CCpur, May 21, 2017 (HT): Joint Action Committee Against AntiTribal Bills (JACAATB) le Manipur sawrkar han May 10, 2017 nia Memorandum of Understanding (MoU) an ziek ta le inzawma Bills 3 hai dodalna le inzawma thina tuok mi 9 hai laia an ruong la vui lo Martyrs 8 hai ruong chu Mata Dam bul lai ram lien takel, CCPur Public Ground tiet vel ding, a tul huna Helicopter tumna (Helipad) a hmang hlakna hmuna vui dinga thutlukna siem a n tah tiin ei thu dawngna chun a hril. Ruong hai hi May 25, 2017 chena vui dinga remti a ni dungzuiin JACAATB team le DC, CCPur R. Sudhan han a vuina ding hmun hran han dapkuol a ni hnunga an sukfel a nih.


Ruong vuina ding hmun sukfel a nita le inzawm hin JAC chun thusuok siemin, Tribal Movement intana inthawk hliemna tuor le martyrs hai ruong tlawmngai taka enkawltu Joint Philanthropic Organization (JPO) chunga lawmthu a hril a, MoU a hming ziek MPC, UZO, STC, TCU le YPA han martyrs hai ruong vuina kawnga mawphurna lang an ta, JPO chuh movement le Tribal martyrs hai le inzawm thil an la kawl hai JAC a UZO palai Thangzamang Zou kuta pedawk dingin an hriettir.

Ruong vuinaa mawphurna pek an ni angina MPC, UZO, STC, TCU le YPA thuoituhan ruong vuina ding hmun inthielfaina sin an thaw tan a, martyrs hai ruong May 24, 2017 a vui ning a tih tiin JAC thusuok chun a hril. Public groun hmunah martyrs hai sunna hun hmang ning a ta, hi hmuna inthawk Truck pakhat senga phurin vuina ding hmun panpui ning a ta, ruong vuiliem zo a ni hnungah Memorial Park bawl ning a ta, Park bawl ding design tu dingin Mizorama inthawk Architech hung an ta, August 31 (Tribal Unity Day) hmaa hung tlung hman dinga martyrs hai statue khawm Delhia order a nitah tiin ei thu dawngna chun a hril. 

Post a Comment

Powered by Blogger.