~ Jami Darngawn

23-5-2017. Zantieng deu chun ka cell phone ahung inri dar dara ka hang pick-up chun
 "U Jam ! ( .........Hmingthup) kha, 1st in a pass a nih aw ! Chun, subject pakhat ah letter mark a hmu bawk"  A hung ti chu ka lawm em ema ka lawm ruol ruol chun thil pakhat ka lungrila ahung inlang zut zut nghal a nih. Ka lungrila thil hung inlang zut zut chu zieklang/puongsuok anlang tareka ka mihriem nina hin chu ka nuom naw khawpela zieknaw ka tum lem a nih. Ana chu sungril tienga mi nawrtu hin a mi nawr nasa bawk leihin, a tawp atawp chun  ka'n tunu kuoma chun "i chanchin Lalpa ropuina dinga ziek anlang tlat a iengtin am i ngai ?" Ka tia, a ma chun "Pi Jam, ka hming chu suklang naw la ziek el rawh" a ti leiin Lalpa ei Pathien ropuina ding le Setan muolphona dingin hung suklang ei tih.

Ka'n Tunu tuta 12 class 1st a pass nu hi hostela um hlak a na, chawl anei pha kan in ah ahung um hlak a nih, 2012 lai khan vawikhat chawllai kan in ah a hung um chu, ngui em em hin ka hriet leiin mak ka ti deu lei chun  kan dawn ve chawt tah a nih. Chu hun lai chun kei khawm ka thei ang anga  Lalpa rawngbawlin a țulna hmun ahai fesuokin theitawp kan suo ve a, kha hun lai thawkkhat chu setan bietu hai an um an ti lai khan, Ram, Khawtlang, Kohranin beipui ei thlak lai ani nghe nghe, kei khawm vawikhat chu setan bietu hai dodalna/hnawtsuokna dinga mi țhenkhatin bunghei țawngțai an buotsaina a chun ka ruolhai leh kan va țhang ve ta bawk, chu hun lai vel chun phurrik dang dang ka nei leiin bungheiin Lalpa chu ka buon lai tak a nih.  Kan tunu kuomah chun aum dan hai kan dawn taha ama chun hienghin ahung hril tah a nih. "Pi Jam! Lekha hi ka thiemtheinaw hle ela ka ruol hai lekhathiem hai hi kan hnar thei em ema zan sawttak hnung ka ruolhai in hnunghin candle hai insitin lekha ka tiem hlaka, zan khat chu mi dum deu el pakhat hi ka hmu a, lekhathiem i nuom chun kei hi mi bie rawh kei chun lekhathiem theina khawm ka pek thei che a nih ahung tia, ka thaw dan ding khawm a dawt dawtin a mi hrila, chu hun laitak chun ka ruolhai an in vawng ta sie, hang kheksuok ka tum leh ka țawngsuok theinaw bawk, amiruokchu chu midum setan le chun kan inbiek thei bawk sie mak tak a nih, a na chu kei chun nang setan a'nthawk  lekhathiem ka nuom nawh, kan Pathien khawma lekhathiemna a mi pek thei a nih ka tia, chu hnung sawtnawte zo chun a suok tah a, chu zo chun puonvar sil pakhat hi ka kuomah ahung um a, a ma le chun kan inbiek theia inhawi ka ti em em a nih" ti'n a mihril mawl mawl a, kei chun mak ti tak le lawm bawk sie chun "puonvar sil chu Pathien Vantirko ani chu, ka hmu nuom ve de aw !  A la biek hlak che am?"  Ka tia , a ma chun "aw ka țawngțai chang dam hin ka kuomah aum hlak a"  a ti lei chun ; "ka ta dingin mi va țawngțai pek la, ka Pi Jam in ka um dan hai, ka rawngbawl dan hai hi Lalpa ka chungah a lung a awi am ? ieng tia um pei dingin am Lalpa'n a mi dit? Ti chu mi va'n  indawn pek rawh aw" ka ti tah a,  a va țawngțai zo ahung kira a mi hril hai chu a ropuiin ka va lawm ngei de! Ka um dan hai le ka la umpei dan ding hai le, lungrila chieng taka hung inlang hai ka lo ringhla hlak hai damkha, Lalpa mi biek a ni ziet hai le, thil ramtin ka hriet fie lo hai le ka hriet nuom em em hai chu a bat batin a mi hung hril fie chu ka va lawm ngei de ! Chuongchun nitin deu thaw'n Lalpa vantiko leh kan inbiek zinga anhawiin thlamuong ava um ngei de !

Ei hung hril nuom tak le ei hung suklang nasan chu hihi anih. Thiemna le Varna  hai hi Lalpa ei Pathiena inthawk ana, ei thiemna le ei varna hai hi Lalpa ei Pathien ta dingin hmang țangkai tum seng ei tiu ti le, thiemna varna tiengpanga ruol ei lo ban zonaw ani khawma mi hal lo le inro lova mi pe phaltu Lalpa ei Pathien kuomah hni hlak ei tiu.

(Ka'n Tunu chun Setan thlemna do ngama Pathien a ringzo lei chun, Pathienin lekha thiemna a pek ngei a nih. Class 12 1st ah a pass baka subject pakhat ah letter mark a hmu thei hi Pathien ropuina dingin ei hung suklang a nih)

Jakob 1: 5.
Nangni laia tukhawmin varna a tlasam chun, mi popo kuoma hal lo le inro lova pe hlaktu Pathien chu hni raw se; chuongchun a kuomah pêk nîng a tih.

A chunghnung taka Lalpa Pathien chu ropui tak raw se.

Post a Comment

Powered by Blogger.