~ Jami Darngawn
1 Samuel 15:
22.Chun Samuel chun:
“LALPA chun, Ama thu zawm chu a lawm angin pumrawhmang thil inhlânhai le inthawinahai hi a lawm am a nih?
Ngai ta, inthawi nêkin thuawi chu a țha lem a,
Berâmchal thau nêkin a thu pawm chu a țha lem a nih.
Ahmasan Lalpa thu keia hung tlung hai ka lo zawm ve na hai chu ziek/puong nawk thei dinga ka um leiin, hun țha le hriselna mi petu ei Lalpa chu inpakin um raw seh.
Awle, dt 18-10-2017 zingkhuo a hung vara ka buoi ve rak raka a san chu ka pate naunu pasal nei ding inthlana hunser chu zing tieng 8:30 AM a țan ding ani lei a nih. Chu huna chun farnu ka nina ang takin thlaisuonghai chu țhangpui theinaw langkhawm Biekin hunser hmangna a bek țhang ngei dinga an mi ditsakna ang chun țhang ngei ka tuma, kei lmphala inthawka Churachandpur pan ka ni lei chun nuom angin hun kha ka va nang ta naw leiin kan phalam hle.
Chuongchun inhnu deu hlek chun mo inthlana Biekin chu ka tlung tah a inphalam deu chun motora inthawka ka suok le inruol chun pasal pakhatin "jingkar bongnoi" ti malam chun a mi lo chibaia ka hamhai hle.
"Jingkar bongnoi" ti um zie chu "zingkar bawng nene" tina a nih. Hi thu hi ziek ka tumnaw vei leh ka chunga thuneitu Lalpa chun a ma ropuina dinga ziek/puong dinga a mi ti leiin Lalpa ropuina dingin ei hung suk lang ding a nih.
Dt 11-05-2008 ni kha mak takin Penticost Day le Mother's Day a lo inkawp hlau ela chu ni chun Biekin sunga ka um lai chun Lalpa'n a mi bieka "An in ah fe la maicham va siem rawh" ti a nih.
Ka nunghak/tleirawl ve lai chun mi pakhat hin fiemthu ang hin hla a mi lo sak khum hlaka, chu chu ka hming chawia a siem a ni nghe nghe.
Ka piengna ram, ka pu, ka pa, khuosatna ram hming khawm a țhangsa bawk, chu ka piengna kan khuo chu hnam khat le hnam khat buoi leiin, unau le unau indo lei chun kan chengna ram/khuo chu unau ha'n an mi raw pek tah a nih.
Kan khuo an raw hma deu chun kan in ah ka pate hai nupa le tlangval fel deu pakhat hi an hung hlaka, zingkar zatin kan bawngpui nene chu kan sawr hlak ana, chu bawng nene chu ka pate hai nupa le an ruolpa chun an hung dawn hlak a nih. (ip set set lovin hang hril el lang, ka pate chu sipaite ei ti hai laia hotulien ani nghe nghe, amiruokchu vangduoithlak takin kha țuma indona a khan ka pate chu alo boral tah a nih. Kha hun lai kha 1997 lai vel a nih.) Chuongchun indona kha a hung zuol pei leiin hmuntin ramtin ah kan ințhedar tawla kei khawm pasal hai neiin ka lo um tah a nih.
Chuongchun kum 10 vel liem hnungin vawikhat chu phone call ka dawnga, chu ka call dawng chu ka pate ruolpa kha a lo nih a, a ma chun hienghin a hrila "i pasal leh vawikhat chu kan in ah bu fa dingin ka hung fiel cheu" a hung tia, kei chun a rem thei naw ding thu ka hril nghal a nih.
Amiruokchu Biekin a ka um lai chun Lalpa Thlarau chun kha kan ruolpa hai in a fe a maicham va siema ka testimony hai va hril dinga a min hrietir ang chun inkhawm țin in ka pasal phalna la in ka fe tah a nih. (An ni khawm lmphal a um an nih)
Chuongchun an in ka tlung ta ngeia ka ruolpa le, a nuhmei le, a sanghai le a ruolhai mi iemanizat an lo uma an lo fel tawl hle "Maicham siema hung ka nih" ka tia hun ka nei nghala ka testimony hai ka hril lai chun ka ringnaw kar chun ka thuhril hai video in an lo laka, kei hlak chu ka thuhril kan hnik hle el a mittui le insawp rakin ka testimony hai chu ka va hril a nih. Ka fe ding tawm chun thla dam an mi lak puia chuongchun hlim takin kan in bye bye tah a nih.
Hun le ni hai a hung fe peia ka ruolpa chu hlasak mi ani leiin a hlaphuok hai chu album siem alo tum kha alo na, a album a khan ka nunghak/tleirawl laia ka hming chawia fiemthu ang deua hla a lo siem khawm chu alo in țhangsa tir kha alo na, chu hla a chun ka thlalak khawm tawite te alo zepsa nghe nghe bawka, chu chu mipui enthei dingin alo suk suok tah bawk a nih. Unau Thadou hai laia lem chun alo inthang/inlar ve ta khawp el a ring nekin.Tuchen hin kha hla lei khan a taka mi hmu naw hai khawma an mi hriet tawl ti thei a nih.
Chun, CCpur ZRS Cable a khawm hmun alo hluo ve bawk chu ni ding ana vawikhat chu ka pa (ka tarpu) chun hienghin a mi tia "Jami, CCpur Cable TV ah love song ah i hmel an lang nasa khawp el a a mawinaw a nih, nang Pathien thu hril hlak ina a thei chun i hmel inlangna hla kha inlawkdawktir rawh" tiin a mi hrila, inhawinaw ka ti khawp ela ka pa kuoma chun thil umzie țha deuin ka hrila ka pa chun hriethiem sienkhawm ZRS Cable a'nthawka insuo ta lo dinga a mi phutna chu kan za em ema kha hun lai khan ka naupa anaupang lem nautet lai ani leiin ka fesuok thei si naw leiin ka aiin mi ka tira kan ngenna chu an mi pawm pek leiin ZRS Cable neituhai chungah ka lawm hle a nih.
Thil um danhai chu ka ngaituo'n ka lung awinaw khawp ela ka ruolpa hang suosal ding hlak chun thil a ni ding ding alo ni zo ta si, hienghin ka țawngțai ve tah a. "Aw Lalpa! I thu zawmin maicham hai siemin ka ruolpa hai in ah ka fea tuhin hieng anga love songa ka hmel inlang el hi inhawi ka ti naw a nih. ZRS Cable a love songa ka hmel inlangna ngeia hin I hming ropuina dingin mi hmang rawh" tiin ka țawngțai tah a nih. Chutaka Lalpa mi hriettir chu "Ka hming ropuina ding a nih" ti a nih. Ahun lai chun ka hrietthiem naw hle a nih.
Chuongchun kum 2/3 vel hnunga chun mak takin ruolthar ka hung nei nawka chu ka ruolpa le chun Pathien thu kan hriltlang hlak a nih. Vawikhat chu ka testimony hai ka hril le ka ruolpa lungril a tawk ngei chu ni ding ana, ka ruolpa chun hienghin a hung hril tah a" ZRS Cable a sermon hril dingin an mi tia kei ka hril nekin ka aiin nangin i testimony kha hung hril lem rawh" a hung ti taha, kei chun ka nuomnaw thu ka hril mawl mawl nghal a, ka ruolpa chun "Lalpa kuomah lo țawngțai raw aw?" A mitia kei khawm Lalpa kuomah ka țawngțai taha Lalpa mi dawn na chu "Keiin rem ka ruot a nih i testimony chu va hril ngei rawh" tiin a mi dawna kum 2/3 liem taha ka țawngțaina kha dawnin aum a nih ti ka chieng tah hle a nih.
Chuongchun ka pienga inthawka ka vawikhat hrilna ding chun inzak inphak dawn lovin camera hma a chun inphalam pum deu chun dt 19-08-2012 chun Lalpa ropuina dingin ka testimony chu ka va hril tah a nih. Ka hril zo le inruol chun cable a chun an insuo nghala kan zak taluoa ka en ngam nawha bathrooma ka tlan luta ka va țawngțai tawp el a nih. He he.
Ka testimony insit umtak khawm nisien Lalpa'n mi hai lungrila sin a thaw ni ngei ding ana, thlakhata vawi 2 bek hril dingin an mi fiela kei khawm chun inhawk takin ka lo remti ve a, vawithum chu ka va hril ve hman a nih. A vawithumna a chun camera hmaa ka thuhril lai chun kan ringnaw kar chun ka bau a chun "tuta ka thuhril hi a tawpna ding an tah" ka hung ti dawk thuta kei le kei khawm mak kan ti hle. Cable neitu hai khawm chun mak an ti hle a nih. Chuongchun inthlakhla tak pum chun kan inthla liem nawk tah a nih.
In ka tlung chun Lalpa kuoma "Lalpa iem a ta khang khan i min țawngtira ?" Ka tia Lalpa chun World Map lien deu ang hi a min hmutira chu chu keiin zakuofuol var ka lo haka ka lo kuo a nih. A umzie mi hrilfie dingin ka ngen a chu a mi hrilfie naw a nih.
Hun le ni hai a hung fe peia 2014 May 14 a hung inhersuok ta ngeia chu taka chun a min an hril Facebook khawvel chu ka hung lut chil ta ngeia ka ring nekin ka um thiem naw khawp el a suoksan ka tum lai chun, kan ruolpa/zawlpa'n Facebook a Maicham Group a hung siema chutaka chun ban pakhat ni ve dingin Lalpa'n a min hriettir angin kei mi țawmkailo nu hin tlin le tlin lovin Lalpa ropuina dingin nitin deu thaw ka testimony hai le Bible thu hai ka lo ziek/puong ta bawk a nih.
Tuhin inza um tak Virthli fethlenga Lalpa'n kawt a mi hawng pek hi ka lawm em ema Pathien le Virthli enkhawltuhai chungah ka lawm thu ka hung puong bawk a nih.
Kei fesuok thei naw langkhawm Lalpa'n khawvel huopa rawngbawlna kawt a mi hawng pek hi ropui ka tiin ka phu naw hle a nih. World map a min hmutir kha lnternet fethlenga ka thuziek hai hi a lo ni ding a nih ti chu tuhin ka chieng ta hle a nih.
A tawp taka dingin:
Pathien nau hai ei renghin Lalpa rawng ei bawlna a hin, lo harsa deu hlak sienkhawm Lalpa thu ei ni a hung tlung hai hi ei zawm hram hram, fan fan, țal țal a ni chun Pathien-in A thu zawmtuhai chu a ensan ngai nawha taksa le thlarau ah mal a sawm ngei hlak a nih.
LALPA ROPUI TAK RAW SEH.
