CCPUR, October 31, 2017, Virthli (ONP): Hmar Youth Association (HYA), 12th Gen. Conference, Dr. HT Sangliana Rolling Trophy Football & Volleyball Final Oct. 31, 2017 khan Sielmat Playground, CCPur ah Volleyball, Guest of Honour Pu Michael Ginzasuan DSO, CCPur le Football, Functional President Pu Lalramsang Infimate MCS, Addl. DC, CCPur in Kick-Off an nei zoin inkhelna nei a ni a. Volleyball-ah HYA, Rengkai Branch 'A' chun an khingpui HYA, Saikot Branch chu set 2 ah hnein hrattak nina an lo lak tah. Winner- HYA, Rengkai Branch 'A' hin Trophy+INR 5,000/- an dawnga, Runner Up- HYA, Saikot Branch hin sumfaiin INR 3,000/- an dawng a nih. Football-a chun HYA, Saikot Branch le HYA, Saidan Branch an inkhel a, full-time 0-0 (30+30 mins) a in draw-in Penalty kick in HYA, Saikot Branch chun an khingpui HYA, Saidan Branch chu 4-3 in an hne tah ta nih. Football a Winner in Trophy+INR 10,000/- le Runner Up in Lawmman-in INR 5,000/- an dawng bawk. Lawmman hai semna Functional President Pu Lalramsang Infimate MCS, Addl. DC, CCPur in a nei a nih.


Hi hun hi sun dar 1pm vela tanin Ms. Lalremsiem Sungte in a host a, Opening Prayer Pastor Lalvullien le Closing Prayer Rev. Rohminglien Pakhuongte in an nei a, Welcome Address Mr. Lalhrietzing Famhoite, Chairman, Organising Comm. le Vote of Thanks Upa Laldawnlien Varte, Gen. President, HYA-GHQ in an nei. Blessed Choir haia inthawk hlapawl mawi tak ngaithlak niin, HYA Cultural Troupe anthawk hmu nuomum tak el 'Khuol lam', lemchang leh inkawp suklang a ni a, Nk. Hossanmawi Songate anthawk hla mawi tak el ngaithlak a ni bawk. Hi hun hi Hmar hnam sunga pawl tum tum le khawtlang thuoitu, HYA members le mipuiin an uop tha hle a. HYA-GHQ chun lawmthu a hril a. Playground phal taka in hmangtirtu Sielmat, Saidan le Saikot hai kuomah lawmthu a hril.

Hi huna Guest ha'n thu an hrilnaa chun HYA-GHQ in Sports hieng ang Dr. HT Sangliana Rolling Trophy, Football & Volleyball huoihawt theia a um chu lawmum an ti thu, State, National, International level chen a khawm khel thei ding khawp a thang la dinga infui le Dr. HT Sangliana chanchin thenkhat le an ngaisang thu hai an hril tawl.

Dr. HT Sangliana Rolling Trophy Football hi 1995 khawm khan Saidan le Saikot in Final an lo inkhel tah a. Kha hun a khan Saidan in Trophy an lak a nih. Hungtlung ding Nov. 4,.2017 sun le zan haia hin Rev. Chawnga Memorial Chalpel, Sielmat Christian Hr. Sec. School Campus, Sielmat, CCPur hmun ah HYA 12th Gen. Conference um a ta, Sun- Bussiness Session -cum- Election le Zan- Worship Service haia hun hmang ni dingin HYA-GHQ thuoitu hai chun an hril a. Details programme chu sukfel vat a ni ding thu le Manipur State puotieng anthawk khawmin an hung thang ding niin an hril bawk. HYA Gen. Conference hi kum 3 dan peia nei hlak a nih a. HYA hi March 7, 1985 a kha indin tah niin kum 32 a lo tling ve tah a nih.

Post a Comment

Powered by Blogger.