Exodus 4:
2.Chun LALPA chun Mosie kuomah, "Kha i kuta kha ieng am a na?" a ta. Chun ama chun, "Hmawl a nih," a ta.
3.Chun ama chun, "Hnuoi chungah peithla rawh," a ta. Chun hnuoia chun a peithlâk a, rûlah a hung inchang ta a, chun Mosie chu a hmaa chun a tlânse a.
4.Chun LALPA chun Mosie kuomah, "l kut khan ban la a meiah la rawh" a ta. Chun a kutin a ban a, a chel ta a, a kuta chun hmawl a hung ni nawk tah a.
Awle, Tulai ei khawvel tawngmek a hin, mitin hin kuta chawi ei nei tawl seng a, tuta thu ziektu le tiem mektu khawm hin, atha tieng khawm nisien, a sie tieng khawm nisien, thawthei insangtak nei mobile ei chawi fur tawl a ni hih!!
Mosie kuomah Lalpan "I kuta kha ieng am a na?" A ti khan "Hmawl" ti'n a dawn a nih. Aningei hmawl a nih, nisienlakhawm a hmawl chawikha rûl in ahung inchang der angkhan, eini hai khawm ei thil chawihai hi RÛL anga tûr neiin anchang thei zing a nih.
Mosie chun Lalpa thu a zawma, rûla inchang ta chu a lak nawka hmawl pangngai a hung ni nawk a ni kha ! Kha hmawl ngei kha Mosie chun lsrael hai sansuokna dingin hmangruo pawimaw takin alo hmang țangkai tah a nih.
Chuongang bawk chun, nang le kei khawm hin, ei kuta ei chawihai mobile le mobile naw khawm lo nisien, Lalpa dit dana ei hmang a ni chun, Lalpa’n mi lawm a ta, mi tamtak hai ta dingin sansuokna le malsawmna'n inchangtir ngei a tih. Amiruokchu Lalpa ti naw zawnga setan lawm zawnga ei hmang a ni ruok chun, RÛL anga ți um, a hmangtu le dawngtu hai ta dinga natna lan chang ngei a tih. Chuleiin ei kuta ei chawi hai hi mihai natna dinga inchang lo dingin, mi petu ei Pathien ropuina ding le, chawitu nang le kei hin mihai ta dinga malsawmna ni dingin fimkhur takin hmang ei tiu.
Ei kuta ei chawihai le a chawitu ngei khawm Lalpa ta a nih ti hi hrieng ei tiuva, Ama ropuina dingin inhlân thienghlim zing ei tiu.
Lalpa'n a thar takin a thu malsawm raw se.
