New Delhi, April 29, 2017, Virthli (ONP): Pu David Lalrinsanga, IPS, Nodal Officer for North East People, Delhi Police & Joint Commissioner of Police in fielna a siem angin, April 24, 2017 khan HSA Jt.Hqtrs., Delhi thuoitu haiin a office, Nanakpura, Delhi-ah an inbiekpui a. Hi huna hin Delhi khawpuia North East mi khawsa hai himna ding le harsatna chi hrang hrang an tuok hlak le inzawma hmalak dan ding hriltlang a nih.


Nodal Officer in ama tienga inthawka a hmalakna ding laia pawimaw a ti tak pakhat chuh NE mi unorganized sector a sin thaw hai himna le indik taka hlaw an lak theina ding a ni thu a hril a. Hi le inzawm hin NE mi unorganized sector chi hrang  hranga an thawkna haia hotu hai (employer) meeting a neipui ding ni’n a hril. A tam le kim thei ang taka hieng employer hai hi inhmupui a nuom leiin NE mihai unorganized sector a thawk haiin an employer hai hming ama kuomah pelut dinga a dit thu a hril. Delhi khawpui le a sevela Hmar tawng hmang, unorganized sector a sinthawhai employer details la khawma, ama kuta pelut dingin HSA thuoitu hai a ngen a. HSA thuoitu haiin hi lak khawmna sin hi an tan mek a nih. Hmalak dan ding ngaituo mek anih.

Nodal Officer in NE mihai hriet dinga pawimaw chi hrang hrang a hril lai pakhat chuh siet tuok hunah 100 (Delhi Police Helpline Number) ah inhriettir hmasa a, chu zo charah NE Helpline- 1093-ah bawzui nghal hlak ding a ni thu a hril. Hienga a hril nasan chuh party khing tieng, NE mi ni lo hai damin 100-ah an lo intlun hmasa lem chun 100 dial hmasatu khah a tuortu lem anga inlangin, 'favor' a hmu lem thei lei a nih.

HSA Jt.Hqtrs.,Delhi thuoitu haiin Delhi khawpuia Hmar tawng hmang le NE mihaiin harsatna chi hrang hrang an tuok hlak le a sukkieng dan dinghai, thurawn an pek a. Nodal Officer khawma a thei ang anga HSA Jt. Hqtrs. a thangpui ding thu a hril bawk a nih.

Post a Comment

Powered by Blogger.