~ Jami Darngawn

Awleh, Hi khawvel a hin Hmar nunghak-in lo pieng naw lang khawm, Hmar Nupui ni dinga rem mi ruot pektu ei Lalpa chungah a hmasa'n lawmthu ka hril a nih.

Pathien nau hang ti tak hin piengthar/ringtu hai popo hang in khawktir bik inla, chulaia chun kei khawm  țhang ve ah kan ngai leiin, huoisen takin  Pathien nau kan ti ve a nih. A ni ngei nu le pa ni tah hai chun hrieng ei ta, ei nau ha'n ei thu an awi/an zawm chang hin ei lawm bik deu hlak a nih. Ei nau hai nisienkhawm ei thu an zawm nuom naw tlat chun nu le pa lungril a'n hâng nuom hle ding a nih. Ka naupa kum 8 mi chu chempui a bawngsa rubawk sat/chan ding chun ka tir ngai nawh, amiruokchu a thaw thei ve tawk hai thaw dingin ka tir hlak a, thuawi taka a fe pha chun ka lawm em em hlak a nih.

Chuongang bawk chun nang le kei khawm, Pathien nau duot ngawi ngawi hai ei nih a, ei Pa chun a mi hmang nuom/tir nuom dan ruok chu in ang seng nawng ei tih. Kei khawm Lalpa'n a mi hmang nuom dan hi a dang bik hle ni'n ka hriet, a mi hmang nuom dan a ka thaw nuom naw vei chun ka chungah  a lung a awi naw ding, ti ka hriet leiin ka cham le cham lovin ka thaw hlak a nih. Lalpa ropui tak raw seh.

Awleh, Țawng le Hnam siemtu Lalpa chun Hnam bik nei dinga a mi siem hi ka lawm hle a nih. Chu ka Hnam țawng chu ka thiem a țul bawk a nih. Ni e, nuhmei hi vangnei am ei ti ding? Hnam hming khawm ei pasal hai izirin thlak danglam thei a lo nih! Kei ngei khawm ka'n siengna ka pa Hnam hming put ta lovin, ka pasal Hnam hming chu ka put der an' ta hih, a ni ngei pasal hai nekin nuhmei hai bawk hin hnam mizie awlsam taka ei  suklang theina chu Biekin inkhawm nikhuo a hai le puipung nikhuo a hai ei hnampuon hai ei bi/hak hin ei hnam nina/mawina a suklang/sukchieng hlak a nih. Kei khawm ka thei tawk chun Hmar hnam puon chi hrang hrang hai chu nei kim ka tum a (abikin nuhmei hai bi chi), amiruokchu ka la nei kim thei naw deu a nih. "Hmar-Âm"  puon bi chi kha 'Hmar' hming put a ni leiin nei phet phet ka tum a chu ka la nei remchang naw deu a nih. (Ka ruolha'n  kut ngeia an khawng ka dit leiin,  an mi khawng pek a chu an la kawng suol pei leiin vawi hni chu ka nei țhel an tah. He he...)

Ni e, Ka hnam puon ngainat taluo leiin fiemthu titakin ka ruol mi țhenkhat sawiselna khawm ka dawng nuol tah bawk. Chu neka ka thil ching/thaw taluo deu nia ka hriet chu, thiem le thiem lova khawlai hmun khawm nisien țawngțai hun ah hai  Hmar țawng ngata ka țawngțai mawl hi a nih. A chang chun ka'n phalam ve hlak an nawm ie, mani piengpui țawnga țawngțai thiem ta lo el chu aw! Anachu, ka theinaw tlat chun iem law chuong ka ta leh!!!

Chuleichun, khawlai hmuna khawm Hmar țawnga  thuhril le țawngțai chu ka'n zapui nawh ti el lang, khawvel a țawng lai popova ka hriet rawn tak le ka hmang rawn tak a ni leiin "Hmar Nupui ka nina hi ka'n zapui nawh" ka ti ve khanglang a ni hih! Chu neka ropui ka ti le kan zapui naw a, ka suong em em chu hihi a nih. Kum 30 mi ka ni char a Lalpa'n a rawngbawl dinga a mi tir țan lai khan, vawikhat chu ka thlaisuong lai Bible chang  a hung inlang tlat a, ka thlaisuong laklaw lai tak a ni lei chun ka en hman nawh a, a nakie khan a hung inlang nawk a, a vawi thumna a chun Bible chang a bung le a chang fie taka inlang chu ka va en ta ngei a, hi thu hi a lo nih.

Ezekiel 3
6 Hnam tamtak țawng inlârlo le țawng harsatakhai, an țawng i hriet thei nawhai kuoma tir in nawh. Matheilovin, an kuoma ka tir che a ni chun, i thu chu lo ngai ngei an tih.

Awleh, ka ta ding chun Hmar țawng  hi khawvela țawng popo laia  ka thiem tak le ka hmang rawn tak a ni leiin, ka ta ding chun "țawng inlar" ti thei a nih. Chuleichun, Lalpa rawng ka bawl theina ding a ni phawt chun tiin inzak, inphak dawn lovin thiem le thiem lovin ka hmangai em em Hmar mipui/Hmar țawng hmang hai kuomah ka taksa fesuok/pensuok thei ve naw langkhawm tiin, Hmar hawrawp thiem naw sasa'n ka'n chuk peia, tukhawm hin ka la thiem zo zân naw a chu ka theitawk a ka hung ziek hlak a nih.

Pathienin kei a fe thlenga hril nuom a nei nia ka hriet chu, eini Hmar nauhai hi inhmangai tak le inthuruol taka umin, lungril hmunkhat putin, Lalpa ei Pathien ditdanin Kohran le Khawtlang ah um ei tiu va,  ei Pathien hi inzain chawisang ei tiu. "CHANCHIN ȚHA MANSAPUI INBANGNA" ti kha hriezingin chapo lo le inngaisie bawk lovin,  ei theitawk sengin Lalpa ei Pathien ditdanin a rawngbawl ei tiu. Lungril/Sungril inthuk taka inthawka ka hung phawrsuok thei ve sun hai hih thli  a'n vir a'n vira saktieng thli hai khawm nisien, thlangtieng hai khawm a an lo dawng ve  thei angin, hi Virthli fethlengin ka chipui/hnampui Hmar nauhai  nakawr ah hi thu ziek tlawmtak hi Lalpa ropuina dingin invir lut ngei sien ti chu ka duthusam le ka țawngțaina a nih.

Hnam siemtu Pathienin Hmar nauhai malsawm mawl raw seh.

Post a Comment

Powered by Blogger.