Parbung, August 19, 2017, Virthli (ONP): Taithu tieng a'nthawka Parbung phak hmaa lunglakna (quarry) hmun pakhat- Sakawr-rawl an ti hmun a chun lunglatu haiin Fossil ei i ti, hun sawt tak a pil/hnuoi in a lo del/a lo inkhum nel lunga hung inchang tah ang chi an hmu. Hi Fossil (leaf fossil) a hin Hna a zie mawi ve tak el chieng tawk taka hmu theiin pahni a um a nih.


A hmu tu a hril hai chu Pu Thata, Pu Immanuel, Pu Hrangzakap le Pu Mangvung hai an nih. A lung kawpna hi suk chinin 2 Kg vela rik a nih. Hieng ang fossil hi hmun inhnuoi hieng vadung in hmunhnawt a dengkhawmna hmun le pil/lungte/hnuoi chang velna hmuna um hlak nia hril a nih. Hun hung fe pei ah vadung mawng a dam umin, vadung sira chirhak annawleh phaiphin damin chardein, lunga hung inchang chun a tuom ta hlak a nih.


Tuta fossil hmuna hmun hi tuhin tlang a sip tiengpang, rawl anga um a ni tah a, National Highway -02 in a hraw a nih. Hieng ang fossil hmu a ni hin hi lai hmun khawm hi a hma chun vadung amani chu a lo luong ngei ti a sukchieng bakah mithiem haiin an lo hril hlak angin hnuoi sungril chang vel zingin hmun inhnuoina hmun hai khawm tlangin a nawr pawng thei ti a sukchiengsa hle a nih. Mithiem hai lo sutdan dungzuiin Fosssil siem dinga hun a lak tlangpui chu kum 10,000 vel nia hril a nih a, tuta Fossil hmu a um khawm hi kum 10,000 vela upa chu a ni ngei ring a um. Hieng a ni lei hin Pherzawl District chu hnuoi hausakna chi dang dang hieng mineral ore hai chen khawm a um ngei ring a uma, tuta fossil hmu a um khawm hi Carbon dating hai dam thaw ni thei sien nuom a um hle.

Pic Credit: Dawn Zote

Post a Comment

Powered by Blogger.