2 Lalhai 5:10 Chun Elisa chun tirtawn a tira, "Fe la, Jordan vadungah vawisari inphûm la, chun i taksa chu a pangai hung nîng a ta, hung fai i tih," a ta.
11. Nisienlakhawm Naaman chu a lungasen a, a fehmang ta a, "Ngai ta u ka kuoma hung suokin hung ngîr a ta, Pathien LALPA hming chu lamin a kut chu phar vêlin, ân phârna lai chu a sukdam ding rawi am ka sawn a.
12. Damaska vadung, hieng Abana le Farpar hai hi lsrael rama vadunghai nêk chun a țha lem an nawm a nih?" a ta.
13. Chun a siehlawhai chu an hung hnai a, a kuomah, "Pa, zawlnei chun thil khirkhântak thaw dingin tir sien la che i thaw naw ding am a nih? 'Insil la, lo inthieng ta rawh,' a ti kha ti awmtak hrim an nawm a nih?" an ta.
14. Chun a zu fe a, Pathien mi hril ang chun jordan vadunga chun vawi sari a zûn phûm a; a tisa chu naupang chite pang angin a hung um ta a, a hung inthieng vawng ta a.
15. Chun Pathien mi kuoma chun ama le a ruolhai popo leh an hung kîr nawk a, a hmaa chun a ngîr a; chun ama chun, "Tuhin ngai ta, hnuoi chung popovah, lsrael rama cho naw hin chu Pathien a um naw ti ka hriet tah; chuleiin tuhin ka ngên che a nih, i siehlaw thilpêk hi la rawh," a ta.
Pathien thu awi hi chu a lo intak hlak bawk a ni maw! Naaman kha hangin thiemnaw el chi khawm an nawh. Mi ropui le siehlaw khawm tamtak nei a nih. An phâr damna dinga zawlnei Elisa thu hril kha pawm a lo harsa khawm ning a tih. Vadung thienghlim le ditum lem tamtak um sienkhawm, Jordan vadung kher a ni nawk nghala. Amiruokchu atawp a tawpa chun, Pathien mi hril ang chun thuawi takin Jordan vadunga chun a zun phum tah a, vawisari a tling hma po chun iengkhawm a ang chuong naw a, vawisari a tling char chun Pathien mi hril angin a hung dam tah!! A pangtihai chu naute pang ang el in a hung um ti a nih. Lalpa ropui raw se. Pathien thu zawmna chu damna a nih. Naaman chu a lawm hle a, "lsrael rama chau Pathien a um anih" a hung ti tah a nih. Lalpa ropui tak raw se!
Hi thu a hin inchuk ding a va tam de aw! Israel mi nuhmeite a inthawka hieng thil hi hung suok a ni a, a va ropui ngei de! Chun, Naaman a inthawka inchuk ding chu; Jordan vadung kherkhera vawisari van phûm ding kha, a nuom zawng le tum dan an naw a, a lung a sen nghe nghe a nih. Ei nuom dan le tum dan ringawt hin Pathien hi dawr ding a ni nawh. Pathien tum dan le nuom dan ieng am a na? ti hi suttin, hmun rinum le changkang lo lem na hmunah khawm ni sien, harsa deu le tuor met tul khawm nisien, lungawi taka a thu zawmhi damna a lo ni lem a nih ti hi a va chieng deh.
Ei natna, harsatnahai hih, Naaman angin ei puotieng inphar kher naw nih. Ei sungtieng thlarau nun inphâr ringtulai khawm tamtak um ei tih ring a um!! Chu eiin phârna hai damna ding chun Namaan anga Thuhriltuhai thuhril zawmel nuomlova chier nading zawng phawttu khawm tam tak um ngei ei tih. Sienkhawm ei thlarau inphâr damna ding chun thil hmusit um le hnuoihnung lem hai khawma Pathien Thlarauva inthawk thurawn tha an nei hlak a nih ti hriein inlamlei ei tiu. Siehlaw ang tluka ei hmu hai thu zawm khawm hi thlarau rama chun a lo țul hlak anih. Chuong hai chun ei ni nekin ei nina ei thlarau inpharna kha an hriet leiin an min vawi ve hlak annawm!!
Ei thlarau inpharna hai damna dingin, Namaan anga inlamleta Pathien thu zawmtu ni seng thei dingin Lalpa’n a thu malsawm sien, mi sukdam seng raw se.
