Responsive Ad Slot

An Interview with Eleazar Thiek

Monday, August 28, 2017

/ Published by VIRTHLI
(Hmar Tlangval, South Korea a Korean tawng chau a inchukin, Double Graduation Specialized 4 Years Course in TV Broadcasting, School Of Film, TV & Multi Media, Korea National University of Arts Seoul Korea a First Class a zo thei ve ngat leh inpawlna.)
# Interviewer: LRS Puruolte

Hello! Eleazer Thiek i tha maw? Chibai! Inchukna a i hlawtlingna kan lawmpui che. In pawlpui (Interview) che kan nuom a, hun i mi pek thei ding?
Eleazer: Lawm a um. Kei a neka inchuk insang le mithiem nina insang tak tak hai kar ah interview i mi hung thaw hi inphalamum khawm ka ti a, in chungah ka lawm tak zet a nih.



Introduction:
Eleazer Thiek a thil inchuk hi Korean tawng chaua inchukin, Double Graduation Specialized 4 Years Course in TV Broadcasting, School Of Film, TV & Multi Media, Korea National University of Arts, Seoul Korea a nih. Pathien zar le a tumruna zar chauin First Class in a zo a nih.

Eleazer Thiek a Pa chu Secretary, Northeast Indian Evangelical Mission, Church Ministries sin chelin niin a Nu’n a thlawp a, Guwahati ah an khawsa mek. A sang Paul Ramsanhim hi BA in Animation zovin tuhin 3D Animation Special Course inchuk nawkin Delhi ah a um mek. Pathien malsawmna ropui tak an sungkuo hin an dawng hmu theiin a um a, lawmpui an um tak zet. Sungkuo entawn tlak an nih.

BIODATA
1. Name: Eleazar Lalringsan Thiek

2. Father's Name: Rev. Lalchawlthang Thiek

3. Mother's Name: Lienkhawtling Thiek

4. Sibling: Paul Ramsanhim Thiek

5. Educational Qualification/s:
HSLC- Young Learner’s School
HSSLC (Arts)- St. Edmund’s College Shillong
BA in Mass Communication – St. Anthony’s College Shillong

6. School: Young Learner’s School

7. Hr. Sec. School/College: St Edmunds College / St. Anthony’s College Shillong

8. University: Korea National University of Arts

9. Degree: Double Graduation

10. Occupation: Sin ka apply mek

11. DoB: September 14th 1990

12. Address-

(a) Permanent: Rengkai Churachandpur, Manipur

(b) Temporary: Seoul, South Korea

13. Hobby: Cooking and Travelling

14. Aim in life: Pathien ta dinga tangkaina nei.

15. Marital Status: Single

16. South Korea ah kum iemani chen lo um tah i ni a? Um sawnga sinthaw/thawkna nei dam i tum am?

Eleazer: Korea a hin November,2017 hi Kum nga ka um tlingna ding a ni tah. Um sawng chu ka la tum hri nawh a. Tuhin working Visa le sin ka apply mek. Ka hmatieng future ding chu ka tawngtai mek a, Pathien thu thu ning a tih.

17. Inchuk sung ringawt khawm kum 4 le a chanve vel chu South Korea ah i um an tah a, anni a'nthawk a ei inchûk dinga dit deu i nei am?
Eleazer: South Korea ka um sunga anni a inthawka inchuk ding ka hmu hai chu-

i. Sin an takinning in an tuorsel in an taima em em.
ii. An thilthawna an sinah an inpekzo tak zet a nih.
iii. Hun an vawng dik em em a. Hun awl, um mei mei an nei naw bawk.
(Entirna : An major course hai baka hin thil dang dang an hunawl a hai an inchuk hlak. Music, par siem etc etc. Hunawl popo thil tangkai thawnan an hmang bit a ni deu tak.)
iv. An sina le iengkim a hin an ringum em em. Chu baka mi indik an tam, thil inruk ti hai an ching nawh a. An rama um a hadam thlak hle a nih.
v. Thilthaw iengkim ah an tuonrang in an fast em em.
vi. Neka upa inzana lientak an nei.
vii. Mi thangpui an inhawk a, mi han mi thangpui hai sien ti nekin, keiin mi dang thangpui thei lang ti hi an nuom lem a nih.
viii. An ram le hnam an hmangaiin an inthuruol.
ix. Faina kawngah hmunhnawk hi a peina hmun peiah an peihawn tlangpui a nih.
x. Inchukna hai hi high School a inthawkin a tlangpuiin mani in chawm (work and study ) an nih. Mani in chawm (self support) an uor em em. An sawrkar khawmin student hai inhlaw puma an inchuk thei dan ding a siem pek lei a nih.

18. Khawvel ah South Korea hi Internet khawm a hratna tak a hril a ni hlak a, anleh facebook, whatsapp, etc khel an pei ve tho am? 
Eleazer: Ani ngei South Korea hi khawvela internet hratna tak 26.7 (Mb/s) a nih. Amiruokchu Facebook hi a thaw pawl um hai sienkhawm a tlangpuiin an in update nuom bek bek naw in ka hmu. Privacy nuom lei dam le buoi taluo leia thaw hman lo dam an ni tawl. Chun Korea a chun Social Networking Sites hieng Naver le Daum ti hai an hmang nasa ve bawk. WhatsApp hi an hmang ve nawh. Chatting app a chu “Kakao Talk” hi an hmang nasa tak. Education le information lakna in an hmang nasa a. Video mei mei inthawn tuo an ching naw bawk.

19. Nang hi i naupang/tleirawl lai a'nthawk ta khan lemchang khawm inhnikin i hnesaw hle a, hmatieng ah iem i la sunzawm  tum am?
Eleazer: Lemchang tieng chu sunzawm ka tum hri naw a nih.

20. I piengna pa le nu khawm South Korea ah Theology tienga Master Degree lo inchûk zo ngat ve ve le Pathien rawngbawltu inpezo tak khawm an ni a. Nang khawm Pathien rawngbawlna tieng ah ieng angin am hmalak i tum a?
Eleazer: Pathien rawngbawlna tieng a hin hlaw tha taka ka nei thei chun Missionary chawm le ka thei ang ang a nasa taka thaw chu ka tum a nih.

21. South Korea hai hi eini lai (NE India mi tam takin) a ngaisang le an fashion style khawm a lo copy an tam em em a. Anleh an pangti (complexion) tha em em el nasan dam hi an thil fak le dawn bakah an thil chingdan tha deu a um lei ni ring a um a. Ieng am an'a i hmu le hrietdan?
Eleazer: Vun le hmeltha ding le hriselna ding an ngaipawi maw leiin fak le dawn hi an fimkhur hle a nih. Vun enkawl an ngaisak tha a, a nuhmei a pasal in nal chi tinreng an ramin a siem suok nasa bawk a, an hmai le an taksa thatakin an enkawl a nih. Chun an ram borouk in a lo zir bawk, thlai hring le thei (fruits) an fak nasa. A huntawka in sawizawi exercise lak an uor em em a nih. Gym ah fe an uor tawl a, Fitness an ngai pawimaw tak zet. Tlawmte te a fak inzing an ching a. Nikhat ah bu Vawithum an fak a. Fak hunbi an vawng tha a, zantieng dar 6:00 pm ah bu an fak tlangpui a, zal tawm bufak an ching nawh. Thau tel tul le phingbel an tam naw hle. Korea hai hin ke a lawn hi an uor hle a nih.

22. In family chanchin hi tiemtu le nang a ngainatu hai che hriet chak khawm a ni a, tutaka i sang, i pa le nu hai chanchin dam i mi hril thei ding?
Eleazer: Kan Sungkuo chu Rengkai khawsuok kan ni a. Tuhin ka pa sin thawna leiin Guwahati ah kan um .

23. South Korea a degree i lak kher nasan dam hi a um am? Hieng ang hi India ah inchukna ding i duthusam a um naw lei am?
Eleazer: BA ka graduate zovin further study dingin ramdang U.K, USA a hai scholarship ka apply a. Amiruokchu Korea a hin Full Scholarship ka lo hmu bawk leh Ramdang Korean tawng ngei a hei inchuk ve hrim hrim nuomna ka nei lei a nih.

Korean tawng vawng a ni leiin harsatna tam tak ka tuok ve a. Exam le Assignment  harsa ka ti thei hle a nih. A chang chun bansan (in give up) ka nuom hiel a. Chubakah Seoul hi khawvel a thil tona (expensive) hmun pawl tak a ni leiin scholarship chauva inenkawl thei a ni naw leiin kan hlaw hlak a. Zingkar inhma takin college fe in, zan sawttak chen sin ka thaw a, darkar 4 dam ka in hman tawk a nih. Amiruokchu chuonga ka harsatna hai chu ka hei tuor suok zo hnung hin tuorselna mi petu le mi siempuitlingtu a lo ni lem a nih ti ka hriet a, ka lawm lem tah a nih.

India a hin duthusam a inchukna ding um de sienkhawm sengso a tam a chun, Korea a hin full scholarship ka lo hmu bawk leiin ka thlang ta lem a nih.

24. South Korea hi Technology tieng a khawm an insang ve em em a. India leh kawng tum tum ah khaikhin ta inla iengangin am i hmu?
Eleazer: Technology a chun Korea chu an sanga India le chu inthlau tak a nih. Korea hi ram chite nisienkhawm ram changkang dang hai ang thovin technology a chu an insang hle a nih.

-Transportation technology system a tha in a felfai em em a, mikhuol lan zin ngai lo hai ta ding khawma awlsam taka hmun hming le fe dan ding direction a ziek le khawl hmanga puong pei a ni leiin a awlsam pek em em a nih. Bus le train hmanga ei fena ding hmun le ei tlungna ding hun, bus or rail hung tlung hun ding (time) kha ei lo hriet lawk thei vawng a nih. Public transport hi a man a tlawm bawk, mipuiin private car hai nek hmanin public transportation an hmang nasa lem a nih.

-Internet a tha em em. Public Free Wifi hi hmun tinah Bus le Train a hai le Public hmun ah a um deu vawng a nih.

-An subway (metro) hai an tlanna, hnuoi underground sung hai hi sawng sawm umna khawm a um a nih.

- Apartment le in hai khawm kawtkhar tala le chabi hmang kher lovin password le finger print ringawta hawng a lut el a nih tlang pui. Automatic door le automatic light system an hmang nasa bawk. Apartment thenkhat a hai lem chun Light (electric) khawm switch on le off set lawk thei a nih a, chun building in sang apartment thenkhat a hai fena nei ding insiem mek lai elevator kha mani insunga inthawkin mani apartment floor a lo book or ko lawk thei a nih.

India ram khawm khawpui lien a hai chu technology chu an sang ve tah a. Hrilding tamtak a um a hril seng ni naw nih.

25. South Korea Kristien hai le eini lai abikin India rama tlangmi Kristien hai ei inang nawna tak nia i hriet ieng ieng am a um a? 
Eleazer: (1) Korea Kristien hai chu Bilble Study le Group Discussion an uor em em .Chawlkar tin a pawl pawlin an nei seng a nih.
(2) Tawngtai an uorin an tawngtai taima em em.
(3) Pathien in pak, (Praise and Worship) hi an ngai thupui in an ngai pawimaw tak zet a nih. A spirit tak tak an chang a nih.
(4) Korea hai chu Pastor hrim hrim hi an ngaisangin an inza em em . Pastor an kawla a hung chun inza takin, an inza in entirna in an lo kun hlak. Naupangte chenin chuchu an lo thaw hlak a nih. Pastor chu an hlaw khawm a tam.
(5) Biekin a inchei taluo an uor nawh.

26. South Korea haia inthawka inchûk dinga dit deu iem i nei?
Eleazer: South Korea hai nuna inthawka inchuk tlak nia ka ngai chu mitinin mani intodel tumna an nei tlata, intodel dingin taima tak le tuorsel takin tumruna an nei bawk hi a nih. Korean hai khawm mihriem ve tho anna, an perfect bik nawh. Amiruokchu an umdan tha nia ei hriet hai chu laksawng ve dingin ka hung hril a nih.


KA LAWM IE.
# Lawm i um ie. Hun remchang ah la'n pawl nawk pei tum ei tih.
Don't Miss
© all rights reserved
made with by Simon L Infimate