Aizawl, July 10, 2017, Virthli (ONP): Pu Khamhminglien Hmar @K. Hmar,Taithu khawsuok, tuta Zemabawk, Aizawla in le lo hmun det neia khawsa mek chu hunsawt tak el damnawna leia New Life Hospital, Aizawl hmuna enkawl niin vawisun dar 12:15 PM vel khan a chatuonram ami lo inlawisan tah.

Pu Khamhminglen hi Central Excise & Customs, Aizawl hmuna Superintendent sin chellai mek a nia, Assistant Commissioner a kaisangin IRS chen conferred ania chu a damnawna leiin a lak/chel hman ta naw nih.

Pu Khamhminglien Hmar (K.Hmar) hi Pu Lienkhum (L) le Pi Darnei hai nau 3 na niin, ni 28 July 1954 khan Taithu, Keivawmmuol ah Thlama-ah a pienga. Taithu, Manipur-a seilien in, piengpui unau 7 (nuhmei 4 le pasal 3) a nei a nih.

Pu K. Hmar hin kum 1994 anthawk khan zunthlum (Diabetes) an vawi tana, kum, 2013 khan Christian Medical College, Vellore ah investigation thaw a nia, zunthlum leiin a kal (Kidney) chen a hung function tha ta nawa, Hospitala enkawl niin Dialysis vawi 13 lai thaw a ni hnungin Home Dialysis hai chen thaw alo nih.



Pu Khamhminglien Hmar hin Class - VI chen Taithu-ah a'nchuk a. Class - VII leh VIII chu Parbung, Marupur-ah inchukin, Kum 1971 khan Shillong-ah inchuk sunzawm dingin a fea, Secret Heart High School-ah Class VII inchuk dingin a tumhnuoia, a Classmate hai leh an kum an ruol naw taluo leiin 1972 khan Govt. High School, Mawkhar Shillong ah an sawna, Parbung ah an chuk hmabak Class-IX a zawm nawk a nih. Class-X chu Shillong Govt. High School anthawkin 1974 khan a zoa, an hostel anthawkin ama chau a pass nghe nghe a nih. Pre-University (PU) le BA chu Gauhati University hnuoia a thaw nawka, Oriental College, Imphal ah inchuk zawmin, BA hi kum 1980 in an chuk zo a nih. A nuhmei Pi Rose Mary Lalthangpui (Mary Hmar) leh 2nd October, 1979 khan Saidan a Evangelical Free Church of India (EFCI) Kohran biekin ah an inneia, kum 1979 in Leprosy Dept. ah Field Assistant sin Imphal ah a thawa, kum 1980-1984 inkar sung Defence Account (Air Force) ah thawk nawk in, kum 1985 in Custom Inspector ah a lut a nih.

Pu K. Hmar hi hnam/khawtlang le kohran a hai khawm mi tangkai tak el, kum 1985 khawm khan Hmar Christian Diamond Jubilee Committee anthawkin Distinguisher Christian Citizen Award a dawnga, miharsa hai lunginsietna lientak nei mi, tlangram anthawka hung beltu hai khawm kutruoka in kir tir ngailo mi a nih. Hnam thila hai khawm mi tangkai tak el ani a,Tripura a Dharmanagar-a a posting laiin Tripura Hmar Welfare Society (THWS) tuta Tripura Hmar Welfare Association (THWA) ni tah Hmar Inpui. Gen. Hqrs. hrietpui le a hnuoia um hi andinpui a ni bawk a nih.

Post a Comment

Powered by Blogger.