2 Lalhai 2:19. Chun chu khawpuia mihai chun Elisa kuomah, "Ngai ta, kan ngên che hi, hi khaw umdân hi ân hawi hle a chu, kan pu hin i hmu ve zing a; nisienlakhawm tui hi a țha naw a, a ram khawm hi a takchangnaw a nih," an ta.
20. Chun ama chun an kuomah, "Tuiûm thar mi hung lapêk unla, a sûngah chi hung sie ro," a ta. Chun an hunglâkpêk ta a.
21. Chun tuikhur hnârahai chun a hang fe a, chutaka chun chi chu a phul a, "LALPA chun hienghin a tih, 'hi tui hi ka sukhnik ta a, tuta inthawk chu, thina hrimhrim le, takchangnawna popo ka sukbo tah,' tîn," a ta.
Awle hi khawvel ei chengna ram a hin mi țhenkhat hai chun um sawng tum angin, “Kan ram a nih, kan ta a nih” ti'n țhang nasa takin la hai sienkhawm, nakie chu ei taksa’n hi khawvel a suoksan hun a la um ngei ding a nih. Harsatna, mangangna ieng ang khawm hung tlung sienla, ei taksa’n thina hiel lo tuok ding khawm nisien ei thlarau hi sandam a ni ding am? Van, chatuon ram ding lem khi, “Ka ram, ka ta” I ti thei chie am? ti hi ngaituo a va țul de!
Tuikhur fak tlaklo, a ram khawm takchanglo ang ei nih a, sienkhawm Elisa'n chi a phula tuihai chu fak thlak a hung ni a, a ram khawm takchang a hung ni angin, ei Pathien chun kalvari thlangah a naupa Isu Krtista thisen hlu chu a hungin luong tira, chu kalvari vadunga thisen hlu hung luong dawntuhai chu, fak tlak lohai fak tlak le dawn tlakin a mi siema, takchang lohai khawm takchang ei hungni tah a nih. Lalpa ropui raw se.
Unau, takchang nawna khawela um niin la khawm, ei takchanga, ra eiin suoa, faktlak le dawntlak eini theina dingin, hmangaitu Lalpa chun mitin ta dingin Kalvari vadung a lan luongtir zing a nih. Chu hringna tui chu dawn ngei dingin ke pen rawh. Kalvari vadunga cheng tahai chun, chengzing an nuom hlak, thlarau damna le hlimna lawmna kim, khawvelin a pek thei lo chu a um tlat leiin. Chu vadung tui chu dawna cheng dingin ka fiel cheu a nih.
Mitin chengna le lengna facebook khawvel lem hi chu, a takchangnaw bik zuol am mani aw ti dingin a um a nih. Ka lut hlim khan chu ka thiemnaw êm êma, hling le buor kara leng angin kan hrieta, ka sir anpel chang khawm a um bawk a nih! Nisienlakhawm, Lalpa kut hratin a mi chel zinga, face book khawvel thlir zingin, hmatieng fe peiin, hi takchang nawna face book khawvel a hin, Par ding le Ra insuo dingin Lalpa’n a mi ti a lo nih. Keima tieng kan en chun kan sit hle! Bible thiem le sermon thiem khawm kan nawh. Nisienlakhawm, mi tirtu chu ka ti a, kan za a, kei maah a umsa um lovin a thu ka zawm tawpel a nih. Chu, a thu ka zawmna a chun, Israelhai thlalera an fak ding Mana a peka, rutkhawl thei an nawh, a hun takah nitin a thar a pek nawk pei ang khan, nitin testimony a mi pek tah a, Elisa’n tui le a ram leilung sukthiengna dingin tuikhur hnara machi a phul angin, sermon thiemnan ni lovin, keia mizie anga mawl tak tak Testimony a mi pekhai chu, face book khawvela phul/post dingin a mi ti a lo nih. Vawisunni chena kang lova testimony post ding mi pe a, mi sukhring pek hlaktu Pathien hring chu kan pak a nih.
Elisa’n Jeriko mihai tuikhurtui sukthat na ding le a ram takchangna ding khan damdawi mantam a hmang nawh. Tuikhur hnarah a fe a chi a phula, tuichu a hung inhnik ta a, ram khawm a hung takchang tah a nih. Chuongang bawkchun ei Lalpa hin a nauhai hi a rawngbawl ding hin ei thaw thei bak chu a mi lo phut insang naw ie! A thupek ei zawmna hih a lawm taka, a dit zawnga eiin pek a ni phawt chun, ei tlin tawk ding ang peiin hmangruo mawl tak tak hmangin thil ropui tak tak a mi lo inthaw tir hlak a lo ni lem. Unau, Lal rawngbawl ding hin insit naw la, a thu zawm el rawh. Aman I thaw ding lo hril a ti che a, I thei lo inthawtir naw ni che. A ti chu thaw la, I thaw chu aman a lo sukhringel lem ding a nih. Chuongchun, I thu zawmna khan mihai ta dingin faktlak, dawn tlakin hung takchang tang a tih.
“Par ding le Ra ngeidinga enkawl dingin thupek ei nih, hringna lallukhum hlaw dingin”
Lalpa’n a thu mi sukhring pek raw se.
