Kum 33 ka tlingna ding ka piengchampha ahung tlunga ka pasal kuomah chun "Ei khawsakna hmun lmphal khawpui ngeia hotel ka lut nuomna taka mi fepui la ka dutak mi fakpui rawh aw" tia ka ngen angchun kum 2010 khan ka birthday chu lmphal khawpui ka nuomna hmun tak hotela chun ka pasalin a mi lutpui tah a, fak le dawn ka du chi hai chu kan order ve tah a, ka hang fak ve a chu ka lungril ruktak chun inhawinaw tina rieu ka nei lei chun ka hlim naw hle el tah a (ka pasal chungah chu ka lawm hle a nih) a kum nawk ka birthday chun Pathien kuomah hienghin ka țawngțai ve tah a "Lalpa vawisun ka piengchampha hin present mi pe rawh aw" ti'n bungeiin Lalpa kuomah chun ka țawngțai ve tah a nih, ka'n umna in sawng chungah ka kai tunga Lalpa kuomah chun "Aw Lalpa vawisun hin ka damsunga inchik tlak thil pakhat mi present rawh" ti'n ka țawngțai a, a zan chu inrinni ani lei chun inkhawm dingin ka'n fe a, inkhawm țin gate kan hang lut char chun thu lawmum lo tak naupang ha'n an mi hril chu ka mang ka sawn rum rum el a nih.
Ka'n inkhawm kar chun tuha'm mani ti hrietlo chun kan compound sungah bomb an lo denglut kha, Lalpa venghimna zarin alo puok naw hram alo nih ! Chu bomb dengluta um lei chun kan sungle kuo ruolțha hai chun kan chengna in a um/riek talo dingin thurawn an mi pek ang chun 22-6-2011 zana inthawk khan kan um na in chu kan suoksan tah anih.(kan in thlangtiengah keini in tho a chun kan um tah a, vawisun chen hin kan la um a, tuta ka thu ziek na hmun ngei hi a nih)
Choungchun Lalpa'n ka birthday present a mi pek chu dawng/lakdan ka thiemnaw bek beka Lalpa kuomah chun ni 10 bungheiin ka țawngțai tah anih. (zingtieng bu chau ka ngheia zantieng chu ka fak hlak) Nitin harsatna le buoina chidang dangin a mi bawma iem mani titak chun invet khawm ka hawi a nih, ka țawngțaina ni 10 atling char chun Lalpa rawl ka hriet tah a "Calvary Model dingin ka thlang che" tia a mi hung dawn chu mak ka ti bawk, ka lawm bawk anih.
Chutaka chun ka naupang laia ka um dan hai abat batin ahung inlang zut zut tah a, ka naupang/tleirawl lai chun khawvel model ni hi ka lo nuom ve thei em em a, ana chu kei hi lung (heart) țhalo ka ni leiin lekha khawm lo inchuk zawm thei talo ka ni lei le, ka nu le pa'n khawvel model lo tling reng langkhawm mi phalnaw ni hai, asan chu ka nu le pa'n ka nautet laia inthawka Lalpa ta dinga an mi lo inhlan tah ka nih.
Chuongchun Pathienin kawppui/pasal țha tak mi pe in, Pathien zar le ka pasal le a sunghai zarin kum 2000 khan ka lung( heart) țhatnaw na kha doctor hai kut hmangin Lalpa'n a mi sukdam tah anih. Haleluiah! Lalpa ropui tak raw se.
12-10-2002 khan ka naute, nau pasal ditum tak rila ra rochan hlu, ka sulkeu hmasa takin hi khawvel ahung hmusuok dan hi chu tu'n am hriethiem thei an ta leh !!! Hriethiem inla, thiemnaw inla, Lalpa'n ka chan dinga a miruot pek ani tlat bawk sie a. Bible a Hanna kha bungheiin Lalpa kuomah nau pasal ahni a, Lalpan nau pasal Samuel a pek angkhan, kei khawm Lalpa kuomah bungheiin nau pasal missionary ropui tak nidinga ka hni chu, Lalpa'n a mi pek an nawm ie, a nu le pa ta ding le mi hai ta dinga missionary ni dingin ka nau lutir chu Lalpa'n a mi pek hi ka lawm em em a nih.
Ka naupang laia inthawka Lalpa mi țhuoina hai ka ngaituon, a changchun hrietthiem harsa ka ti chang um hlak sienkhawm, ka ta dingchun Calvary lampui alo ni bawk sie a leh !
Awle, khawvel model ni ding chun lo nuom hle langkhawm ka nina hin ka tlinnaw hle el a, ka piengzie, ka hrieselna le ka thiemna'n a tlinnaw a nih. Sienkhawm Lalpa chun Calvary model ni dingin piengnal le nal naw, hausak pasiet, lekhathiem le thiemnaw a en bawk sie nawha ei va vang ngei de !
Khawvel model hai chu kum Over aum thei a, Calvary Model hai ruok chu kum Over aum thei nawha ei vangnei hle a nih, ei damsung hin Calvary Model ni dingin Lalpa'n nang le kei a mi thlang/dit hi ei vangnei em em a nih.
1 Samuel 16: 7 Nisienlakhom LALPA chun Samuel kuoma chun, “A hmêl tieng amanih, ân sâng tieng amanih en naw rawh, ama hi chu ka dit naw a nih. LALPA chun mihriem en dân angin a en ve si naw a; mihriem chun puotieng inlang dân an en hlak a, LALPA ruok chun lungril tieng a en lem hlak a nih,” a ta.
Pathien le Setan hin iengtik laikhawmin a mi en/hmu zinga, thilțhanaw ei thawpha setan a lawm em em a, thilțha ei thawpha ei Pathien a lawm em em a nih ti hriezing pumin fimkhur tak le mawitakin ei umna hmun sengah Calvary model ei nina hi hriezingpumin Lal lsu hmel sukmawitu ni tum seng ei tiu khai!
