Guwahati, April 20, 2017, Virthli (ONP): NC Hills a minority tribal group (Non-Dimasa) hai khaikhawmtu Indigenous People's Forum (IPF) palai hai le Assam sawrkar chu vawisun khan Guwahati hmuna inbiekna an nei. IPF hin hun sawttaka inthawka alo nawr le a buoipui tah, development le administration hai a hrat nawk zuolna ding tia NC Hills tuta Dima Hasao tia thlenga um ta hi bifurcation thaw ni raw se ti a nia, Separate Autonomous Council, 3 (c) Article 244 (2) & 275 (1) of the Sixth Scheduled to the Constitution of India dungzuia khawidar dingin sawrkar kuoma vawitam tak el ngenna siem le nuorna hai chen khawm vawitamtak lo thaw tah a nih. Sawrkar in a ngaisak rak naw leiin IPF chun 27th March, 2017 khan NC Hills ah total bandh a puonga, chu le inzawm pei chun Sawrkarin tuta inbiekna hi nei dingin a hung rawt tah a nih.


Hi inbiekna a hin IPF palai hai chun an thil ngiet/demand hai thataka hrilna an neia, suk lungawi tumnaa Sawrkar tieng pang haiin development thil chidang dang pe dinga a ti hai chu an hnawl pek a nih. IPF palai hai chun hieng development thil hai hin kan demand suk puiting nawng ata, NC Hills khawidar ani zo hnunga development chu a hung um el ding a nih tiin an hril pek a nih. Assam sawrkar in NC Hills chungchang suichiengna sin thaw dinga alo indin Task Force in report a pek dungzuia Bifurcation thaw nghal dinga a ti chu Assam sawrkar palai hai chun Chief Minister chu a thar ani leiin lo hrilfie (briefing) dingin an tia, thlakhat sung ngeia CM leh inrawntlangna lo nei dingin an intiem a nih.

Inbiek nawkna (next round) chu Chief Minister le Secretary level a inbiek ta dinga ti a nih. IPF palai hai chun C. H Khawtlang, NC Hills CEM hmasatak a statue siem ding, a birthday or death anniversary inser dinga hnina peka um ta hai tuchena sawrkarin ala phal pek naw thu hai bakah sin lakna kawnga population ratio dungzui ni lova Dimasa haiin anni mi an ditsak bik hlak thu hai khawm an hrilsa bawk a nih.

Hi inbienknaa IPF palaia thang hai chu Pu L. Kuki, President IPF, Pu Varemsiem Varte, Gen. Secretary IPF, Pu Samsadin Zeme, Working President IPF, Tv. David Keivom, President ISF, Itumgaing Newme, Gen. Secy. Zeme Students Union, Pu Athong Lienthang, MAC, Pu Khawvelthang Hmar, MAC hai an nih. Assam sawrkar tieng chu Shri. Hemanta Narzary, Principle Secretary, Home Government of Assam le NC Hills Nodal Officer dinga ruot chun an rawia, SB Shri. Pallab Bhattacharyya, ADGP, NC Hills DC le SP hai an thang a nih.

Post a Comment

Powered by Blogger.