~ Jami Darngawn

A hmasa'n 'Piengsuol ka nih' ti thupui ziek thei dinga hun țha mi petu Lalpa chu inpakin um raw seh.

Awleh, ka piengsuolna thu hi, ziek inhawkum tak chu aninaw ngei a, vawi tam ziek dinga a hung inlang chang khawma "thu dang ziek ding mi pe lem el rawh Lalpa" tia ka lo ngen hlak kha a na, tu ruok hin chu hla siemtu'n "I mualpona zawka Lal a nawi ang" a lo ti angin, harsa ti hle langkhawm. Lalpa ropuina dingin kan chansietna/ka piengsuolna thu hi ei hung  suklang ding a nih.

Kum 10 vel liem tah a khan ni khat chu Pathien ka'n halpui tah a, Pathienni/Sunday inkhawm dingin mi popo an fe a, kei chu ka naute leh in ah kan um a, (Penticost day a ni nghe nghe). Ni dang chu Pentecost day pha Biekin ah inkhawmin Pathien Thlarau malsawmna ka chang hlak kha a na, kha ni khan chu ka naute inkhawmpui thei an'naw leiin in ah ka um pui a. Pathien kuoma chun "Lalpa iem a ta? Hanna khan nau pasal i rawngbawltu ding a hni che a, nau țha tak Samuel i pek a, kei khawm nau pasal i rawngbawltu ding mi pe rawh tia ka ngenna chu nau pasal i mi pek ngei a chu, nau piengsuol i mi peka ka lung a awi naw a nih" ka hang ti ve pawp a, Lalpa mi dawnna chu, "Nang kha piengsuol i nih" ti a nih.
"LALPA iem ka piengsuolna ? Nang a zarin ka lung (heart) țhatnawna khawm doctor hai kut hmangin i mi sukdam tah a, ka kut le ke hlak țha takin i mi siem pek a" ka tia; Lalpa mi dawnna chu, "Kut le ke țhatak i nei a chu ka ta dingin i hmang nawh" ti a nih.

"Awleh, khawla'm? Iengti'n am? kei nuhmeite el, naute nu ni bawk, kohran a hlak țhangkaina nei lo, inkhawm tak ngiel khawm inkhawm theilo nu hin iengtin am i ta dingin inhmang/rawngbawl thei ka ta?" ka ti a; Lalpa chun, "Khawvel a mihriem ka siem hai  hi ka hmangai vawng an nih. Ka hmangaina thu a hrie naw hai laia inhriettir chu i mawphurna ve a nih. Biekin inkhawm thei naw leiin ka rawng i bawl theinaw a ni nawh, Biekin a inlenglo hai/inkhawmtheilo hai kuomah ka tir ding che" ti a nih. Chulai tak chun mitthla angin tak nisilo chieng em em in mipui tam tak ka hmu a, chuonghai chu piengțha em em nihai sienkhawm an kut le ke hai chu Lalpa ta dinga inhmanglo hai an nih a, chuonghai chu ka naupa ka hmangai anga hmangai dingin ti a ni bawk a nih.

Lalpa kuoma chun "Lalpa hienghai hi tu ha'm an na? Khawla'm an um? Feng ka tih"  ka ti tah a, a tawi zawngin hril inla, Lalpa'n inruithei sala intang hai chu ka naupa ka hmangai anga hmangai theina lungril a mi pek a, chuonghai chu ka hmangai em em tawl tah a. Natna țhanaw invawi hai le inruithei sala intang hai chu ka naupa ka hmangai angin ka hmangai a ni chuh! Kum iemani zat chu nau hai angin hmangai takin ka va ka'n hlak a, ka thei ang ang chun rawng ka lo bawl ve a nih.

La hang kir nawk met inla, 2004 lai khan ka naulutir chu kum 2 tling ta sienkhawm, a la lawn theinaw leiin Delhi doctor thiem hai pan ding chun kan fe a, doctor hai chun ka nau lutir chu mi pangngai ang zo talo dinga an mi hril pek el kha chu! A hringtu nu le pa ta ding chun a va harsa ngei de !!!  khawvel chu an thim ruoi a, kan nupa ta ding chun vânpui a chim a nih. Ka pasal le chun in kan tlung chun thlasie tak le beidawng takin kan zalna pindan sunga chun kan țawngțaia kan naute duot em em chunga thil tlung chu kan hrietthiem thei lul nawh, ka pasal kuoma chun Lalpa'n "Iengkim in ta a nih" tiin a hung dawn a, kei ruok chu Lalpa mi biekna chu "l naupa ka kut ah inhlân la, ka rawngbawl rawh" ti a nih. "Kei naute nu,  nuhmeite el hin iengti'n am Lalpa i rawngbawl thei ka ta?" tiin ka tosan tah el a.

Genesis 22: 2- Chun ama chun, "l naupa, l naupasal neisun, i lunginsiettak, lsak ngei kha țhuoi la, Moria rama chun fe la, chutaka chun, tlâng pakhat hril ka ti che a, pumrawhmang inhlannaah inhlân rawh" a ta. (Hi thu hin Lalpa'n a mi biek a nih)

Chuongchun doctor hai mi'n chaw ang chun nitin piengsuol hai sikula chun ka naute ka duot em em le ka hmangai em em chu ka fepui tah a, (mittui le inngaisie takin khawvel ka hmang a ni deu tak khanghun lai khan chu) kum 2/3 vel ka fepui lai chun nikhat chu Lalpa rawl ka hriet nawk tah a,  "l naupa hi Calvary sikula inkaitir la, ka rawng bawl rawh" ti a ni nawk tah! Hrietnaw telem thawin ka uksak chuong nawh. (Chu sikul neitu chu kan ruolhai nupa doctor ve ve an nih a, anni nupa chun piengphunga ruolbannaw hai enkawlna dinga sikul an buotsai/hawng a nih).

Awleh, nikhat chu kha sikul a khan khuoi tam deu an hung vuonglut a, kan ruolhai chu khuoi chun an bel tawl a, a țhen chu nikhuo hrelovin an um nghe nghe. Ka ruolhai Meitei-hai chun "Lai phata bah/pathien țhanaw a nih" an tia an ți tawl hle a, kei le ka naute khawm chu room pakhat ah kan tlân lut a, Lalpa kuomah ka țawngțai tah a, "Aw Lalpa, Hi khuoi hai a'nthawkin mi sanhim rawh lunginsiet takin,  i mi sanhim chun i thu zawm tang ka tih" tiin ka țawngțai a, ka țawngțaina chu Lalpa'n a dawn ngeia kha ni khan mi iemani zat chu khuoiin an bel leiin hospital tieng an panpui laiin, kei le ka naute chu him takin kan um a, chu ni a inthawk chun ka lungril ka siemthar a, kha sikul kha fenaw dan lampui ka ngaituo tah a nih. Kha sikul neituhai le doctor hai le, ka ruolhai chu ka'n thla tawl a, "Kan Pathien rawng ka bawl ding an tah, ka naute khawm kan Pathienin țul a ti chun hung sukdam ngei a tih" tiin thilpek chi te te pe in, kha sikul ka lo inhnem ve em em na nisienkhawm,  fe nawk ta lo dingin Lalpa ropuina dingin ka maksan tah a nih. (Ka naute chu Calvary sikul ah ka admit tah a).

Lalpa rawl ka hriet a vawithumna ni bawk, ka kum 30 na ni bawk, Lalpa Pathien mi hrietpui ngeiin le kan kohran Upa pa'n ka lu chungah kut innghatin a mi țawngtai pek a, Lalpa Pathien rawngbawl ding chun kum 30 mi ka niin ka lo pensuok ve tah a nih.  Lalpa ropui tak raw seh.

Ani ngei piengsuol ka nih a, mi anglo ka nih. Mihriem en a chu piengțha khawm ka lo ni thei ie.  Sienkhawm, Lalpa Pathien ngaia chuh. A tadinga ka kut le ke, ka lungril ka ngaituona hai ka hmang/pek naw chun  piengsuol țhangkaina nelo ang ning ka tih.

Ka naute/naupa chu Lalpa ngaiah a thienghlim em em a, suolna nei lo ang a nih. A thlarau nun chu ngaituo a umnaw hle. Nang le kei kut le ke kim, lungril ngaituona țha em em  nei hai hih, Lalpa ditdanin ei lungril ngaituona, ei kut le ke hai hi  ei hmang tawl am aw?  A mi siemtu Lalpa Pathien ditdanin ei um/hmang tawl naw ani chun naki la'n sir ei tih.

Lalpa Pathien ngaia nau piengțha/nau thuawi ei ni thei sengna dingin ka testimony mawl taka ka hung suklang hi, tiemtuhai lungril ah a thar takin Lalpa'n malsawm raw seh.

Post a Comment

Powered by Blogger.