Mihriemin ei inpâk nuom zawng, chawimawina ei pek chak zawng khawm an ang naw ni ngei a ta, vawisun chena an lenruol fam ta hai sulhnung zuia hnam santu tlangval hai khawm "Thangsuoa i hung kir phat leh thangsuo puon le tawnlairang insiltirin chawimawina nopui ka lo inhlan ding che an nawm." tia inpák ri le infuina thu tlang tin le muoltin fang chang ni hin hriet ding avang thei ngei.
Hnam meiser sit êng tumin, inchûkna dam, fak zawngna dam, nu le pa, u le sang, nau le te hai mani insung, khuo le veng tlansan el chau khawm ni lovin hnam ta dinga hringna bawt ngamin an iengkim an inhlan a nih. Ramhnuoi thing hnuoiah rinumna chitin reng túkin, fûrpui hnuoiah thlipui, ruopui, kawl in phe zuoi zuoi le trek tla kara dam; invawt le mise ha'n an tuom velna hnuoiah hnam rawng an bawla sienkhawm, inpák an hlaw si nawh. Nu le pa, sunghai mani khuo le veng ngaia an indawm kun tlawk tlawk chang khawm tam a tih; ngaizawng hai le se se thu di hang hril nuom chang khawm nang le kei ang bawkin hau hleng an tih sienkhawm, hnam an hmangaina leiin hnung tieng nghakir thei an ni si nawh. Organisation dang popo in 'H-M-A-R HMAR hnam hi ka hmangai bik rieu anih; ka hmangaina hi hmangaina tluontling anih.' ti awm fahranin hmusitna,chuk theina popo le diriem theina chitin renga ei per el ta hi lungril nâ theilo ei sawn el am an ta maw..??? Judahai ang ela uire nu suolna hmutu ei tam ta luo lei hi eiin enfie met chu a tul anih. An lenruol fam ta hai sulhnung hi sa angin zuizo nawhai sienkhawm, kei chu ka dem phal nawh.
Mihriem hi famkim(perfect)tu khawm ei um naw ang bawkin kutchawi pawlhai hin thaw suol chang nei an tih. Sienkhawm, hnam danghai hriet met lova thununna inpek dan um ngei a tih. Ringtu hai khawm khawvel mihai hriet lovin Pathien'n a nauhai chu thununna a pek hlak ei ti an naw? Mipui hai khawm hi mani seng hi hangin check fel inla, kut chawi pawlhai ei deu sawna a ei tawngbau hai le ei lungril hi ei dam thei chie a?
Hienga beiseina kham hrui ang chela, la pieng lo ram sulsuok tuma meiser de vêt vêt sitchawk tuma thanglatu hai, 'fam dairiel chang inla khawm kan sakruong Hmar hnam ta dingin.' ti tuhai hin daw thei naw chin la nei an ta, thlangtieng kawlrawnah mi liem san hun la nei ngei an tih; chu huna chun ei hnam hin santu nei lovin thla invai takin la um a tih ti inlau a um tak zet.
Ka hringna bawta hnam rawng ka bawl ngam naw lei hin kei chu inpåk hlawlo val ruolhai hi ka Idol hai an nih. Mani hnam puonzar hnuoia lenga mani ro inrel hi kan hnam chanvo anih ti pawmtu "thi chenin, ringumin hnam ta dingin thrang kan tih." ti tuhai INPÀK HLAWLO VAL RUOL an la ni zing hi kei suilung mawl hin ka hrietthiem thei nawh.
