Muolhoi, August 23, 2017, Virthli (ONP): Vawisun khan HSA NC Hills & Karbi Anglong huoihawtna hnuoiah One Day Education Awarness Programme chu Tuolpui khuoa hmang a nih. HSA JHQ thuoitu le Resource Persons mi 12 hai chu Tuolpui khuo a fein Programme hlawtling taka hmang a nih.

Zingkar huna hin HSA Tuolpui Unit in thaithleng an buotsai chu HSA Office -cum- Guest House a Unit thuoitu, JHQ thuoitu hai le Resource persons haiin an kil tlang a, hi zoah hin programme tan a nih. Hun hawngna tawngtai Upa T Batlal Changsan-in a nei a, hunvawngtu Pu SK Thiek, Area representative a nih. Introduction le thuhma General Secretary Pu Lalrothang Thiek le Pu Lalruotsang Changsan President, Tuolpui Unit haiin an hril. "Importance of Basic Education" ti thupui Pu Josef V Tuolor in a hril a, "Social & Religious Life" ti thupui Tv. Samuel Lalringum Thiek in a hril, Dr. Solomon V Faihriem-in "Health & Sanitation thupuia hmanga hrilin "Career Options" thupui Tv. John Mark Pena in a hril bawk a nih.


Hriltlangna hun hmang ani bawka, nu le pa le inchuklai hai anthawkin hrietfie nuom tamtak hai hrilfie ani bawk. Lawmthu hrilna Pu Thovung, Vice President Tuolpui Unitin a hril a, JHQ President Tv. Sumneikung Thiek in indawnna thenkhat hai dawnin hma lak pei dan ding thu hai le hieng ang programme nei theia ei um pei hi inchuklai hai, khuosung thuoitu hai, Unit thuoitu hai le fekhawmtu hai popo kuomah lawmum ati thu hai a hril. Huntawpna tawngtai Upa Lalramnghak Pudaite in a nei zoin hun suktawp a nih.

Hi hun hi khuosung nu le pa, VA, Vâl, HYA, HWA le VDO thuoitu haiin an uop a, inchuklai le mi fekhawm hi 200 vel an nih. HSA NCH & KA JHQ hin hieng ang programme hi a huoihawt zing a tuta hmabak lientak hieng ang programme hi October thla hin Jinam Valley po huop dinga riruong siem ani bawk.

Post a Comment

Powered by Blogger.