~ Jami Darngawn

Efesi 1:13. Sandamna Chanchin Țha chu, in ngaia, inring hnungin, amaa chun a ta in nih ti Thlarau Thienghlim tiem chun inchikin in um kha.

Țumkhat chu țhalai inkhawmpuia țhang dingin Biekin pakhatah ka fe ve a, Biekin kawtkhar bula chun Țhalai ha'n hlabu an lo zawr kan chawklai chun "hi khawm hi sawmhni  man a nih" tiin batch an mi hungin awrtira, kei chun batch naran ni naw nim tiin a ziek tiem chuonglo chun Biekinah chun ka awrlut tah a nih.
Chuongchun ka țhungna dinga an mi kawkhmu ang chun hmatieng kan thunga, ni dang nek takin kan khawm chu ka boruok a zanga, ka Pasal thuhril ding a ni lei khawm ni ta veng a tih. Thalai haiin kut thiemthil an hung zawr hai khawm chu țhahnemngai takin ka thei ang tawk tawkin kan tlan ve a, a hmatieng chun vawihni/vawithum lai ka ngîr suok ve a nih (mipui hai chun an mi hmu vawng ti na a ni chu!!)

Inkhawmțn chun IN pakhat ah  ruolcham thingpui dawna ka'n ințhung khawmlai chun, kan-pa chun "Vawizana I  awr kha ieng batch am’ie ?" A ti a, ka hang en chieng chun le.... Conference PALAI BATCH ka awr hi a lo ni zinga..!! Ka van zak lawm lawm de aw!! Palai khawm ni lovin, Palai batch awr pum’in inkhawm sung popo mipui hmu thei ngeiin ka um a ni chuh...! Kan zak bawk, ka nui an za bawk, ka lung a sen bawk, um ngaina ka hrietnaw a ni deu tak ie.

Hi thil hin thil tamtak a min ngaituo tir a; mi'n chawtirtu le mi'n awrtirtu hai suosal nuomna chen ka neia, sienkhom, lo suosal in la, lo lungsen ta emem lang. Hmelhmapa (setan) a lawm ding a ni a...Ka thiltuok chu Lalpa kuomah ka'n tlun ta lem a nih. Ka țawngțai naah keia chieng êm êma hung inlang chuh hihi a nih; “KRISTA PALAI INDIK TAK” ti hih. Awle... Țhalaipawl Inkhawmpui palai chu ka ni naw ngeia, ka ni naw lei taka palai batch ka awr chu thil inzak um a nih. Mi'n iengtin am an mi ngai ding? An lungril ruk tak chun mi nuisan naw ni ham... ! Inkhawm sung po ka awr suok zak a ni si a!! Awle Efesi 1:13 a ei hmu angin, “..amaa chun a ta in nih ti Thlarau Thienghlim tiem chun inchikin in um kha” Ama ta, a Palai ei nina batch ei nei chie am aw!! “Ringtu” in ti popo hai hin. Krista Palai, Ama ta nina nei si lova, a neihai/a mihai Batch awr ang I awr ve ringawt khan umzie a nei nawh. Nina/inchikna neihai lam ang, hlasak ang, thuhril ang, an thaw ang ang I thaw ve kha, Krista ta/A Palai I ninaw ziet hrietu hai lakah chun inzakum el a nih. Palai indik takhaiin an Palai batch chu an inhmepui a nih. Palai lohai chun an inhmepui thei nawh, an nina a ni naw leiin. Krista Palai batch awr phak ding le inhmepui ding, Pathien Thlarau Thienghlim chun inchika um dingin, Pathien bel ei tiu. A batch neitu chu ama a ni si a.

A Thlarau Thienghlima anchik tahai chu, hi khawvela hin “LAL ISU KRISTA PALAI HAI EI NIH” ti hi ei hriet chieng nawk zuol a va țul de! Inkhawmpuina a chun palai hai batch chu a danglam bik rieu angin, ei ni hai khawm hi khawvela ei chamsung hin ei um dan, chang dan, țawng dan, inthuom dan, etc . ei danglam bik ding a nih. Ka palai batch awr chu a thlawn an nawh a, a man ka pek ve ang khan, eini hai khawm Krista  palai ei ni theina dingin, ei Lalpa Isu’n a man a lo pek tah a nih “A thisen ngei chuh”. Chuleichun inphalam lo takin KRISTA PALAI ei nina hi, huoisen takin, inzapui lovin ei damsungin Palai inchikna batch hi awr suokzak ei tiu.

Lalpa'n tiem tuhai athar takin malsawm raw sen cheu. AMEN !

Post a Comment

Powered by Blogger.