CCPUR, October 03, 2017, Virthli (ONP):  Hmar Students’ Association CCpur JHQ chun vawisun, October 3, 2017 khan VTI Auditorium, Muolhlum, Rengkai ah HSA Day (kum 78 tlingna) puithu takin an  hmang. HSA Flag keipharna Chief guest Pu L.T Hmar, Acting- Chairman, HPC(D) in a nei a, HSA CCpur College Unit ha’n  hnam lam mawi takel inentirna hun an hmang.

Hun hmangna hi Meicy Lalneikimin hnesaw takin a kehruoia, Opening song ‘Hmatieng pan zai rel rawh’ ti hla mipuiin sakna an nei a, hun hawng tawngtaina Rev. Samuel Khuma Joute, Principal AG High School in a hmanga, Pu Jeffrey Saihmang, GS, HSA CCpur JHQ in lawmlutna thucha hrilna hun a hmang,


Hi hunser hmang huna Chief guest – Pu L.T Hmar, Acting- Chairman, HPC(D) in thu a hrilna chun inchuklaihai hi ram le hnam thouitu ding an ni thu, inchukna kawngah thang nasa nawk zuola thang la dingin an fui a, inngaihnuoi el loa mihai thawthei chu ka thaw thei ve,  mi thiem thei chu ka thiem thei ve an nawm tia thang la dingin le mi an  hlawtling thei chun hlawsam biek naw mei nih tiin student hai chona a pek tawl.  Guest of honour- Pu Rodik Hmar, Manager (Electrical), NHPC Leimatak-in thuhrilna a neina a chun Education pawimawizie ursun tkain a hril a, HSA hai inpekzona chu lawmum a ti thu a hril a, lekha inchuk nuom le thiemthei em em student tamtak insung harsatna leia inchuk zawmthei talo hai thangpuina sin ei thaw lai zingin, an harsatna hai zawng dawka ,thangpui ngaihai  thangpuina kawngah  nasa nawk zuolin thang la tlang ei tiu, inchuklai chu khawtlang a khawm inhmang ei tiu a, hun hmang thiem ei tiu, taksa sawizai  le games le sports  a pawimawazie hai a hril.

 Functional President -Pu Lalhrillien, EM, ADC, CCpur in thu a hrilna a chun Hmar hnam sunga organistion upa pawl tak HSA hi a upat ang bawkin puitling takin hma an lak pei a beisei thu a hril a, inchuklaihai chu a khawhnunga an insir nawna dingin inchukna ngaisang dingin an fui a, internet khawvela cheng an ni ang hrimin, a hmang tangkainaah hai thiem taka hmang dingin an fui tawl. Chief Host – Pu Lalramsang, MCS, ADC- ADM, CCpur-in thuhrilna a neina a chun HSA in kum 78 hmel a hmuthei chu lawmum a ti thu a hril a, CCpur JHQ in free coaching a hlawk beisei loa a buotsai chu inpakum a ti thu a hril a, an sum zawngna dinga Carnival (28-30th October,2017) an huoihawt chu inpakum a ti thu hrilin, HSA CCpur JHQ hai  sum  zawngdanhai a thienghlimzie a hmuin lawmum a ti thu a hril bawk. chuthu tha tak Hi huna hin Hmar Inpui, HSA Gen. Hqtrs le MZP Manipur ha’n greetings hrilna hun an hmang a, HWA, HAA, HYA hai kawma uop vein thuhrilna hun an hmang tawl.

Hi huna Upa R. Tawna Khawbung, Associate Professor, Dept. of Anthropology, CCpur Govt. college in HSA history hrilna a nei huna chun HSA hi Hmar hnam sunga organization laia upa pawltak le hnam kalchawinaa a kaia lung tangkai ni rawp hlak chu Hmar students’ Association a ni a, rikawt ei hmu danin Pesident hmasatak chu H.L Daka a ni thu le indin kum chu October 3 , 1939 a nih. HSA member chinchang hrie hung pung peiin Flag le emblem nei tula hrietna a hung pienga. October 3, 1962 General Assembly, Sielmat a hmang hman dinga mawphurna pek a ni angina, ngaituona le themthiemna popo sawrkarna hung buoipuitu le lukhaitu chu HSA, Secretary Art and Culture, D.M College student Lalthlamuong Keivom (L. Keivom) a ni thu a hril a. A hril peina a chun thuoitu fel tak tak hung suok peiin President, Dr. John H Pulamte term sungin sorkar buzem pur phakin Tribal hostel building insitumlo tak indin mek a ni thu , zo hmaa inthawk khawm tangkaitaka hmang a ni thu hai hrilin Constitution hlui (hnawl pa) base a hmangin le thil thar tamtak belsain thuoitu tharhaiin December 12-14, 2007, Vairengte General Assembly hunah constitution thar hmang dind pass-in chuchu tuchena zui le hmang mek a ni thu hai a hril a. HSA thupui Sinin,Hrilin,Sanin, Thuoiin, Serve the Nation hre zinga ringumna, indikna le hmangaina neia hnam rawng bawlzawm pei dingin member popo ditsakna a’n hlan thu a hril.

Hi huna hin khuollien hai chawimaina hunser Nk.Greta Khawbung-in a hmang a, HSA members ha’n folk show hmu nuomum tak tak inentirna hun an hmang a, HSA Vision Beyond 2018  hriltlangna hun hmang a ni a. Rev. Songrolien Songate, Evangelist at Large, EFCI a’nthawk Gospel messege ngaithlak a nih a. Hi huna hin HSA members sunga hlasakthiem- Christina Khawbung, Lawmsangzuali le Pengpelep members – Zawlzapthang Thiek ha’n mipui fekhawm hai hla mawi tak tak sakin an inawi a, Aerobic Fitness Centre ha’n lam mawi takel inentirna hun an hmanga, programme hmang a ni zoin  ruoi inhnik takel kiltlang a nih. Hi program hmangna dinga Co- sponsors- Virthli, Productive Edge, Uri's Herbals, Downtown Grafix, Vivian's Collection, R & L Enterprise, Joute Enterprise, Kid's Paradise, Fox Journal, Valbuong Enterprise, Victoria Online Shopping, Churachandpur Times, FZ Sound, Tuolor's Printing & Designing, Bena's Iron & Steel, hzate.in, Freddie Graphics (Mumbai), KT Spring, Stanley's Diner, Auxilium Hostel (Hmarveng), LT Cycle Store (Rengkai Road), Aerobic Fitness Centre, Link Paints hai chungah HAS CCpur JHQ chun lawmthu an hril bawk a nih.


Reports & Pics: Muona Infimate


Post a Comment

Powered by Blogger.