "Asthma i nei țan met met an tah" a mi ti chu ka nuomnaw taluoa ka awi nuomnaw ani deu tak, in ka tlung chu ka natna ka ditnaw taluoa ka țap nasa de aw ! He he.

Doctor nu damdawi min chawhai khawm ka ngei naw bawk le, Lalpa kuta innghat tawp el ka tih tiin ka um lem tah a. Vawikhat chu kan ruolhai mi pakhat chun mi ngaituo em ema hienghin a hrila "Jam! Asthma doctor țha deu ka hriet annawm ei ni mi pakhat khawm Asthma natna leia thi vang ta khawmin a dampui a nih va fepui ka che"  a ti lei chun ka dam chieng nuom lei chun "lawm um ie nirawse" tiin tuk khat chu kan va fe ta ngei a.

Kan doctor va pan pa chu kan inhmupui ta ngeia, chu doctor pa chun a mi hang en ta ngeia ka fak ding hai chu a mi ziek peka, ka dawn ding ruok chu a ma siem ngei damdawi tui a mi pek bawk. "Sukdam thei i la nih" a mi ti lei chun ka lawm hle. Amiruokchu a damdawi mi pek chu mak ka ti deu lei chun kan dawn ta nghe nghe.

Kei = Doctor hi damdawi tui hi khawlaia i lak am i mi hril thei ding?
Dr = Aw hrilthei ka che, keiin ka siem a nih.
Kei= Ani ngei chu tie, iengtin am damdawi chu i siemthiem el a, hi khuoizu ringawt a ni am ?
Dr= Aw khuoizu ani ngei anachu hi khuoizu a hin thil ka pawl a nih.
Kei = iengthil am i pawl, i mi hril thei ding ?
Dr= Kan pathien kuoma ka țawngțai a, a man ati hai chu ka pawl a nih.
Kei = I thil pawlhai chu hriet chak a um de?
Dr = Kha chen chen kha chu hril a thei ta naw a nih.
Kei = Ani ngei chu tie, keini Kristien hai Pathien / kan Pathien khawma mi a sukdam thei a nih.
Dr = Hi damdawi ka pek che hi i fak hmân i Pathien kuoma lo țawngțai rawh aw ?
Kei = Nimawl raw seh.

Chuongchun bur lien deu sip khuoizu chu chawin in tieng kan fe ta ngeia pharmacy a inchawk dinga a min chawhai chu kan inchawk bawka (In ka tlung hma lampui a chun ka lungril um an hawi naw khawp el a chu ienglekhawle In ka tlungpha lan ngaituo țhang ka tih ka ti reng a nih) ln ka tlung ka damdawi hai fak hma chun Lalpa Pathien kuoma ka țawngțai taha Lalpa Thlarau Thienghlim chun ka taksa popo a hung fangsuok taha țawngsuok thei lovin ka um tah Lalpa Thlarau chun "Ka thu zawma um pei am i nuom ? I taksa damna ding ngawt zawngin pathien danghai thuzawm/sukdam i nuom lem? " Ti an ta chu ! "Lalpa! pathien danghai sukdam nekin, nang a thuzawm ka nuom lem a nangin rem iti naw ti ka hrieta chuleichun hi damdawi hi fa nawng ka tih"  ka ti taha chuongchun ka hung har taha doctor pa chu ka call nghal tah a.

Kei = Doctor i damdawi mi pek hai kha kan Pathienin fak a phal nawh.
Dr= Aw tu nghal hin hung thak kir rawh.

Kan naupang hai ka tira chu Maiba pa damdawi chu Lalpa hratna ringsanin ka van thakkir tir theia ka lawm hle.

Kum khat vel liem hnungchun chu Maiba pa chun a mi hung call khiet a.

Kei = iem an ta le Pupu?
Dr= eh!  Ka hung call suol a nih.
Kei = Pupu kei chu kan Pathienin a mi sukdam tah.
Dr= Aw a țha chuh !
(A phone number ka delete chieng ie)

Awle, Tirko Paula'n alo ti ang deuin kei ve te khawm hin hienghin kan zawt ve hlak a nih. "Ka hnuoi taksa hi awngrawp tieltiel sienkhawm ka thlarau nun ruok chu A DAM A NIH"  Haleluiah Lalpa ei Pathien chu ropui tak raw seh.

Ka ruolnu Pathienin a hmang em em pakhat a uma, a kuoma chun ka Asthma natna hi a dam theina dingin mi țawngțai pek ta tiin vawi 2/3 chu kan țawngțai tir taha a dawnna chu "Lalpa'n i asthma natna hi a pek che a nih" a ti ve tlat hlak a nih.

Mihriemna taka chun hrietthiem an tak chang a um hlak, sienkhawm hi khawvel famkimlona ram, natna ram, lungngai beidawngna ram, țam na ram, thina ram a ni mawl si a maw ! Ei chungah iengang thil hung tlung hlak sienkhawm Lalpa Pathien a'nthawka hrietthiemna lungawina nei tum hram hram hlak hi a țhatak chu alo nih.

Tirko Paula bawkin;
2korinth 11:
30. Suong ding ka ni raurau chun, ka hrât nawna tieng thilhai hi a nih ka suong lem ding. Alo ti bawk a ;
Keikhawm inphalam um hle hlak sienkhawm, ka hratnawna hai, ka chansiet na hai, ka mi angnawna hai, ka awngrawpna hai hi suong lem tang ka tih.

Ka asthma natna a'nthawka kan chuk dawk hai chuh !!

1. Nitin, zantin, darkartin, inthuok theia ka um hi Lalpa Pathien kuoma lawmthu ka lo hril tawk nawziet kan hrietsuok a nih. Inthuok theia ei um leiin Lalpa kuoma lawmthu hril mawl mawl hlak ding ei lo nih ie.

2. Ei Pathien hin ei taksa damna ding nekin, ei thlarau damna ding hi a ngaipawimaw lem alo nih.

3. Ka taksa hrisela ka umlai nekin, ka taksa a awnprawp lai hun a hai hin Pathien ka hnai/hmupha lem hlak alo nih.

4. Khawvel doctor haiin an sukdam tak tak theilo hrivawi dit umlo hieng Asthma, Cancer, Aids etc. Natna hai nekin Eden natna hri invawi hi ți a um lem a nih.

5. Ka taksa dam le hrisel a ka uma, Lalpa ditnawzawng ka thaw nekin, ka taksa chau sa sa a Lalpa lawmzawng ka thaw hin inhawi ka ti lem.

6. Taksa asthma nekin, thlarau asthma invawi hi dit a um naw lem a nih.

7. Naki chu natna hai lungngaina hai um ta nawna hmun ah ka/ei la fe/um ding a nih ti hriezing pumin, ei hratlai eiin thuokthei sunghin Lalpa ei Pathien rawng ei theina zawn sengah țhahnemngai takin bawl seng ei tiu.

Ngate tlawmte le beiphek tlawmte sukpungtu ei Lalpa Pathien chun, hi thuziek tlawmtak hi athar takin mal mi sawm pek raw seh.

Post a Comment

Powered by Blogger.