Aizawl, May 16, 2017, Virthli (ONP): Ram le hnam ta dinga insung lum maksana hringna hlutak lo chan tah, pasalthahai ni-  Hmar Martyrs’ Day chu Sinlung Hills Development Council (SHDC) huoihawtna in vawisun khan I&PR Auditorium, Aizawl-ah ursun tak le ropuitaka inser a nia. Hi hun hi Pu Hmingchungnunga, Chairman, SHDC le Pu Lalchungnunga, Secretary, SHDC haiin special guest niin an hmangpui a nih.

Martyrs' Day inserna programme a hin mipui țhahnem tak an fekhawma, hlaksakthiem hieng Nk Esther le Pu Lalramchan Amo haiin hnam hla hmangin mipui fekhawmhai an in awi.

Hi huna thuhriltu Pu Hmingchungnunga chunMartyrs' Day hmang theia um chu lawmum a ti thu hrilin, hi ni hin mani insie kienga ram le hnam ta dinga ei inpumkhatna ni le zaikhata ei luong khawmna ni a nih ti’n a hril.


HPC(D) le Mizoram sawrkarhai inkara inremna lampui zawnga inbiekna nei mek chu lawmum a ti thu hrilin,  Pu Hmingchungnunga chun inremna an ziek thei ngei a beisei thu a hrila, inremna ziek theia a lo um chun, council election a um thei ngei a beisei thu le hi ding hin 2008 a election rules buotsaia lo um chu sawrkar khawmin hmang a remti thu a hril bawk.

A hril peinah Pu Hmingchungnunga chun New Secretariat  Complex, Aizawl a SHDC cell office bawlna dingin restricted tender insuo a ni ta thu a hrila, NECS le Aizawl FC neitu Pu Robert Romawaia Royte chun sawrkarin a sanction cheng nuoi 40 khelah ama mimal pawisa lo thawlawma bawl pek an huom thu a hril bawk.

Pu Hmingchungnunga baka hin Pu J Laldinliana, HPC founder president; Pu J Lalchhanhima, Vice President, Hmar Inpui Gen. Hqrs; Pu Lalvenhima Hmar, President, Hmar Inpui Mizoram region; Pu K Lalramtana, President HSA, Joint Hqrs, Aizawl le martyr families aiaw bakah HPC returnee aiaw ha’n thuhrilna hun an nei bawk a nih.

 Martyrs’ Day inserna inkhawma hin pasalthahai sunna mipuiin nei a ni bakah inzana  parthi inhlan an nia, mipui fekhawmhaiin ram le hnam ta dinga inhlantharna an nei bawk a nih.

Post a Comment

Powered by Blogger.