CCPUR, May 23, 2017, Virthli (ONP): Hmar Inpui, GHQ 8th Executive Committee (EC) Meeting chu May 22, 2017 chawhnung dar 12 vel khan Hmar Secretariat, HSA Campus, Rengkai, CCPur hmun ah nei a ni a. Hi huna hin May 26, 2017 chawhma dar 11 AM ah LJ Memorial Hall, JJ Plaza, Rengkai Road, CCPur hmun ah Hmar Inpui GHQ, Special Assembly nei dingin thutlukna an siem a. Hi huna EC Agenda ding hai an ngaituo tlang bawk. Chun, hi hun a hin Assembly Secretariat Officers hai term a bo ta leiin inthlangna um a ta, inthlangpuitu Election Commission dingin Chairman le Secretary, Hmar Christian Leaders' Forum (HCLF) chu Chief Election Officer le a'nthlawppuitu ding Election Officer in ruot an nih. Hi huna Agenda ding thupawimaw thelut ding nei hai chun May 26, 2017 hma ngeia Gen. Secy./President, Hmar Inpui, GHQ kuta ziek ngeia pelut dinga ngen an nih.

Hmar Inpui Assembly Secretariat a hin member- Speaker, Deputy Speaker 2 (pahni) le Assembly Secretary le Deputy Secretary hai an um a nih. Hi HI GHQ Executive Committee Meeting chun tukum May 16 a Hmar hnam tadinga hringna inhlanhai hrietzingna le inzana a Hmar Martyrs' Day inserna le hi ni leh inzawma hmalakna le hlawtling taka huoihawt a um item chi tum tum hai chu lawmum le ropui a ti a, hmalatu le huoihawttu Hmar Martyrs' Trophy Organising Board (HMARTOB) le hmun hran hran a hi ni ursun taka lo insertu hai popo chung ah lawmthu a hril.

Chun, May 24, 2017 (Nilaini) chawhma dar 11 AM a Tribal Martyrs' hai sunna hunser le inzawma Lamka Mawltual (Public Ground), Hiangtam Lamka, CCPur a programme le an ruong vuina Tribal Martyrs' Memorial Park, Mata Dam hmuna um dinga a thei thei in uop dingin hi meeting chun tha an ti tlang bawk.

Post a Comment

Powered by Blogger.