Aizawl, 21 September, 2017, Virthli (ONP): Mizorama Hmarhai politics ah an harsatnahai chingfela a um thiena ding le inremna tluontling a um theina dinga Mizoram sawrkar le HPC(D) hai inkara inbiekna fe mek chu a ṭum 5 (fifth round) na di’n vawisun khan State Guest House, Chaltlang, Aizawlah boruok muongumtak hnuoiah nei a nia, hi huna hin Sinlung Hills Council (SHC), Bill, 2017 chu chipchier taka hril tlanga nih.

Mizoram Home Department a Additional Secretary le Sawrkar palaihai inrawitu ni bawk Pu Lalbiakzama in Virthli Palai a hril danin inbiekna chu boruok muongumtak hnuoia le inpaw tlangtakin nei a ni thu a hrila, Sinlung Hills Council Bill, 2017 khawm a bat a bata (clause by clause) hriltlang a ni bakah, autonomy, power and functions of SHC (thuneina le a fe dan ding) hai khawm chipchier taka hriltlang a ni thu a hril bawk.

A hril peina ah Pu Biakzama chun tuta ṭuma inbiekna a hin official levela sukfel ngai popo sukfel tum ani lai zingin an sukfel thei chie dim a hrietnaw thu a hrila, zinga inbiek nawkna dinga hin inremna (accord) ziek dan ding le HPC (D) cadre hai in surrender dan ding chen hriltlang a beisei thu a hril bawk.
Vawisuna inbiekna chungchangah Virthli pailai zawhna dawnin HPC (D) spokesperson Pu Lalthalien chun Sinlung Hills Council, Bill chu chipchier taka hriltlang a ni thu hrilin, a tu tieng tieng khawma sawiselna (objection)an neinaw thu a hrila SHC thuneina (powers) le a fe dan ding (functions) hai khawm chipchier taka hriltlang a nih ti’n a hril.

Inbiekna chu a fe tluong pei thu hrilin, Pu Lalthalien chun final agreement ziek thei ngei dingin beiseina insang tak an nei thu a hrila, vawisuna inbiekna a hin Mizoram sawrkarin Memorandum of Settlement (MoS) draft a lo buotsai ta sa khawm entlang a ni thu le siemthat ngaihai siemthat a ni theina di’n zinga inbiek nawkna dinga hin hriltlang a ni ding thu a hril bawk.

Zinga inbiekna dinga hin rehabilitation package le HPC (D) hai hungkir (surrender) dan dinghai khawm hriltlang a ni ding thu Pu Lalthalien chun a hrila, official levela chingfel ngaihai popo khawm sukfel hman an inbeisei thu a hril bawk.

Inbiekna hi zing September ni 22 hin chawhma dar 11 ah a hmun ngaia bawk nei nawk ning a tih.

Tuta tuma inbiekna a hin Sawrkar tieng hi Pu Lalbiakzama, Addl. Secretary (Home) in rawiin member danghai chu Lalhriatpuia, Director, RD, Rodingliana Chawngthu, SP, CID (SB), Lalthazuala, Under Secretary, Home le David H. Lalthangliana, OSD (Home) hai an nih.

HPC (D) palaihai hi working chairman Upa Lalthalien in an rawia, member danghai chu Pu LT Hmar, Dr. John Pulamte, Pu David Buhril le Pu Lalthlamuana Hmar le Lalrammuanpuia hai an nih.

Riruong dan chun vel nawka inbiekna ding hi political level a hlangkai tum a nia, Mizoram Home Minister Pu R. Lalzirliana keihruoina hnuiah nei tum a nih.

Post a Comment

Powered by Blogger.