Hmarkhawlien, August 01, 2017, Virthli (ONP): Tarik 17 July ainthawka Thalai In Hmarkhawlien-ah Discipleship & Music Training um chu tarik ni 29 khan zo alo ni tah. Hi training a thang po hi mi 115 niin damnawna lei le mimal buoina leiin thenkhat lo suokin atawp chena thang po hi mi 110 ni a hriet a nih.

Tarik 31 zan khan SUMMER GOSPEL CONCERT hi hmun (Thalai In) bawka hin nei a ni a, Music training a thang hmun hrang hrang ainthawk hung hai khawm hi concert a hin an la thang vawng a nih.

Zan dar 7 velin Concert Program tan a ni a, mipui hung khawm hai lai Introduction nei a ni a, Rev. Lalsuokhup, PS, Cachar Presbytery in hun hawng tawngtaina a nei a, hun hawngna hmangzo le inruolin Campers (trainees) haia inthawk "Kir relnaw ning" ti hla sakin hung hmang tan a nih.


Rev. HP Runremthang le Rev. Zothanghrim in Camp hun sunga Activities tum tum ah Activities Recognisation inhlanna an nei bawk.

Rev. Zothanghrim in Guest of Honour Upa Lalkhawlien in puon insiltirna a nei a, Short speech a nei zawm nghal bawk a nih. Khuollien (Chief Guest) Pu Lalthomlien Hmar Puon insiltirna nei a ni a, thuhriltawi hun a hmang zawm nghal bawk.

Artiste haia inthawk Pathien inphakna hla nei zawm a ni nghal a, Hi concert a hlasak rawngbawlna nei dingin Churachandpur a inthawk SEMIKAH Band hai khawm an hung a, Soloist Nk. Quilyn Lalrovel (Rev. Thangngur Awardee 2015) Nk. Lalhmunmawi (Rev. Thangngur Awardee 2016) le Nk. Lalthapui (Rev. Thangngur Awardee 2017) haia inthawk Pathien inpakna hla ngaithlak a ni bawk a, Hi baka hin JEHOVAH NISSI Band hai khawm Inpakna hla sakin mipui an in awi bawk a nih.

Mipui hung khawm hai lai Thawlawm dawlna nei a ni a, hi thawlawm dawl suoka um hi August le September sunga Thalai In Hmarkhawlien ah a bika Inruitheithil thaw hai tading bika buotsai na dinga hmang ani ding a nih.

Hun tawpna taka Campers haiin "INTHE UM TA NAW NIH" ti hla an sak a, an sak zovin hun kharna Rev. HP Runremthang in a nei. Zan dar 11:30 chen hun hmang ani hnungin suk tawp a nih.






Post a Comment

Powered by Blogger.