New Delhi, Sept.01, 2017, Virthli (ONP): Vawisun chawhnung dar 1 khan Hmar Students’ Association, Joint Headquarters: Delhi huoihawtna hnuoiah Grih Kalyan Kendra Hall, R.K. Puram, New Delhi-ah Delhi khawpui le a sevela Hmarnau tam tak fe khawmin a vawi 32-na Freshers’ Social Meet an hmang. Hi huna hin Pu L H Ruolngul, Deputy Secretary, Government of India khuollien in a thang.

Vawisuna Freshers’ Social Meet hmang ani huna hin Delhi khawpui chuongkai thar, tuonthar (fresher) mi 50 vel an thang a. Harsatna le buoina dang dang leia thang thei lo tuon thar 50 vel an um ni a hril a ni bawk.

Hi huna khuollien Pu L H Ruolngul in fe khawmhai lai thu a hrilna a chun IAS, IPS tlingna dinga khawtlang le student organisation in tawl san a tul hlak hih a ngaimaw thu hrilin, in enfie a tul thu a hril. Khuollien dinga fiela ani leiin a lawm hle thu a hril bawk.

Hun hmasa tieng Tv. Japhet Vuonrohlun Darngawn, President, HSA Delhi in fekhawmhai a lawmlut a. Delhi khawpui chuh India khawpui tak ani leia Hmarnau Delhi khawpuia khawsa hai khawm hmun danga Hmarnau hai mit fûkna an ni zie a hril a. Hi lei hin kawng tam takah hnam rawngbawl theina lampui hmun dang nekin a lien lem ni’n a hril a. Sinlung khawpuia ei ngaina san hai hrilin, Sinlung khawpuia inthuruolna, tlawmngaina, inpumkhatna le insawmdawltuona hai lo um hlak dinga ngaina ei leia Sinlung khawpui ei ngai hlak ni’n a hril a. HSA thuchawi khawm chuong ang tho chu ani leiin mipui fekhawmhai chuh kawng hrang hranga HSA Delhi hmalakna hai thlawp a, ‘Sinlung Thar’ indin dingin mipui fe khawmhai, abik takin, tuonthar hai fielna a nei. Delhi khawpui chuh hnama piengtharna dinga training centre a lo ni hlak thu le la ni pei dingin a hril bawk.

Tuonthar hai infuina thucha hril dinga fiel, Pi Dr. Dony Tuolte in Delhi khawpuia tuonthar hai tadinga thu pawimaw tak tak le hlawtlingna lampui a hriet hai a hril. A hmasa takah Pathien hriet le ngaisak a pawimaw thu hril.

Vawisuna Freshers Social Meet hmang ani huna hin HSA Delhi’n Delhi khawpui le a sevela inchuklai, exam hrang hranga a thaw tha bik kuomah chawimawina an hlan. Hi chawimawina hi Tv. Moses Thuoitulien Inbuon, Nk. Ramdinthar, Nk. Judy Lalparmawi, Tv. Jordan Malsawmlien Sinate, Nk. Saint Rosary L Tuolor, Nk. Shekinah Vunghauching Keivom, Nk. Ruth Lalneizawn, Tv. Emmanuel Ramliensang, Nk. Mary Jones Lalringsan, Nk. Marina Niangthianbiak, Nk. Immanuel Lalsanhim Keivom, Nk. Maria Lalhruaitluangi Hmar le Nk. Lalniruot hai kuomah inhlan a nih.

Kum 2017-2019 sunga Hmar Students Association, Joint Headquarters: Delhi thuoitu dinghai thlangna nei a ni a. Hi hun sunga President dingin President sin chel lai, Tv. Japhet Vuonrohlun Darngawn bawk thlang a ni a, General Secretary dingin Tv. Robullien Khawbung thlang a ni bawk. Vice President dingin, Nk. Thelma Ramthienghlim, Assistant Secretary dingin Nk. Melody Lalengmawi Varte hai thlang an nih. Finance Secretary le Treasurer dingin Nk. Sari Joute le Nk. Uniky Huolngo hai thlang an ni bakah, department secretary dingin Tv. Milienropui, Tv. John Parate, Tv. Alpha R Chhangte le Tv. Samuel Lalsuokung hai thlang an ni bawk. Thuoitu thlang thara umhai hi Pastor Lalsiesang Zote in sesamna an nei tir nghal a nih.

Hi huna hin Hmar Christian Fellowship Delhi thuoitu tienga inthawkin Upa Dr. Lalsiemlien Pulamte le Delhi Hmar Welfare Association Chairman Pu Hrangthangvung in tuonthar hai hriet dinga thu pawimaw tak tak an hril bawk a nih. Tuonthar fe khawm po po hai ai-in Nk. Nazareen Sungte in HSA Delhi chungah lawmthu hrilna hun a nei bawk. Nk. Thelma Ramthienghlim, General Secretary, HSA Delhi in Freshers Social Meet puitling le hlawtling taka hmang ani theina dinga hmalatu, tangka sum thawlawmtu, khuollien le mi dang dang hai kuomah lawmthu a hril bawk.

Vawisuna hmang zo tah, Freshers Social Meet hi hun hni a the a ni a. Hunkhatna hi Nk. Greta Khawbung le Tv. Khamrosang Buhril haiin hnesaw takin an thuoi a. Hun hnina hi Tv. Henry Haulienkung, Tv. John Selate, Nk. Christy Hmar le Nk. Chipi Neitham haiin hlimum takin an thuoi ve thung.

Miss Fresher le Mr. Fresher dingin Nk. Ramhluomawi Pangamte le Tv. Lalzarlien Thiek hai thlang an ni bawk.

Vawisuna hmang zo tah, Hmar Students Association, Joint Headquarters: Delhi huoihawt ‘The 32nd Freshers Social Meet’ hi DD North East palai haiin a tluonsuokin video coverage an thaw a nih.

Mipui fekhawm hai po povin khawp le tlai takin bawngsa le vawksa chartang hme in ruoi an kil tlang a. Dit khawp lo takin zan dar 9 le a chanve chen hun hmang a ni hnungin Freshers Social Meet vawi 32-na chuh suktawp a nih.





Post a Comment

Powered by Blogger.