Aizawl, September 17, 2017, Virthli (ONP): Inremna tluongtling um theina dinga Mizoram sawrkar le Pu. H. Zosangbera keihruoi Hmar People's Convention (Democratic) hai inkara inbiekna fe mek chu tuta kar tawp tieng hin sunzawm nawk a ni ding thu Mizoram home department țhuoituhai chun an hril.

Mizoram home department a Additional Secretary Pu Lalbiakzama chun hung tlung ding Ningani (21 September) le Zirtawpni (22 September) hin inbiekna chu Aizawlah nei dinga ruohmang a ni thu a hril.

Tuta țuma inbiekna hi official levela inbiek tawpnatak dinga ngai a ni leiin ni hni sung aw dinga ruohmang a ni thu hrilin, Pu Biakzama chun inbiekna nei sung hin official levela chingfel ngai popo sukfel tum a ni thu a hril bakah kha hma a lo hritlang tah inremna ding ruongam (framework of agreement) khawm peifel tum a ni thu a hril bawk.


Hienglai zing hin HPC (D) spokesperson Pu Lalțhalien in Virthli palai a hril danin tuta țuma inbiekna ding hin Sinlung Hills Council Bill chu peifel hman tum a ni thu a hrila, inbiekna in ra țha tak an suo ngei a beisei thu a hril. HPC (D) palaihai chun September ni 20 hin Aizawl pan an tih tiin a hril bawk.

Pu Lalțhalien hril danin HPC(D) tieng hi working chairman Pu Lalthanglien in inrawi a ta, palai member danghai chu ama Pu Lalțhalien bakah Hmar Inpui president hlui Dr. John Pulamte, social activist Pu David Buhril, HSA assembly speaker Pu Lalthlamuana Hmar le Pu Lalmuanpuia hai ning an tih.

Sawrkar tieng hi Pu Lalbiakzama in inrawi a ta, member danghai chu Joint Secretary for Home Lalhriatpuia, SP, CID (SB) Rodingliana Chawngthu le OSD (Home) David H. Lalthangliana hai ning an tih.

Tuta țuma inbiekna hi tum dan chun July thla a kha sunzawm nawk dinga riruong a na, amiruokchu Mizoram sawrkarin Pu Lalhmingthang Sanate a pawl khawm inremna tluontling a um theina di'n inbiekpui a nuom leiin a hun ding hi pawtsei a lo ni tah a nih.

Pu Lalhmingthang a pawl le hin August thlawp tieng khan inbiek tum nisienkhawm thudelkil (pre-conditions) an siem chu sawrkarin a pawm naw leiin inbiek tumna chu a lo thlawl tah a nih.

Pu Hmingte pawl hin Mizoram hmar tlang dung Hmar bubitna ah ADC an demand bakah inbiekna chu central aiawihai țhangin kilthuma (tripartite talks) nei nisien tiin Mizoram sawrkar kuomah an dit dan an lo intlun a nih.

Post a Comment

Powered by Blogger.