Responsive Ad Slot

Hmarkhawlien: Police han 21 man, Biekin, Mimal In le motor iemanizat suksiet

Saturday, June 3, 2017

/ Published by VIRTHLI
Hmarkhawlien, June 03, Virthli (ONP): Zani (June 2, 2017) chawhnunga Hebrai veng, Hmarkhawlien hmuna truck in naupang nuhmeitu Esther Lalramfel D/o Pu Sanghmingthang Ralsun a rawthlum le inzawmin Police le mipui chu zanizan khan nasatakin an innawr buoi thu dawng a nih.

Report hmasaa hril tah angin a rawthlumna hmun laia Police duty han a rawttu truck tlanthlenga, a hnung suizui lova an um leia mipui pungkhawm hai Police chunga lungsenin innawrbuoina a tlunga. Mipuiin Highway/ lampui dangna an nei nghal a. Sawrkar tienga thuneitu le Lakhipur Police hai le khawtlang thuoitu hai inbiekna neiin thimbutin a ruong chu Police haiin post-mortem dingin an lak a nih. Lakhipur Addl. Superintendent of Police in a hrildan chun a rawthlumna hmuna Police Constable duty hai chu suspend anni nghal thu a hril a nih.


Hienga boruok fe mek lai hin Police le mipui hai inkara inhrietthiemnawna tlungin zan dar 9 vel khan Police tamtawk tak el Hmarkhawlien an luta, mipui lungsen hnawtdar tumin Tear Gas, Pellets hai nasatakin mipui tieng an kap tah a nih. Mipui lungsen ve thungin khawtlang nunghak, tlangval inkokhawm ve a nia, chanchin lakna in a hrildan chun mipui pungkhawm hai chun Lakhipur OC chu an thuoihmanga thu indawnna hai le a chunga kutthlak ve niin a hril. Boruok lumtieng pan peiin Police han mipui chunga lathi-charge chen an thawa, tear gas le pellets hai nasa takin an kap a nih. Police hai hin mimal in hai target in an kap baka, In iemanizat suksiet an neia, chun mimal le Kohran car/motor iemanizat an suksiet bawk a nih. Mimal thuomhnawm an suksiet hai bak a hin AG le UPC Biekin tukver hai khawm suksiet a nih.

Police le mipui innawr buoina hi zan dar 12 chen vel kha a fea, hi buoina le inzawm hin Police in civil mi 22 lai an man niin chanchin ei dawng bawk a nih. Chanchin ei dawng dan chun hi buoina thu hi Assam Chief Minister kuoma chen inthlun ani ta thu dawng a nih.
Don't Miss
© all rights reserved
made with by Simon L Infimate