CCPUR, August 25, 2017, virthli (ONP): Dr. Jire Pudaite MO, PHC Senvon khawm hrietsuol le indik naw taka suspend a aumna Manipur Governor in a hlip a inthawk a sin thafan takin a sunzawm nawk tah a. Senvon a ngei posting dinga an singsa thu le October thla lailung vela a hmun ah a um hman ngei beisei a ni thu social media thenkhat ah suklang a um chungchang a chun NPPCD prog. induongsa zofel a ni charin fe a tum thu ama ngeiin ei indawnna dawnin a hril.

Aug. 24, 2017 sun khan National Programme for Prevention and Control of Deafness (NPPCD) programme le IEC activities hnuoia prog. induong a lo um tasa angin Saikot Govt. High School ah Awareness le Screening Programme hlawtling takin nei a nih a, hi hun a hin Dist. Nodal Officer a ni angin Dr. Jire hi a thang a. Student hai lai thuhrilna hun a hmang bawk. Chun, hi hun a hin naupang nakawr tiengpang harsatna nei a operation ngai hmusuok dam an lo um a ni chun a free a thaw dan lampui a um a, ama in a bawzui pui ding a nih.


Hi hun a hin Student hai lai refreshment le pamphlet sem a ni a, Poster naset laka inveng dan hai tarlang niin Student hai khawm Margareth Hmangte, Audiologist in Audiometry le Tympanometry hmangin Student hai nakawr hai enfelna (test) a nei a nih. Chun, District Programme Manager, National Health Mission (NHM) Mrs. Zengnghailun khawm programme a hin a thang bawk. School dang 7 ah hieng ang programme hi la nei sunzawm pei ning a ta, kartin nilaini zat a nei ning a tih. Nasetna (Deafness) hi natna a chu natna tlanglawntak dawttu (2nd causes of morbidity) a ni a, natna tlawnglawntak (1st) chu lungril ngaituona sawl leia natna (Depression) a nih.

Hi programme hin Manipur khawm in khawvel a la um ngailo, Guiness World Record nikum Nov. 5 khan a lo siem tah a nih. Khawvel a Hearing Aid tum khat a semdawk rawn tak tum a la nih. Hi hun a khawm hin Dr. Jire Pudaite hi Dist. Nodal Officer a ni angin a thang a nih.

Manipur pumpui huopin District tum tum a mi an fekhawma, hieng lai huna CCPur Dist. tuta a then Pherzawl Dist. ni ta dam, Thanlon, Parbung, Henglep le a sevel bakah Songtal, Singngat Area a'nthawk damin beneficiaries hai Imphal a fein Guinness World Record ah record an break a nih. Hi tum hin test hai thaw vawngin a hmu ding po fe khawmin Bus 11 le Winger 1 le Bolero 2 in an fe a, Dr. Kim Simte CMO, CCPur in a'n rawi a nih. NPPCD Prog. hi a mei naw hle.

Guinness World Record tum hin Dist. Nodal Officer a ni angin beneficiaries popo buoipuiin CMO, DPM le ASHA haiin an thangpui a nih. Hi tum hin CCPur Dist. a'nthawk naset 465 in hearing aid free in an dawng a nih.

Post a Comment

Powered by Blogger.