Vairengte, July 9, 2017, Virthli (ONP): Tarik 7 July, 2017 a thiltlung, Pu Lalringum Sanate, HSA Assam State Coordinator, Mizoram anzin naah Vairengte Police Check Post ah ILP anlo hnina le inzawmin Hmar Students' Association (HSA) a lung awinaw hle thu le inzawmin vawisun khan HSA GHQ, Kolasib JHQ thuoitu le Vairengte Police hai chun inbiekna an nei thu Information & Publicity, HSA GHQ chun a hrila, a hnuoia angin thilumdan a hril.

Hi thiltlung le inzawmpei chun tarik ni 8 July, 2017 zan khan HSA Kolasib Joint Hqrs. thuoitu hai chu Vairengte Police Station zu pan nghalin Police hai kuomah an lung awinawna thu hai zun tlun in, a rau chen khawm an lo zu rau a nih. Hienga thu fepei chun HSA General Hqrs. khawmin Khawvel pumpui hriet dingin Press Release hai chen khawm alo insuo taa, Joint Hqrs. dang danghai khawmin an lo insuo uoi uoi ta bawk a. Hi thiltlung boruok hin Mizoram chu a dengna hlea, hril a hlaw hle bawk a nih.

Vairengte Police hai chun hi boruok hi a fe inril pei an ți thawng leiin HSA Kolasib Joint Hqrs. thuoitu hai chu inbi puiin anni chun Pu Lalringum Sanate chu inbiekpui an nuom thu an hril a. Vawisun tarik 9 July, 2017 dar 1:00 PM khan Vairengte Police Station ah Pu Johana, Inspector & OC Vairengte Police inrawina hnuoiah HSA Kolasib Joint Hqrs., Vairengte Police, Pu Lalringum Sanate le Pu Oliver Sungrohlun, Information & Publicity Secretary HSA Gen. Hqrs. thangsa in inbikremna le inhrietthiemna thuthlung siem a nih.



Pu Johona hin HSA le Pu Lalringum Sanate hai chungah ngaidam an hni a. Hiengang thil ditumlo tak tlung hi an ditnaw hle thu a hril bawk a nih. Hnamkhat, Zohnathlak hai vawng eini leiin in endang thei eini nawa tiin Pu Johana chun a hril a nih. Chun, Constable hai hi mimawl tak tak le thiemna tieng khawm insang nei anni naw leiin lunginsiettaka hrethiem pek dingin Vairengte OC chun ngenna a siem bawk a nih. Police tieng khawmin kha zana duty hai nasatakin kawkna le zilna an pek ding thu an hril sa bawk. Hnam issue a lak lo hram dingin HSA kuomah ngenna an siem bawk a nih. Hmatieng thilah hiengang thil hrim hrim tlung ta lo dingin Police haiin intiemkamna an nei bawk a nih.

Hi inbiekna nei huna hin Pu Lalringum Sanate chun case le buoina siem tum kan naw a, Mizoram hi ka vawikhawt fena an naw a, tuta țuma hienga ILP anmi lo hni el hi mak ka ti em leiin WhatsApp group ah zawna/ question ka siem lem chau a nih, tiin dawnna a siem a. Amiruokchu, mipui le Hmar Students' Association haiin ngaidan an nei a, Students body haiin hiengang thil indiklo tak tlungna le inzawma an khek suok hi chu an thaw ding hrim an thaw a nih, tiin a hrilsa bawk. Hi inbiekna hi boruok thatak hnuoia nei a nia, an inrem zo hnungin HSA thuoitu hai khawm an umna tieng an pang seng nghal a nih.

Post a Comment

Powered by Blogger.