PARBUNG/CCPUR, Sept. 01, 2017, Virthli (ONP): August 29, 2017 khan Ms Angela Lalthangpui, d/o Hmingsemvel of Lungthulien chu an Chawrsawnga inthawk changsuola a tlak naah a lai hnuoi lai hmawlin na takin a dawthliem a. Parbung CHC a Doctor um remchangnaw leiin Senvawn-a New Life Trust NGO doctor hai panpui a ni a. Amiruokchu, a hliemna a hung inrik deu deu leiin August 31, 2017 khan District Hospital, CCPur hung panpui a ni a. Sienkhawm District Hospital han ieng an law theinaw leiin zani August 31, 2017 zan ma khan doctor hai refer dungzuiin HYA Ambulance in RIMS, Imphal panpui a nih.


Parbung CHC-ah mipui hai mamaw le tul huna Doctor an um ngainaw hi a ram mipui chun nat le sat tuorhai ta dingin a vangduoi thlak hle thu an hril rawp ta hlak. Lungthulien PHSC a lem chu Nurse le staff hmel hmu ding an um ngainaw a, hieng ang bawk hin Pherzawl District sunga Khuo tam tak chun harsatna namen lo an tuok mek a nih. Hieng a ni lei hin Pherzawl District chu CCPur le Imphal haia an hospital doctor, nurse le thawktu tamlem um dei ang an nih a, mipui harsatna hi thuneitu insanglem han an rang thei angin bawzui hai sien an nuom thu an hril.

A rama cheng han Pherzawl District a Parbung CHC bek hi chu regular takin function thei ta sien an nuom hle thu lungril natak pumin an hril a nih. Tulai taka doctor duty ding hai chu Dr. Robinson (In Charge), Dr. Immanuel, Dr. Baby le a dang Staff awm tawk chu an um nia hril a nih.

District thar mamaw la hau em em (infrastructure la um mumal lo) hi Manipur a sawrkar fe lai mek, BJP sawrkar hin Pherzawl District ta dingin Special Package dam hung induong vat thei sien a sunga cheng mipui hai chun an lo nuom ta hle a, an lo thlir zing laia basic medical facilities um lo chun mipui bei a suk dawng tak zet. Hieng lai zing hin communication le transport hlak mumal lo. NH-02 meu khawm mihriem le motor lam khawm hawi lo a nih ti social media tum tum haia hmu ding a tam hle.

Post a Comment

Powered by Blogger.