1Lalhai 1:
1. Lal David chu a kumhai a hung tam a, a hung tar ta hle a, chuongchun puonhaiin ama chu an inkhum hlak a, nisienlakhawm a lum thei chuong naw a.
2. Chuongchun asiehlawhai chun a kuomah, "Ka lalpa lal ta ding hin nunghâk zawng ei tiu, ama chu lal bula hin um zing sien la, enkawl raw se; chun i ângsûnga hin hung zâl sienla, ka lalpa hi a lum thei ding a nih," an ta.
3. Chuongchun lsrael ram sûng popova chun nunghâk hmêlțha an zawng ta a; chuongchun Sunam mi Abisag chu an va hmu a, lal kuoma chun an hung țhuoi ta a.
4. Chun nunghâk chu a hmêl a țha hle el a, lal chu a enkawl a, a rawng a bawlpêk hlak a, nisienlakhawm lal chun a hrietfûk naw a.
Awle ei ditna laitak chu, “Nunghâk chu a hmêl a țha hle el a, lal chu a enkawl a, a rawng a bawlpêk hlak a, nisienlakhawm lal chun a hrietfûk nawh” ti hi a nih. Nunghak hmeltha, Abisag hi lungsiet a va um de aw! A rawng a bawl pa’n a hrietfuk naw a nih. Einihai khawm hi Lalpa rawng chu ei thei ang tawka bawl ve chun inngai seng rawi-naw mei-nim? Sienkhawm tu hrietfuk ding le tu suklawm tuma rawngbawl am ei ni aw! Ei rawngbawl a hin, a rawng ei bawl pa’n a mi hrietfuk am? Nakie Abisag ang hin, “LALPA PATHIEN HIN MI HRIEFÛK SI NAWN'G A TIH” ti inlau a va um de! Ei sunghai, kohran, ruolhai, mit mei ringawt venga rawngbawl ni pal ei tih ti inlau a va um ngei de! Mi lungsietum tak ei ni ding a nih. Lalpa hrietpuia rawngbawl hai chu, mi inpak le mi hrilsiet mei mei in an buoi ngai nawh. Chungtienga PA PATHIEN mitmei an venglem ta a nih. Rinumna, Harsatna, Mangangna, Sawiselna, Natna hai chen tuor hai sienkhawm an rawngbawlna chu a tawp chuong ngai nawh, hmatieng an pan pei hlak a nih.
Awle, lsrael rama nunghâk hmêlțha tak ti lai hin ka lungril a tawk de! Hmeltha tak tak, hausa tak tak, fel tak tak ni si, Pathien in a hrietfuk pek lo ding rawngbawltu hi an va tam awm ngei de aw! Aw Unau nang le kei Lalpa Pathien hrietfûka rawngbawl ei ni hi ei va vangnei ngei de maw! Chuleichun, lungngai ding ei ni nawh. Pa Vanami en zingin, a hrietfuk dingin rawngbawl ei tiu.
Lalpa ngaiah hlutak ei nih. Lalpa'n malsawm raw sen che.
