~ Jami Darngawn, Columnist, Virthli
Nikhat chu darthlalang (mirror) hmaa ka ngira. ka hmel ka hang hmu chu, kei le kei khawm 'U' ka'n ti vang a nih! Asan chu ka thau em lei alo nih.
Ka hung thau thut nasan hi asan a um a nih, kei hi ka nunghak lai le nau pakhat ka nei hnung khawma cher em em el ka na, taksa nei ve met hi ka lo nuom hlak a nih. Chun, vangduoina chikhat ka ti el a, ka naute nek ding nenetui ka thlasam hlak leiin harsatna ka tuok hlak a nih. Ka naute a pahnina ding ka pailaia inthawk chun nenetui tamna tiengpang reng reng chu ka lo fak lawk a nih. Nau ka neizo hnung khawma ka naute nenepek lai na na na chu fak le dawn insum lovin le, nenetui tamna chi hai ka fak țeu hlak a nih.
Chuleichu nita naw ni'm ie, ka naute nenenek bangzo hang intuoinam met ka nuom taha ka thuomnaw hai reng reng hak thei le bil thei um talo chu, chu el khela (khawlai ka suok zatin mi ha'n ka hmel nekin ka phîng an en hlak he he..) chu umzie chu "Nau i pai a ni ?" Ti na ani chu!
Awleh, nikhat chu ka pasal khawma a mi en veng veng a " i taksa a cher deu dan ding ngaituo ta?" A mi tia, kei khawm chun theitawpin ka ngaituoa ka ruolnu doctor pakhat ka rawn tah a nih, ka ruolnu chun thawdan ding ami hril nghe nghe a nih. Anleh, hang thaw dek dek ka tuma, a maka makin ka taksaa natna ahung um tah a, Lalpa'n Bible thu hmangin a mi hung biek zing bawk, chuongchun ka thei angang chun taksa nekin thlarau tieng a pawimaw lem a nih ti chu hriezingin ka thei angtawkin Lalpa rawng ka bawl zing a nih.
Chuonglai chun ka pasal khawm doctor haiin anchaw angin khawvel gym alak hlak a nih. Ka pasalin "nangkhawma gym ka lakna hung la ve rawh aw ?" ami tia nikhat chu ka va zui ta nghe nghe a nih. Mi tamtak chun hall lien deu a chun gym chu anlo lak sup sup a thafan a um hle ni'n ka hriet, ka pasalin gym enkawltu kuomah "ka nuhmei a nih" ti malam in gym ka lak nuom ve ziet a hril nghal a, an ni khawm chun an mi lawm hle ni'n ka hriet ve, chuongchun rimawi mawi em em hai chu ngaithlak malam chun a nuhmei a pasal chun an taksa hai sawizawina ding le, an hriselna ding le an mawina dinga gym an lak sup sup lai chun, kei ve bawk chun chungtienga inthawkin rawl ka lo dawng/hriet tah! (Hi țum hin chu Lalpa Thlarau Thienghlimin hla thu hmangin a mi hung biek a nih)
"Nitla ngailo zion khawpui, a hmun ropui a mawina hai nekin, lungsiettu Lal Krista hmel ditum chu, hmu ka nuom ka lungkham bangna dingin" Hi hla thu hin Lalpa'n a mi hung biek/pawl zet chun ka zawi rawng rawng el a nih. Tu gym lak khawm ka hriet fuk ta nawh, ka khat khat in kil khata ka lo lam ve a, ka lam laia Lalpa mi hung biek nawkna chu "Khawvel ena mawi am ? Ka en a mawi i nuom lem?" Ti ani chu !!! Chutaka chun "Aw Lalpa, khawvel ena mawi nekin nangma ditdana um ka nuom lem ie, chu chu i mita mawi ngei bawk a tih" tiin khawvel gym lakna hmun chu fe nawk ta ngailo dingin ka maksan tah a nih.
Ka'n IN lum ka tlunga ka pindan sunga ka luta Lalpa ka biek nawk tah a "Lalpa! iengtia um dingin am i mi dit a ?" Ka tia, Lalpa Thlarau Thienghlim chun "Manipur i chengna hmun ta ding hin vawi iengzam bungheiin i țawngțai tah a?" A mi ti chu ka hang ngaituo veng venga ka chengna Manipur ta ding bikin vawikhat khawm bungheiin ka lo țawngțai ngainaw ziet ka hung inhriet suok tah a nih. Chutaka chun Manipur ta dingin bungheia țawngțai ding chun ka hang inbuotsai țan tah a, ni iengzam ka thaw ding ruok chu ka chieng nawh, nidang angin ni 10 vel chu hang thaw phawt lang ti chu ka tum dan a nih. Chu chu ka pasal khawma a mi phal ve a, ana chu ni 40 lai anlang ta lei chun ka bei adawng deu tah a nih, ka piengpui ka U nu chu ka hang hrila a ma khawm chun "Bawi ! Mi hrisel lo i ni lei chun ni 40 chu izo ka ring nawh, Lalpa kuomah lo hnipui ka che, ni khang zat zat kha chu lo thawnaw hram rawh" a mi hung tia, ka pasal khawm chun "ni 40 em em chu i taksa'n zo naw nih, thaw da'l rawh, hnipui ka che" a ti ve bawka ka lawm em em laiin, ka chunga thuneitu tak Lalpa chun a phal naw a nih.
Chuongchun zingtieng chau bunghei chu Lalpa hratna ringsanin ni 40 chu ka hang thawzo tah a, ka lawm em em a, ka zo ni khawm chun Pastor pakhat kuomah ka luchunga kut innghata lawmthu hril malama ka bunghei țawngțai hun chu suktawp dingin thuthlukna ka nei tah a, ka pasal leh Pastor hai in ah chun chu hunser chu kan nei ngei a nih. (Chu hun lai chu 2014 June a nih)
Chuongchun lawm em em in ka um nawk tah a, ka rikna khawm chu ni 40 sungchun 13kg in alo thlahnuoi a ka ditdan angchar khan ka taksa kha ka hrietnaw kar chun alo um tah a nih. Haleluiah Lalpa ropui tak raw seh!
A la tawp nawh! Zing le zana bufak chu ka ta dingin a rem ta nawh, zingtieng bu chu damsunga fa talo ding ti ani nawk tah! Chu chu ka pasal ka hril ngam ta nawh, fe suol kan lau, thlaraua ka hotupa ka ti el hlak Pastor pakhat phone a ka um dan rawn/hril ka nuom a ka call leh thei nawk lo, damsunga zingtieng bu hang fak ta naw ding chu ka ta ding chun thil harsa tak a nih. (Harsatna chu chi dang dang a uma i hrietthiem ka beisei)
Awle, kei hi taksa le thlarau ah mi piengsuol ka nih a, Lalpa țhangnaw chun teplo hai teplo el ka nih ti ka chieng hle. Chuleichun annawm țhangpuitu ka mamaw chu ! Chu chu nitin mi țhangpuitu ding Lalpa Pathien Thlarau Thienghlim mi chenchil tu dinga ka ko zing naw chun ka nina hi ka phursuok zo naw ding ti ka hriet leiin, nitin Lalpa țhangpuina ka hni lem hlak a ngai takzet a nih.
Ka nina hang ti tak chun khawvel thila chu inhawk um bek bek naw sienkhawm, ka ta ding chun Kohran Upa Nuhmei/Berampu ka'n ni na hi ropui ka tiin ka phunaw hle a, chu ni na insangtak chu ka pasal leh ka'n phurzo theingei na dingin ka thei tawkin Lalpa ka ko hlak chu ka thaw ding awm hrim alo ni lem a nih.
Tu tieng tienghin a chang chang chun suol am ei ti ding ? "Hi thil hi thaw ta naw rawh pharisai i ang" Ti'n ka lungrila kei ma ahin a hung um hlak a, ka thaw naw reng hlak, bu chu pangai takin ka fak a, chu taka ka taksa le thlarau ah harsatna ahung tlung zet chun ka thaw naw ngam ta nawh, vawithum lai kei le kei hi thil a hin kan fie ta hlak a nih. Tuhin chu ka chieng thawkkhat tah a kan ngai leiin, Lalpa'n ropuina chang kumkhuo raw seh.
Ei hung suklang nasan chu, a Ram le a felna zawng hmasak hi a lo va țul de ! Chuonga Lalpa Pathien ringsana a ma ditdana ei um/thaw a ni phawt chun, a ma chun a nau hai ta dingin thil țha an ro ngainaw a nih. Thaw dinga a ti chu thawphawt ei ta, chun Lalpa Pathien chun ei ta dingin a hung thaw ding a nih.
Ka testimony inphalam tak puma Lalpa ropuina dinga ka hung suklang hi, khawngkhat beka tiemtuhai ta dinga malsawmna intluntu ni ngei dingin Lalpa'n a thar takin mal mi sawm pek raw seh.
