Aizawl, 31 October, 2017, Virthli (ONP): Khawvel rambung hran hran 100 neka tamah Bible maktaduoi (million) chuong thawnsuok tu Bibles For The World chun an lekhabu buotsai tharlam hlak "Unfolding Word-Open Bible Stories" ti chu an lo tlangzar tah.
Hi lekhabu hlutak hi Serlui bieltu MLA, Upa K.Lalrinthanga in October ni 30, Thawțan zan khan Ramhlun Indoor Stadium, Aizawlah mipui inchawk le tiem thei dingin a tlangzar a nih.
Hi lehkhabu hi Bible a thawnthu (thusim) ngainuomum tak tak, a milem (illustration) țhangsa in parallel edition- Mizo (Lushai) tawng le Sap tawng a sut a nih.
Tlangzarna inkhawm hi Rev. (Dr) R.Zolawma, Principal, AICS in keihruoiin, lekhabu preview hi Upa (Prof) Laltluangliana Khiangte in a nei a, Rev. (Dr) R.Lalbiakmawia,Gen Secretary, Mizoram People's Forum (MPF) in Pathien kuoma inhlanna a nei.
Hi huna hin Bibles For The World President Rev. John L Pudaite in lekhabu an buotsai san le pawimawina hai a hril bawk a nih.
Hi lehkhabua hin Genesis anthawka Thupuong sunga malsawmna thu, Bible thawnthu pawimaw tak tak 50 lai (key words), a lem leh a um bakah color print a ni a, naupang le upa hai ta ding khawma ngainuomum le țangkaitak dinga buotsai a nih.
Tlangzarna inkhawm hi kohran le khawtlanga mi pawimawh tak tak bakah Dr Rimawi Pudaite, W/o (L) Rev.(Dr) Rochunga Pudaite le Dr. Lalchungnunga, Chairman, Mizoram Board of SchoolEducation (MBSE) ha'n tawiawm a, Lelte choir of the year lo la tah Aizawl EFCI Choir le EFCI Regional Choir ha'n hlaah rawngbawlna an nei bawk a nih.
