Ei pi le puhai beiseina neia zalenna suo la, hnam meiser sittu, ram le hnam ta dinga hringna hlu tak inhlantuhai kha tulaia mi thenkhatin an deusawa; an dema, an sawisela, an diriem em em lai hin kei chun an phu tawk chawimawina inhlan thei nisien ka chák tlat hlak chu tie!
Beiseina insang tak leh lekha inchúkin, an sung le kuo hai khawma "Ka naupa hi iengtik am aw KAMDING a ni ding?" tia tlumte thlira an lo thlir mek lai chun hnam insingsat rûnpui a hung tlunga chu hnam kal siema chun mawphurna insáng tak an inbela, a fatu(tucha) tak ni tumin an phùr hle a; chu ding chun HMAR zaleng nauhai ta dinga meiser sit ëng tumin thrang an lâk a nih.
Mani hnam puonzar hnuoia leng a, zalenna famkim nei a, mani ro inrel chu kan hnam chanvo anih ti pawmtu anni leiin awpbetna hnuoia inthawka in talsuok chu thaw makmawa an ngai tlat anih. Chuong chun hnam ta ding chun thei tawp insuoin thrang an laka, lam dang dap ding khawm hre chuong ta lovin hrimhrei an inleka, huisen takin ramhnuoia hnawt lûttu Mizoram sorkar chu an bei ta a nih. Hnam ta dinga hringna hlu tak chân ta hai khan an lekha inchûklai dam, an fak zawngna dam an sungkuo le an nuhmei an nau le te hai an khawtlang an maksan el cho khawm ni lovin an hringna thâpin an fe suoka, ei hnam ta ding hin iengkim an inhlan ani tak. Chu lungril, hnam ta dinga in pekna insang tak el sungrila thawktu um chu hnam hmangaina chu anih.
Ei hnam pasalthahai beipui thlak thawm khan zoram sorkar a nghawr nghinga nghala, a ram sorkar khawm an singsa mup mup el ani kha. Hmar nauhai zalenna meiser sit chawk pûtpût el chu sukmit tumin thang a lak nghala, a tum hlawtlingna ding chun unau le unau in that tir khawm pawi ti lovin sorkar thlungpuiin hmelma ram a bei ang elin a mi beia, chuong chun Hmar zaleng nauhai lungrilah ser dam theilo a mi siem pek ta a nih.
Awle, hieng hi ei hnamin ei chan tawk cho la nisien khawm "ka mihai chu inngaitlawma, an suolhai sima an tawngtai chun malsawm ka tih." ti tu ei Pathien kuom tieng kira bul ei tan tha chun iengtikam ani chu Aigupta ram le thlaler ramtawl hai pal tlangin jordan ral chu la kai ngei ei tih.
Chu huna chun mani chan ai dawng phak ta lo le khaw êng khawm en ngam ta lova beidawngna rip sunga khunga um hai, kum 5 dana hlema um kumtluon hlak hai, mawlna leia titna bawia intang hai le an mei chawk ringawt ena lungngaia inrûm mek hai ta ding ngei hin hlimna kawl la êng a tih. Chu huna chun mani ngaia hnam ropui ni lovin hnam danghai ngaia ropui le inza ni tang ei tih. Iengtikam ani chu ei kristien nun khawm inthlak danglam tang a ta kohran phena sul thup tum misuol in biru hai ngaimaw tang ei ta; chuong mihai nek chun suol hria, pawma, insira krista pantu, misuol lem hai lam dingin kohran pen suok tang a tih.
Ngaidamtu ni tumin kohran bel ta naw mania ngaidamna chang mamaw leiin kohran ah thrang tang ei tih. Pulpit chu chapona chilper nilovin, simna mittuiin buol lem tang a tih.
Iengtikam ani chu ei beisei ram hi hung tlung a ta, ringna hin thu tak inlang tir a ta varna hin siemtu chaldel lovin chawimawi a ta hrietna hin indikna zawng a ta, siemtu mita inthawkin thil siem en thiem tang ei ta, science ropui zie hai hmu tang ei ta, lei lung le a suonga thil um hai ropui zie hmusuok tang ei tih. Chu huna chun nangni pawl keini pawl ti hi sukbo in um tang a tih.
Chu huna chun vawisunni hi tienlai lan chang a ta, thangthar han hi thu hi la hring an ta vawisunni hi mak la ting an tih. Chu hun hung tlung ding thangthar hai indikna ram tiem chu ka thla hin ring nan a thlira, ka hnuoi khuolzin ka cham sung hin hmu phak kan beisei. Ka lo hmu phak ta naw ani khawmin la hung tlung ngei a tih ti hi ka ring tlat a nih.
Mauchar, Sinlung Hills | 30 April 2012
